1 SAMUEL 16 : 1 - 13

SERMON PARHALADO HKBP RESORT SION NAULI

DI HKBP HAPOLTAHAN NAULI

TU MINGGU LETARE 26 MARET 2017

1 Samuel 16 : 1 - 13

Topik: Dipillit jala dimiaki Debata.

16:1  Dung i ninna Jahowa ma tu si Samuel: Sadia leleng on ho marsak taringot tu si Saul, naung pola hubolongkon, asa unang be raja ibana gumomgom Israel? Gohi ma sahanmu dohot miak, jala laho ho, naeng suruhononku ho tumopot si Isai, isi ni Betlehem; ai nunga hupillit di Ahu sada sian angka anakna bahen raja.

16:2 Dung i ninna si Samuel ma: Songon dia ma langkangku tusi? Ai begeon ni si Saul ma barita i, jadi bunuonna ma ahu. Dung i ninna Jahowa ma: Togutogu ma anak ni lombu sada, jala dohononmu ma: Laho mamele tu Jahowa do ahu umbahen na ro.

16:3 Ingkon pioonmu huhut si Isai tu pamelean i, dung i Ahu pabotohon tu ho manang aha sibahenonmu, ingkon miahanmu di Ahu manang ise sidohononku tu ho.

16:4 Dung i dibahen si Samuel ma na nidok ni Jahowa, jala sahat ibana tu Betlehem. Jadi tarsonggot situtu ma angka sintua ni huta i manjumpangkon ibana, huhut didok: Hata hademakon do na hinarohonmu?

16:5 Dung i ninna ibana ma: Hademakon do! Laho mamele tu Jahowa do ahu umbahen na ro. Manguras ma hamu, asa ro hamu donganku tu pamelean i! Dung i diuras ibana ma si Isai dohot angka anakna, laos dipio nasida tu pamelean i.

16:6 Jadi dung masuk nasida, dibereng ibana ma si Eliab, gabe ninna rohana ma: On do huroha simiahan di jolo ni Jahowa!

16:7 Alai didok Jahowa ma tu si Samuel: Unang ho mamereng tu rupana, manang tu tongam di dagingna, ai nunga hubolongkon anggo ibana, ai ndada marguru tu parnidaan ni jolma; ianggo jolma rupa do na niidana, alai anggo Jahowa roha di bagasan do na niidana.

16:8 Dung i dijou si Isai ma si Abinadab, jala didokkon ibana mamolus sian jolo ni si Samuel; alai ninna si Samuel ma: Ibana pe ndang na pinillit ni Jahowa.

16:9 Dung i didokkon si Isai ma si Samma mamolus, alai ninna si Samuel muse ma: Ibana pe laos na so pinillit ni Jahowa do.

16:10 Jadi songon i didokkon si Isai pitu angka anakna mamolus sian jolo ni si Samuel; alai ninna si Samuel ma tu si Isai; ndang adong na pinillit ni Jahowa sian nasida i.

16:11  Dung i ro muse hata ni si Samuel tu si Isai: Holan on do angka anakmu? Dung i ninna ibana ma: Tinggal dope ianggo siampudan i, jala ida ma, marmahan birubiru do ibana. Jadi ninna si Samuel ma tu si Isai: Suru ma mangalap ibana; ai ndang tagamon hundul hita laho mangan, nda jolo ro ibana tuson.

16:12 Jadi disuru ma na mangalapi ibana. Alai tarrara do dagingna, uli dohot rupana sorur do ro di panailina. Dung i ninna Jahowa ma: Hehe ma ho, miahi ma ibana, ai i ma ibana!

16:13 Jadi dibuat si Samuel ma sahan parmiahan i, jala dimiahi ibana di tongatonga ni angka hahana. Dung i songgop ma Tondi ni Jahowa tu si Daud olat ni na sadari i dohot tu jolo on. Dung i borhat ma si Samuel laho mulak tu Rama.

PATUJOLO.

Bahat do na dapot hita gabe siparsiajaran sian buku 1 Samuel on. Digoari do buku on “buku parhosingan” sian Teokrasi (Debata sitompa saluhut na gabe Raja) tu Monarki (raja na pinabangkit sian tonga ni bangso i sandiri). Tolu halak na mansai tarbarita hatiha i, i ma: Samuel (Malim), Saul (Raja naparjolo), Daud (Raja na bolon).

Dung pamilliton ni Saul gabe Raja gumonggom Israel, tibu do pintor manimbil ibana sian Debata. (13:13-14). Dijoloani si Saul ma si Samuel pasahathon pelean situtungon dohot angka pelean hamauliateon. Hasalaan napaduahon, ndang ditangihon ibanadope alus na sian Debata, nunga jumolo ibana marporang dompak halak Palistim. Jala pangalaosion ni si Saul na mangihut i ma: hatangkangon na manangkup si Agag raja ni Amalek. Diolani si Saul dohot bangso i do si Agag ro di birubiru pamuean dohotlombu, ro di pahanpahanan angka na moknok, angka anak ni birubiru pe, ro di sude na uli (15:9). Hape ia tona ni Jahowa, na ingkon taluhononna saluhut halak Amalek ro di saluhut na di nasida. Ingkon bunuonna do nang baoa ro di parompuan, nang dakdanak ro di posoposo, nang lombu ro di birubiru, nang unto nang halode (15:3).

HATORANGAN.

Ayat 1. Tung mansai marsak do roha ni si Samuel tu si Saul, ala naung tarsolsol bagi Jahowa, dung dipampe harajaon i tu si Saul. Marnida i, dipangkulingi Jahowa ma si Samuel asa unang lalap di bagasan arsak ni roha jala dipasahat ma tu ibana sada ulaon na imbaru pabangkit sada raja sian isi ni Betlehem, sian pinompar ni si Isai na margoar Daud. Laos on do muse gabe gombaran tu hatutubu ni Jesus na bangkit gabe Raja gumonggom portibi on.

Mabiar do si Samuel laho mangoloi hata ni Jahowa, maon diboto si Saul gabe dibunu ibana (ayat 2). Alai na sinangkapan ni Debata do na ingkon saut. Godang do dalan na pinatupa ni Debata laho pasauthon na di rohaNa. Di ngolunta siganup ari pe, ra taadopi do songon na niadopan ni si Samuel. Mabiar jala ganggu rohanta laho mangulahon ulaon ala adong “ancaman”, laos marpangkorhon ma i muse ala ndang “taida” Debata di tongatonganta, hape diuluhon do jolma marhite ragam dalan na pinatupaNa. Gabe umbiaran ma hita tu jolma martimbangkon Debata.

Borhat ma si Samuel hombar tu na tinonahon ni Jahowa. Marnida haroro ni si Samuel, tarsonggot situtu ma angka sintua ni hutai  mandapothon ibana (ayat 4). Ndada mabiar mida si Samuel angka sintua i, alai mabiar ala managam barita na binoanna do. Tagam roha nasida na pasahat uhuman si Samuel tu luat Betlehem ala tompu ni harorona, pola mamolus pardalanan na ganjang ibana. Hape hata hademahon do diboan jala lao pasahathon pelean tu Jahowa. Dipatupa si Samuel ma songon na pinangido ni Jahowa. Diuras ibana ma si Isai dohot angka anakna laos dipio nasida tu pamelean (ayat 5).

Dung masuk nasida tu inganan pamelean i, diida ma si Eliab, na uli do rupana jala tongam dagingna songon si Saul. Didok rohana, si Eliab do na naeng simiahan di jolo ni Jahowa (ayat 6). Alai dipaingot Jahowa ma si Samuel asa unang mamereng tu rupa manang tongam ni dagingna. Tangi do si Samuel tu soara ni Jahowa, ndang na di roha nang pingkiranna i diulahon ibana. Jotjot do hita songon si Samuel na talpe holan marnida haulion ni pardompakon nang pardagingon. Alai dipaingot Jahowa do si Samuel: molo Jahowa, roha parbagasan do na niidaNa (ayat 7). Dung i, dijou si Isai ma si Abinadab, dung i si Samma, laos songon i sahat tu na papituhon mamolus sian jolo ni si Samuel. Alai ndang adong nanggo sada sian nasida na pinillit ni Jahowa (ayat 8-10).

Di turpuk on, tangkas do dipabotohon na ualu do anak ni si Isai. Pitu halak ma i na rap dohot si Isai dipio si Samuel mamele, jala si Daud ndang parsidohot hatiha i. ndang adong nanggo sada sian na pitu i na pinillit ni Jahowa, jadi disungkunsi Samuel ma, atik na adong dope anakkon na so parsidohot di parpunguan i. Dialusi si Isai ma, na tinggal dope siampudan marmahan birubiru. Ndang adong ro tu pingkiran ni si Isai anakna siampudan i molo so na tinaringotan ni si Samuel. Jadi disuru ma mangalap ibana. Tarrara do dagingna, uli dohot rupana, sorur do ro di panailina (ayat 12). Dung sahat ibana di tongatonga ni parpunguan i, didok Jahowa ma tu si Samuel: “hehe ma ho, miahi ma ibana, i ma ibana”.

Tontu tarsonggot do si Daud disi sahat ibana, pintor dimiahi si Samuel ibana. Alai ndang holan si Daud, amana si Isai nang hahana na pitu i pe, tarsonggot do marnida na masa i. Holan Jahowa do na mangantusi lapatan ni ulaon i. Ai naeng patupaon ni Jahowa haluaon tu bangso Israel marhite naposoNa si Daud. Dung dimiaki, songgop ma Tondi ni Jahowa tu si Daud, i ma na margogoihon jala mamparbisuki ibana di ulaonna na mangihut, gabe raja gumonggom Israel.

SIPAHUSORHUSORON

— Di partingkian sinuaeng on, marragam do na mambahen hita mabiar, songon na masa tu si Samuel. Mabiar ibana so tung dibunu si Saul. Na masa si songon i, boi masa do nang tu hita jolma lumobi hinorhon ni hamatean. Di na masa i, sai tu Jahowa do si Samuel mangalualu. Laos disi do ro panuturion dohot pos ni roha sian Jahowa, mandok: sadia leleng on ho marsak?

— Di hamaolon na sai jumpang hita, sasintongna disi do Jahowa rade manise huhut mangurupi jolma asa malua sian haporsukonna. Disuru Jahowa do si Samuel manggoki sahanna marhite miak jala borhat tu Betlehem. Lapatanna, ndang hohom si Samuel di sitaononna. Mangula do ibana songon na somal di pangulaon hamalimon, nang pe adong parungkilonna. Dipaingothon do tu hita songon na masa tu si Samuel, paboa molo marungkil pe hita jolma, unang olo ditaluhon parungkilon i. Alai pasahat tu Jahowa parsorionmu, huhut ula nang ulaonmu.

— Marsorminan sian si Samuel, na unduk di parsuruon ni Jahowa asa borhat tu Betlehem mamiaki sahalak na gabe raja nang pe adong parungkilonna, di haundukonna i do dipasahat Debata “jalan keluar” sian parsorionna. Nang hita jolma pe, molo tung marungkil, undukhon matu Jahowa asa dipalua hita sian parsorion i, songon si Samuel na dipalua sian bonsa nang arsak ni rohana.

— Ia hita jolma, sai jumolo do marnida rupa manang ruhut parduru. Tongam ni daging, uli ni rupa, balga ni botohon, godang ni hamoraon, dna. Alai ndang i na gabe ruhut sipamanaton ni Debata. Pitu anak ni si Isai angka na tongam, alai sada pe ndang diloas gabe raja, ala “hurang” suman parrohaonna be. Dung jumpang si Daud, tu ibana do dipasahat Jahowa tampuk harajaon i ala denggan rohana. Sian na masa on, roha parbagasan do na jumolo  diia Debata. Nang di hata ni Poda 4:23 mandok “Sian saluhut sijagaon i, gumodang ma jaga roham, ai sian i do ruar angka mual hangoluan”.

— Sasintongna, ingkon si Jonathan do nian na gabe raja ala anak ni si Saul do ibana. Alai ndang diloas Debata harajaon i diuluhon si Jonathan, gabe tu si Daud do diampehon huaso harajaon i manguluhon bangso Israel. Sian na masa i tarida ma, paboa marhuaso do Debata mangojakhon jala mambubut sahala harajaon. Ala sian Debata do haroroan ni nasa huaso na di portibi on. Ala ni, molo tung adong be pe huasonta di tano on, unang ma gabe ginjang rohanta. Ai na boi magodo i butbuton ni Debata molo sai tapangasahon huaso i. Alai, unduk jala serep ma tu Jahowa molo adong be huasonta.

— Dipillit jala dimiaki Debata, nian martudutudu tu pamiakon jala pangojakhonon ni sasahalak raja do on. Jala i do na jumpang hita di Jesus dung haruar Ibana sian sunge Jordan simpul tardidi, mamungka sian i nunga disahaphon be huaso harajaon, laho manguhumi portibi on. Nuaeng, sahat ma pamilliton i tu hita saluhut. Dipillit do hita gabe parhalado, nang gabe ruas na burju. Jala molo tapaumbuk muse tu 1 Petrus 2:9  (Alai marga na pinillit do hamu, hamalimon na raja, bangso na badia, houm na ginomgomanna, asa tung dibaritahon hamu denggan ni harohaon ni Ibana, naung manjou hamu sian na holom tu hatiuronna halongangan i), tontu saluhut do hita angka na manghaporseai Jesus, dipillit gabe angka anak ni Debata. Ndang na portibi on mamillit hita, alai Jesus sandiri do (Joh 15:16). Ala ni, sai umbiaran ma hita tu na mamillit hita, unang apala portibi on. Amen.

Pdt. W. M. Hutapea