1 RAJA-RAJA 3 : 4 - 12

1 Raja-raja 3 : 4 - 12

3:4  Dung i laho ma raja i tu Gibeon, asa mamele disi, ai tambak bolon do disi; saribu pelean situtungon dipelehon si Salomo di atas langgatan i.

3:5  Apala di Gibeon ma patar Jahowa tu si Salomo di bagasan nipina bornginna i, didok Debata ma: Pangido ma manang aha silehononKu tu ho.

3:6  Dung i ninna si Salomo ma: Nunga dibahen Ho asi ni roha godang tu naposoM, damang si Daud, hombar tu parangena di joloMi di bagasan hasintongan, hatigoran dohot habonaron ni roha maradophon Ho, jala nunga dipahot Ho di ibana asi ni roha na godang on, dilehon Ho di ibana sada anak na juguk di atas habangsana, songon na masa nuaeng.

3:7  On pe, ale Jahowa, Debatangku, nunga dipabangkit Ho naposoM gabe raja singkat ni damang raja Daud; alai bajar dope ahu, ndang huboto ruhut tu balian manang di bagasan huta.

3:8  Ia naposoMon di tongatonga ni bangsoM do, naung pinilliti, bangso na bolon, na so taretong jala na so habilangan dibahen deakna.

3:9  Dibahen i, lehon ma tu naposoMon roha na pantas laho manguhum bangsoMi, asa huboto manirang na denggan sian na roa; ai tung ise ma na tuk manguhum bangsoM na marmulia on?

3:10 Dung i lomo ma roha ni Jahowa, ala songon i pangidoan ni si Salomo.

3:11  Jadi ninna Debata ma tu ibana: Ala na songon i pangidoanmi, jala ndang dipangido ho ganjang ni umur, jala ndang dipangido ho hamoraon, jala ndang dipangido ho hosa ni angka musum, roha tahe pinangidom asa tumimbang uhum.

3:12 Ida ma, bahenonKu ma hombar tu hatam. Ida ma! LehononKu ma tu ho roha na bisuk jala na pantas, asa unang adong tudoshon ho sian na robi angka naung salpu i, nang na tubu muse.

HURIA NI TUHANTA…Somal do tabege barita taringot tu si Salomo on. Salomo, sian hata Syelomoh na marlapatan hadameon. Laos sian i ma gabe tadok: syaloom.

Nuaeng, ndang pola ganjang hatahonon sian jamita on:

Borhat ma hita sian ayat 10: Dung i lomo ma roha ni Jahowa, ala songon i pangidoan ni si Salomo. Boasa lomo roha ni Jahowa? Aha do na mambahen i?

Molo tapahombar hata on tu dirinta be, dohonon ma jumolo: lomo do roha ni Jahowa nuaeng marnida ahu? Lomo do roha ni Debata marnida ulaonku siganup ari?

Tasigati ma jumolo sian si Salomo:

Na mora do si Salomo, ala na mora amongna. Ise?

Na gogo do si Salomo, ala Raja na gogo amongna.

Dung salpu harajaon ni amongna si Daud, diuduti ma muse tu anakna si Salomo. Tontu, nunga jumolo diparrohahon si Salomo nasa ulaon ni amongna. Nunga torop dijalo si Salomo angka parsiajaran sian si Daud.

Parsiajaran naparjolo na boi idaonta sian i, i ma: mansai denggan “hubungan” ni Amongna tu Anakna. Mansai denggan parsaoran ni natoras dohot anakna. Jala baliksa, mansai diparsangapi si Salomo do Amongna i. (Pat: Patik 5: Ingkon pasangaponmu natorasmu……..du).

Lomo roha ni Debata di si Salomo, ala sangap dibahen ibana natorasna. Naeng lomo roha ni Debata di hita? Pasangap natorasna be uju di ngoluna.

Torop nuaeng on na so denggan “hubungan” / parsaoran ni anak dohot natoras / natoras dohot anakna. Adong muse do sahat tu na so masipangkulingan sahat tu na mate. Mardomu di tano rara, ninna rupani. Ringkot ma hita mamparsangapi angka natoras.

Napaduahon: Boasa lomo roha ni Jahowa marnida si Salomo?

Ayat 4 mandok: Dung i laho ma raja i tu Gibeon, asa mamele disi, ai tambak bolon do disi; saribu pelean situtungon dipelehon si Salomo di atas langgatan i.

Beasa mamele? Beasa pasahat pelean tu Debata?

HURIA NI TUHANTA…ndang ala na pogos Tuhan i umbahen na ingkon pasahaton pelean. Daong. Ndada na naeng “menyogok” Tuhan i hita umbahen na ingkon pasahatonta peleanta. Daong. Unang gabe adong pingkiranta: molo hupasahat peleanku Rp. 5.000, ala 3 hali mardurung di parmingguon, gabe dapot ma annon Rp. 45.000. Daong gabe songon i.

Sai adong do pangantusionta na sala taringot tu na pasahat pelean on, ala adong hata na mandok: Na manabur otik, otik ma dapotna. Na manabur godang, godang ma dapotna.

HURIA NI TUHANTA…ndang patudoson i tu na pasahat pelean. Asing do na manabur, asing muse do na pasahat pelean. Ia na manabur, manghirim do i di parbue na godang. Alai na pasahat pelean, ndang ala na manghirim hita di parbue na godang. Alai, ala naung dapotan pasupasu na godang do hita sian Tuhan i, dalanta pasangaphon Ibana, tapelehon ma muse tu Ibana, ala Ibana do mual ni nasa pasupasu na sahat tu hita be.

Dia ma panorangion taringot tu si? On ma:

Ayat 6-7 mandok: Dung i ninna si Salomo ma: Nunga dibahen Ho asi ni roha godang tu naposoM, damang si Daud, hombar tu parangena di joloMi di bagasan hasintongan, hatigoran dohot habonaron ni roha maradophon Ho, jala nunga dipahot Ho di ibana asi ni roha na godang on, dilehon Ho di ibana sada anak na juguk di atas habangsana, songon na masa nuaeng. On pe, ale Jahowa, Debatangku, nunga dipabangkit Ho naposoM gabe raja singkat ni damang raja Daud; alai bajar dope ahu, ndang huboto ruhut tu balian manang di bagasan huta.

 

Sude do hata ni si Salomo, mandok: Dibahen Ho, Dipahot Ho, Dilehon Ho, Dipabangkit Ho. Sude pandokan i marujung do di Debata, ala Debata do mual ni nasa pasupasu na sahat tu si Salomo.

Ndang didok ibana: Ala ni ahu do umbahen na mamora ahu. Ala ni ahu do umbahen na juguk ahu di harajaon on. Ala ni ahu do umbahen na gogo ahu. Ala ni ahu do umbahen na bisuk ahu. Ala ni ahu do sude. Ise urroa sian ahu?

Bukti penghormatan kepada Tuhan, karena Tuhan adalah sumber berkat, maka manusia mempersembahkan korban persembahan yang baik kepada Tuhan.

Pasahat ma pelean na uli. Unang pasahat pelean angka naung marribakan. Gabe loja Tuhan i pature-turehon angka pelean naung buruk-buruk i. Loja padomu-domuhon na maribak i. Ala ni i, andorang so marujung annon jamita on, taparade hian ma angka peleanta na so maribak dohot na so buruk ate.

Napatoluhon: beasa lomo roha ni Debata di si Salomo? Ala Serep rohana, nang pe sahalak raja. Raja ni Bangso Israel na bolon i. alai di na pajumpang dohot Debata, ndang didok ibana: Raja do ahu. Alai aha do didok si Salomo? Ayat 8a mandok: Ia naposoMon di tongatonga ni bangsoM do.

Di na pajumpang dohot Debata, dipalua ibana do sahala harajaonna i. Ndang gabe pajago-jagohon ibana ala dung gabe raja. Ndang gabe ginjang rohana. Lepaslah segala status kekuasaan Salomo ketika berhadapan dengan Tuhan, dan Salomo menempatkan dirinya pada posisi seorang hamba. NaposoM do ahu Tuhan.

Naeng do songon i hita (ruas dohot parhalado) di na pajumpang dohot Debata, lumobi di tonga ni parmingguon nang partangiangan. NaposoM do ahu Tuhan, hatobanMu do ahu Tuhan. Lumobi hita parhalado: ringkot do dohononta: NaposoM do ahu Tuhan. Saya hanyalah sebatas hamba untuk Tuhan. Saya hanya melayani Tuhan. Ringkot do patuduhonon haserepon ni roha maradophon Debata. Unang ma adong na marjugul ni roha.

Bereng hita ma aha pandok ni si Salomo: Ia naposoMon di tongatonga ni bangsoM do, naung pinilliti, bangso na bolon, na so taretong jala na so habilangan dibahen deakna.

Diboto si Salomo do tung mansai na maol do manguluhon bangso Israel. Songon i do nang hamaolon manguluhon huria. ai sai adong do ruas ni huria na jugul, adong na jengjeng, adong na jungkat, adong na jorngang, adong na jogal, adong na jungking, dna. Tolap do hita mangadopi i? Marragam pangalaho ni jolma on, songon pangalaho ni bangso Israel maradophon Salomo.

Antong, aha ma sipatupaon:

Ingot hamu dope hata ni Epistel nangkin di Rom 8:26? Alai nang Tondi i, diurupi do hita di hagaleonta. I do na pinatupa ni Salomo: Urupi ahu Tuhan manguluhon bangsoMon. Sebab bangsa ini adalah bangsa milik Tuhan, bukan milik saya.

Napaopathon: umbahen na gabe lomo roha ni Debata di si Salomo, i ma: di tingki modom, disunggul Debata ma ibana. Salomo: pangido ma sian Ahu, aha silehononku tu ho.

Tapahombar ma jo uju partangiangan wyik hita: disungkun parhalado ma: Angka dia ma na naeng sitangianghonon? Jadi tapandok ma: Hahipason amang, ninna di bariba an, hasehaton amang, ninna di bariba an, ganjang ni umur amang, ninna di bariba an, sinur na pinahan jala gabe na niula amang, ninna di bariba an muse.  I ma molo “kondisi” na wajar.

 

Alai adong do pangidoan ni hita jolma na so denggan, termasuk sian hita naung tardok kristen. Aha ma i? Sai mate ma nian nai Boturan an. Sai didolos motor i ma nian Ama ni Londut an, sai diripashon ma nian Ompu si Bongbongan an, sai disintakhon begu i ma nian si Janggaleman an.

Alai, ida hita ma aha pangidoan ni si Salomo sian Tuhan i? Ayat 9: lehon ma tu naposoMon roha na pantas laho manguhum bangsoMi, asa huboto manirang na denggan sian na roa; ai tung ise ma na tuk manguhum bangsoM na marmulia on? ROHA NA PANTAS MANIRANG NA DENGGAN SIAN NA ROA.

Marimbar pangidoan ni si Salomo sian na somal tapangido. Roha hapantason do dipangido, ndada hamoraon, ndada hosa ni musu, ndada ganjang ni umur. Ai diboto si Salomo do, itu pasti akan diberikan Tuhan, sebab Tuhan saja sumber berkat.

Nuaeng pe angka dongan, tontu sihol do rohanta asa marbisuk be hita on. Boasa boi si Salomo tung mansai bisuk? Psalmen 111:10 mandok “Biar mida Jahowa do parmulaan ni habisuhon”.

Sada na mambahen gabe marbisuk si Salomo, i ma: Ala dihabiari jala diparsangapi ibana Debata. Dalan manghabiari Debata i ma: Hangoluhon Hata ni Debata. Cintailah Firman Tuhan, sebab Firman Tuhan adalah sumber hikmat. Martua do na tumangihon Hata ni Debata jala na umpeopsa.

Ala ndang dipangido ho hamoraon, ganjang ni umur dohot hosa ni musum, lehononKu ma tu Ho roha hapantason, ninna Debata tu si Salomo. Jala ndang adong be raja tudoshon si Salomo sian na robi angka naung salpu i, nang na tubu muse. Ibana ma raja na umbisuk sian sandok raja.

Antong di hita…ringkot ma hita maniru si Salomo, na manghasiholi hasasut ni roha hapantason, asa malo manirang na denggan sian na roa. Nunga torop nuaeng hamajuon ni jaman on na mambahen hasesega, dakdanak, remaja nang angka na matua, sude do digilas teknologi dohot hamajuon.

Sinjata na ummarga di hita holan hata ni Debata do. Hata i do na mangajari hita asa boi manirang na denggan sian na roa. Hata i do na mangajari si salomo gabe marbisuk. Laos hata i do nang na mangajari hita sude asa marroha hapantason.

Molo so tahalomohon be hata ni Debata, ndang tagamon jumpang hapantason ni roha. Molo so pantas be rohanta, boi do gabe puntas.

Pangido ma sian Tuhan Jesus, asa diajari hita manimbang saluhut na masa di ngolu on…..