1 Johannes 4 : 16 - 21

1 JOHANNES 4 : 16 – 21

Na Mian Di Bagasan Holong

Patujolo

Digurithon si Johannes do surat on hirahira taon 85 - 95 M, na marisihon angka pingkiran dohot impola ni suratna di buku INJIL JOHANNES. Digurithon do surat on ala adong na ingkon sipatingkoson taringot naung godang jolma na so porsea di Jesus. Adong angka poda haliluon naung manggugai parsaoran ni halak Kristen. I ma aliran Gnostisisme dohot Docetisme. Aliran Gnostisisme mangajarhon, paboa tondi i ma na denggan, jala daging i ma na jahat / na gok dosa. Ala nii, ditulak nasida do hajolmaon ni Jesus Kristus naung laos gabe Debata. Ai dietong nasida ndang boi mardomu jolma na ramun i tu Debata na badia i. Ia aliran Docetisme mangajarhon, paboa ndang hea Jesus mangolu gabe jolma. Holan na paulaula do i. Laho mangalo angka poda i ma digurithon Johannes ma surat on. Diondolhon ma “Tondi ni Debata do na mian di bagasan Jesus Kristus naung gabe jolma i. Debata do Ibana na mangarumari diriNa dung i disolukhon ma rupa ni hatoban ( Pilippi 2:7 ). Ro Jesus di bagasan daging laho patupahon haluaon di angka na porsea di Ibana. Ala nii, dijouhon do angka naung pinalua sian dosa, ingkon mamparbuehon angka parbue ni holong di ngoluna nang tu na humaliang.

Hatorangan

Ayat 16 - 18. Ndang tarpatupa hita haholongan molo ndang taparhatopothon paboa Jesus do Anak ni Debata na badia i. Di bagasan Ibana do mian Debata, jala Ibana di bagasan Debata. Dipapatar Debata do holongNa i tu jolma marhite hamateanNa sandiri di bagasan Jesus. Ala tung mansai balga do pangkorhon ni holong di ngolu ni hita jolma, ndang adong na tuk singkop mangulahon i, so holan Jesus. Ala nii, iajari turpuk on ma hita asa maniru pambahenan ni Jesus, na manghaholongi portibi on, ai i do patik na so tarjua siulahononhon molo tingkos ibana siihuthon Kristus. Pola do adong 43 hali disurathon di 1 Johannes on, hata holong ala nib alga dohot hinaarga ni holong i. Naeng ma holong ni roha hataridaan ni parsaoran ni halak Kristen, ala sian Debata do haholongan i. Jala unok dohot pangarimpunan ni Hata ni Debata mamungka sian Padan na Robi sahat tu Padan na Imbaru, i ma HOLONG.

Ayat 19 - 21. Beasa ingkon masihaholongan hita? Ala, naung jumolo hita jolma dihaholongi Debata. Ndang ala ni angka haboionta, hamoraonta, dohot haulionta, umbahen na holong rohaNa di hita. Alai, holan ala ni ASI NI ROHANA i do umbahen na sahat haluaon i tu ngolu ni hita jolma pardosa naung manopoti angka dosana. Ai ndang tarbahen jolma i be malua sian angka hadosaonna. Ala nii ma ro Debata marhite Jesus paluahon hita pardosa. Holong ni Debata, ndang tading holan di bagabaga, alai dipapatar do i di hau silang i ( Johannes 3:16 Ai songon on do holong ni roha ni Debata di portibi on……du). On ma hasintongan na so tardodo na gabe ojakan ni sangkap hatuaon na sian Debata. Sian parsuruon ni Debata di AnakNa na sasada i tu portibi on, tarida ma ndada jolma hape na manghaholongi Debata, Debata do na ro manghaholongi jolma i. Ndada sian tondi hajolmaon haroroan ni holong ni roha, alai sian Tondi ni Debata do. Debata sandiri do na patauhon holongNa i bahen pardengganan pasaehon dosanta. Ala ni dosa i, ingkon mago ma hita. Alai ala ni holongNa i, gabe dapotan hangoluon na saleleng ni lelengna ma jolma i. Marojahan tu balga ni holong ni roha ni Debata tu jolma i, dijouhon asa marparbue i di ngolu on marhite na masihaholongan. Ndang dung adong jolma naung marnida Debata, alai molo masihaholongan jolma i, mian ma Debata di bagasan diri nasida. Debata na so dung hea diida jolma, boi do tarida di ngolu ni halak na manghaholonghi donganna, ala Debata mian di bagasan ibana. Ala nii ma, molo itadok tahaholongi do Debata, hape ndang holong rohanta di jolma, didok turpuk on do “PARGABUS” do i. Ai beha ma manghaholongi Debata na so niida i, hape jolma naung niida i pe so boi hinaholongan.

Panimpuli

Joujou asa masihaholongan do apala na rumingkot di hita jolma apala di tingki  on, tarlumobi di masyarakat nang di na marhuria. Boi do mabola parsaoran ni angka na martondong honorhon ni na so masiantusan. Ragam angka parsalisian diadopi jolma i, gabe boi do manghorhon na hurang denggan laos gabe patubu parbadaion na sada tu na sada. I ma angka na ginoki ni roha na egois, na holan mangetong diri ni tumingkos. Asa mago angka roha si songon i, holan sada nama sihirimon i ma, Hata ni Debata. Jala asa tulus i, ingkon tatiru ma na pinatupa ni Jesus di ngoluNa laho manghaholongi jolma, ( songon parrohaon ni Kristus Jesus ma parrohaonmuna, Pilippi 2:5).  Haroroan ni haholongan i tung tangkas do didok, ndada sian roharoha ni jolma manang sian parbinotoan ni portibi on, alai sian Debata do. Haholongan na sian Debata sambing do mambahen hadameon patar di portibi on. Anggo sian portibi on holan parsatongkinan do i. Boi do holong roha ni dongan di iba, molo tingki mamora, alai dung marpogos gabe si tangkal tabo do i dietong, huhut mandao be. I ma nanidokna holong na marpambuat. Alai na sian Debata tung manongtong do. Halak na marholong ni roha sian Debata, i ma angka naung tubu di bagasan Debata sandiri. Halak na pinaimbaru di adopan ni Debata. Panghorhon ni na masihaholongan, gabe mian ma Debata di bagasan ibana, jala ibana mian di bagasan Debata. On ma tingkatan ni ngolu parugamoon na umbalga molo pola Debata mian di bagasan ibana. Jotjot do ro Debata naeng mian di bagasan rohanta, alai laos jotjot do hita pajogalhon rohanta be. Ndang olo mangungkap roha asa mian Ibana disi, ala umporlu dope di rohanta hataboon ni portibi on. Ala nii, binsan tingki parasian dope on, tajou ma Ibana bongot tu bagasan rohanta, bagasta, parsaoranta nang di huria asa mian Ibana disi, laos mian hita di Ibana. Masihaholongan ma hita jolma, ai i do panjouonNa. Amen.