SERMON PARHALADO HKBP
RESORT SION NAULI
Jumat, 28 Juli 2017
Di HKBP Cinta Rame
1 Raja-raja 3 : 4 - 12
Topik: Jalo ma roha
hapantason sian Tuhan i.
3:4 Dung
i laho ma raja i tu Gibeon, asa mamele disi, ai tambak bolon do disi; saribu
pelean situtungon dipelehon si Salomo di atas langgatan i.
3:5 Apala
di Gibeon ma patar Jahowa tu si Salomo di bagasan nipina bornginna i, didok
Debata ma: Pangido ma manang aha silehononku tu ho.
3:6 Dung
i ninna si Salomo ma: Nunga dibahen Ho asi ni roha godang tu naposom, damang si
Daud, hombar tu parangena di jolomi di bagasan hasintongan, hatigoran dohot
habonaron ni roha maradophon ho, jala nunga dipahot Ho di ibana asi ni roha na
godangon, dilehon Ho di ibana sada anak na juguk di atas habangsana, songon na
masa nuaeng.
3:7 On
pe, ale Jahowa, Debatangku, nunga dipabangkit Ho naposom gabe raja singkat ni
damang raja Daud; alai bajar dope ahu, ndang huboto ruhut tu balian manang di
bagasan huta.
3:8 Ia
naposomon di tongatonga ni bangsom do, naung pinillitmi, bangso na bolon, na so
taretong jala na so habilangan dibahen deakna.
3:9 Dibahen
i, lehon ma tu naposomon roha na pantas laho manguhum bangsomi, asa huboto
manirang na denggan sian na roa; ai tung ise ma na tuk manguhum bangsom na
marmulia on?
3:10 Dung
i lomo ma roha ni Jahowa, ala songon i pangidoan ni si Salomo.
3:11 Jadi
ninna Debata ma tu ibana: Ala na songon i pangidoanmi, jala ndang dipangido ho
ginjang ni umur, jala ndang dipangido ho hamoraon, jala ndang dipangido ho hosa
ni angka musum, roha tahe pinangidom asa tumimbang uhum.
3:12 Ida
ma, bahenonku ma hombar tu hatam. Ida ma! Lehononku ma tu ho roha na bisuk jala
na pantas, asa unang adong tudoshon ho sian na robi angka naung salpu i, nang
na tubu muse.
PATUJOLO:
Salomo, i ma raja na
patoluhon di Israel, dung Saul dohot Daud. Tagan di haposoonna dope si Salomo,
nunga dipabangkit Jahowa ibana gabe Raja laho manguluhon bangso Israel. Di mula
ni harajaonna, dipapatar Jahowa do diriNa tu si Salomo: Pangido ma manang aha
silehononKu tu ho, ninna Jahowa. Sigatanta ma di jamita on, manguhal angka
parbinotoan sian i, jala aha do alus ni si Salomo, jala aha ma muse na pinatupa
ni Debata di ngolu ni Raja Salomo.
HATORANGAN
NI AYAT:
Ay. 4-5
Dolok Gibeon.
Salomo, sahalak na
manghabiari jala manghaholongi Debata (ay. 3). Diihuthon ibana do songon na
pinatupa ni amongna, pasahat pelean di langgatan, tambak bolon inganan
pasahathon pelean situtungon. Dolok Gibeon, ± 9 km tungkan Pastima (Barat Laut)
sian Jerusalem, disi ma langgatan inganan pamelean tu Jahowa, na digoari “dolok
ni Jahowa”, ala so jongjong dope hatiha i bagas joro inganan parsombaon jala
inganan haojakan ni poti parpadanan (ay. 2, & 2 Sam 21:6). Marragam dalan
ni Debata laho manjou jala mamillit angka na hinalomohonNa, laho paandarhon
sangkap ni Debata tu bangsoNa i. Sada sian i, i ma marhite Salomo di dolok
Gibeon: marhite sian nipi, disise Debata ma si Salomo manghatahon
sipangidoonna.
Ay. 6:
Dung i ninna si Salomo ma:…du
Dipungka si Salomo do
pangidoanna tu Debata marhite na pasunggulhon asi ni rohaNa di amongna si Daud,
na sai tongtong marparange di bagasan hasintongan, hatigoran dohot habonaron.
Na magodang do haporseaon ni si Salomo marhite panandaonna di Jahowa na
marasiroha di amana si Daud. Molo diida ibana mangolu amana di bagasan
hasintongan, hatigoran dohot habonaron, tung ala ni asi ni roha ni Jahowa do i.
Asa marhite ngolu ni amongna si Daud, ditanda si Salomo do Jahowa. Parngoluon
ni ama dohot anak na denggan, pataridahon panandaon na denggan di adopan ni
Jahowa. Molo bangkit nuaeng si Salomo gabe raja, dihilala ibana do i holan asi
ni roha ni Jahowa tu amana si Daud. Ndada dihilala ibana ala ni hamaloonna
dohot hatauonna umbahen dipabangkit Jahowa ibana, alai diparhatopot si Salomo
do i, songon hapataran ni asi ni roha ni Debata tu amana si Daud. Amana diasii
Jahowa, anakna dapotan habangsa. Pangalaho sisongon i ma na naeng jumpang di
angka na porsea, jala lam torop anak ni angka na porsea dapotan tua dohot uli,
ala ni hinadenggan ni haporseaon ni amana dohot inana (natoras)
Ay. 7:
On pe ale Jahowa, Debatangku.
Nuaeng dipatolhas si
Salomo ma pangidoanna tu Jahowa marhite na paandarhon hadirionna di adopan ni
Jahowa mandok: On pe, ale Jahowa,
Debatangku, nunga dipabangkit Ho naposom gabe raja singkat ni damang raja Daud;
alai bajar dope ahu, ndang huboto ruhut tu balian manang di bagasan huta.
Dipungka si Salomo do pangidoanna marhite pandokan: nunga dipabangkit Ho naposom gabe raja. On do mula ni PANANDAON DIRI di si Salomo: Debata na
pabangkithon, i do na ummarga. Jala ihut tusi, ahu ma naposoM. Di panandaon ni
ibana dohot Jahowa, ditanda ibana do dirina songon naposo ni Debata. Ndada
pangkat manang sahala harajaon i na dipangasahon ibana, alai tung Jahowa na
pabangkithon do. Dibahen i do diauhon ibana tu dirina paboa naposo ni Jahowa do
Ibana. Na marlapatan do i: na holan laho patulushon na pinasahat ni Jahowa
sambing do ulaon ni naposo ni Debata. Naposo ni Debata i ma na manghobasi ulaon
ni Debata, i do impola ni ulaon ni naposo. PANANDAON
NAPADUAHON: taringot tu diri, i ma: bajar dope ahu, ndang huboto ruhut tu balian
manang di bagasan huta. Lapatanna: ndada huaso na lohot di ibana i na gabe
panandaon dirina. Alai tung panindangion taringot tu hadirion na bajar jala na
so “berpengalaman” do. Pangalaho sisongon i do na arga di angka na porsea, i
ma; pajumpang dohot Debata, mamboan hadirion na so mangasahon parbinotoanna,
huasona, manang haboionna.
Ay. 8.
Ia naposoMon…du
Dung dipaandar
hadirionna di adopan ni Jahowa, nuaeng dipaandar ibana muse ulaon na ingkon
patupaonna, di na nidokna: Ia naposomon
di tongatonga ni bangsoM do, naung pinillitMi, bangso na bolon, na so taretong
jala na so habilangan dibahen deakna. Si sada ihot do hadirion dohot ulaon
ni Salomo. Diboto ibana do sada ulaon na dokdok do ulaon na pinasahat tu Ibana,
na so tuk ibana mangula sian hadirionna. Gariada dihilala ibana do na so adong
jolma na tuk mangula i sian hadirionna (ay. 9c - tung ise ma na tuk manguhum
bangsoM na marmulia on?). Torang do diboto si Salomo, na mangula ibana di
tonga-tonga ni bangso ni Debata, bangso na pinillit, bangso na bolon, bangso na
so habilangan deakna. Alai tung pe dokdok, dijalo ibana do ulaon i, ala Debata
mangalehonsa. Dokdok jala borat do ulaon i dihilala si Salomo, na gabe raja na
pajongjong uhum di bangso ni Debata. Mananda ulaon na ingkon siulahonon, i do
sada na patut ingkon botoon ni ganup jolma. Molo diboto sasahalak aha na naeng
siulahononna dohot hinaboratna, timbanganna ma dirina manang na tau ibana
mangula ulaon i, laos tagamon ma luluanna dalan laho patulushon ulaon i.
Ay. 9:
Lehon ma roha na pantas…
Marhadomuan tu dirina
laho manguluhon bangso i do impola ni pangidoanna tu Debata. Ala ditanda si
Salomo dirina, gabe dipangido ma hadirion na bisuk manang roha na pantas, i ma HATAUON manirang na denggan sian na
roa. Ndada sinamot godang na tau pasonang roha diri dipangido ibana, alai tung
roha na pantas do. Marhite hatauon manirang manang mamolati na denggan sian na
roa, tau ma ganup halak mangulahon na denggan huhut pasidingkon na roa.
Pangidoan ni si Salamo asa dilehon Debata di ibana “roha na pantas” asa tau
ibana manirang na denggan sian na roa. Marhite roha na pantas, naeng ibana tuk
pajongjong uhum dohot hatigoran, di tongatonga ni bangso ni Debata. Asa
pangidoan i, marpardomuan do i tu ulaonna manguluhon bangso i, mamboan bangso i
mangulahon na denggan jala pasiding na roa (pat: Amos 5:14). Habisukon manang roha na pantas,
i do na hinaporluhon ni ganup halak laho patulushon ulaon na jinalona. Sian
Debata do habisukon i. I do umbahen na adong disurathon di Bibel i “molo adong
na hurangan bisuk, dipangido ma tu Debata (Jak 1:5). Jala habisukon i marurat do i di biar
mida Jahowa: Biar mida Jahowa do parmulaan ni habisukon (Psalmen
111:10).
Ay. 10:
Lomo ma roha ni Jahowa……
Denggan do pangidoan
ni si Salomo di adopan ni Debata. Mansai las do roha ni Debata di pangidoanna
i. I ma sada na arga di parsaoran dohot Debata. Pangidoanna mambahen lomo roha
ni Debata. I do na ingkon siparungkilhonon ni angka na porsea di ngoluna laho pasahathon
pangidoanna tu Debata. Pangidoan na marhadomuan tu roha, i ma roha na tau
manimbangi uhum, mambahen lomo roha ni Debata di si Salomo.
Ayat 11-12:
Ndada ganjang ni umur…dna.
Ndang ganjang ni umur
manang hamoraon manang hosa ni musu dipangido si Salomo. Lomo roha ni Jahowa
ala roha na denggan do dipangido si Salomo. Pangidoan na denggan i, i ma
patulushon sangkap ni Debata. Ala ni i ma didok Jahowa: lehononKu ma tu ho roha
na bisuk jala na pantas. Parsaulian na balga na dapot si Salomo sian Jahowa,
dilehon Debata “roha na bisuk jala na pantas” hombar tu na pinangidona i. Alai
ndada holan i, dilehon Debata do di ibana, hamoraon, hamuliaon, huhut sarimatua
angkup ni roha na bisuk jala na pantas.
SIPAHUSORHUSORON:
Na mangolu do nuaeng
huria ni Debata di tonga ni portibi on. Nunga lam maol imbarhonon (sirangon) na
denggan sian na roa. Sai hira bulung ni motung bontar mardua rupa do nuaeng
hadirion ni portibi on. Ingkon di pangullus ni alogo do ibana boi idaon na
mardua rupa. Aha ma sipatupaon asa lam malo nuaeng angka na porsea i manirang
na denggan sian na roa? Dalan laho patupa i, i ma: mangido “roha na bisuk jala
na pantas” sian Debata Jahowa. Molo marroha na bisuk jala na pantas angka na
porsea, tau ma ibana mamolati na denggan sian na jat. Molo martamba angka
bilangan ni na bisuk jala na pantas, tagamon lam ture ma ngolu ni natorop, ala
lam torop ma na tuk manirang na dua horong na maralo i. Molo jumpang sisongon
i, jongjong ma uhum dohot hatigoran di tonga ni huria nang masyarakat. Urat ni
habisukon i, i ma Kristus. Ai didok Apostel Paulus do: Alai di angka na tarjou
i, nang Jahudi, nang Junani, gabe hagogoon ni Debata dohot habisuhon ni Debata
do Kristus i (1 Korint 1:24). Ibana do na gabe habisukon di hita sian Debata
dohot hatigoran dohot habadiaon dohot haluaon (1 Korint 1:30). Di bagasan
Kristus ma jumpang habisukon. Jala laos di bagasan Ibana ma nang hatigoran,
habadiaon, dohot haluaon. I do na naeng jumpang di angka na porsea di tingki
on, asa tau mamolati na denggan sian na roa.
Ganup na porsea
manghaporluhon habisukon na sian Debata asa tau mangulahon ulaon na pinatolhas
ni Debata tu ibana. Marhite roha na pantas, na tau mamolati na denggan sian na
roa, ganup na porsea tuk patupahon na denggan di saluhut ulaon na pinasahat ni
Debata tu ibana. Ala doras do hamubaon ni partingkian on, ndang sanga be
marpanungkun tu donganna laho mambuat haputusan di sada-sada siadopan, laho
manirang na denggan sian na roa. Dibahen i, asa ganup halak tuk marroha bisuk jala
pantas, tedek ma rohana mangido sian Debata (topik Minggu). Ingkon lam
lehononta ma dirinta, mangolu di bagasan Kristus na gabe urat ni habisukon i,
huhut martangiang, asa disahaphon bisuk tu angka na manggoari dirina Kristen.
Ai sai adong do jumpang hita marugamo Kristen, alai ndang songon parngoluon ni
Kristen pangalahona. Asa dapot roha na bisuk jala na pantas, naeng do rade
ganup na porsea mangungkap dirina di Jahowa, huhut mananda ulaon na pinasahat
ni Jahowa tu ibana. Amen. Pdt.
W. M. Hutapea, STh
Tidak ada komentar:
Posting Komentar