1 MUSA 15 : 1 - 6 SERMON

SERMON PARHALADO HKBP RESORT SION NAULI

Tu Minggu XI Dung Trinitatis, 07 Agustus 2016

1 MUSA 15 : 1 - 6

Topik: Unang ho mabiar, AHU do lombulombum.

15:1  Dung salpu angka jamita ondeng ro ma hata ni Jahowa tu si Abram marhitehite alatan, ninna ma: Unang ho mabiar ale Abram. Ahu do lombulombum, upam mansai balga.

15:2  Alai ninna si Abram ma: Oe ale Tuhan Jahowa, aha ma lehononmu di ahu? Sai na punu do ahu, si Elieser na sian Damaskus na ma sitean bagashu.

15:3  Angkup ni ninna si Abram: Ndi, ndang adong pinomparhu dilehon ho, jala ida, anak na tubu di bagasan jabungku na ma sitean ahu.

15:4  Dung i ro ma hata ni Jahowa mandok tu ibana: Ndang ibana tumean ho, na ruar sian butuham, ibana tumean ho.

15:5  Dung i ditogihon Tuhan i ibana ruar tu balian, jala ninna: Ua tailihon ma dompak langit i jala bilangi angka bintang, molo habilangan ho angka i. Dung i didok muse tu ibana: Songon i ma pinomparmu sogot.

15:6  Jadi porsea ma si Abram di Jahowa, gabe hatigoranna do i dietong Jahowa.

PATUJOLO.

Songon goarna i, buku 1 Musa digoari do Genesis, na marlapatan bona. I ma buku na marisihon panjadi n portibi on. Nian, sambolus sai hira buku turi-turian do buku on, alai tumingkos do molo tardok buku on buku panindangion na pabotohon taringot “ise do Debata, beha do Debata marhuaso manompa portibi on, jala beha do Debata mangula di ngolu ni jolma”. Sada na tarida sian pangulaon ni Debata di ngolu ni jolma, i ma marhite Abram. Abram ma sada sian pigapiga jolma na tarbarita di Padan Narobi, na diurupi Debata.

Abram (na marganti goar muse gabe Abraham), disuru Debata asa bungkas sian tano hatubuanna Ur-Kasdim tu tano na so binotona (Kanaan). Ia jolmana margoar si Sarai, sahalak parompuan naung hol, ndang adong tubuna (1 Musa 11:30). Ala na hol i do si Sarai, sahat ro di naung matua, ndang mardakdanak dope si Abram. Hape nunga piga-piga hali sai dihatahon Debata bagabaga “tubuan anak” tu si Abraham (1 Musa 12:1, 13:16, 15:9). Bagabaga on ma na naeng patubegehonon ni jamita on.

HATORANGAN

Ayat 1. “Unang ho mabiar…du”. Di parnidaan ni si Abraham marhite alatan, didok Debata ma “unang ho mabiar”. Sian i boi dapot botoon paboa adong siparungkilhonon ni si Abram. Naparjolo: nambura pe ditaluhon ibana raja Kedorlaomer na sian habinsaran laho paluahon anakna si Lot ala diparhatoban. Boi do mabiar si Abram, ala atik tung ro muse parangan na sian habinsaran i marporang maradophon si Abram. Ndada hamatean na hinabiaranna, alai ala na so mardakdanak i dope ibana, na manguduti hajolmaon di si Abram. Napaduahon: lam balga ma biar i ala lam matua dagingna. Nunga hira-hira dapot hita sian turpuk on, paboa “diuji ma haporseaon ni si Abram”. Ai nunga tibu hian sai dipatubegehon Debata baga-baga i tu si Abram. Sampulu taon ma “hasurungan” ni si Abram di umur, martimbangkon jolmana si Sarai. Molo 75 taon umur ni si Abram di na bungkas i nasida sian inganan hatutubuna (1Musa 12:4), marumur 65 taon ma si Sarai. Alai marumur ma si Abraham 100 taon jala si Sarai 90 taon asa sorang si Isak. Jadi saleleng 25 taon ma sai dipaima si Abram asa tubu dakdanak na pinarbagabaga i di nasida. I do umbahen didok Debata “ unang ho mabiar”. Hata lombulombu (perisai), sai dihonahon do i tu parporangon. Dipangke do lombulombu laho mangalinggomi diri sian podang nang hujur ro di anak ni panah. Ala ni, hata lombulombu mangondolhon paboa Debata do na tongtong mangalinggomi si Abram maralohon angka musu na marsangkap mamunu ibana nang di angka ragam ni siparungkilhonon.

Ayat 2-3. Lam balga ma biar ni si Abram. Mardomu, uhum na masa hatiha i, molo so mardakdanak sada-sada rumahtangga, hatoban na mangula di ibana i ma na gabe sitean nasa arta. Tongon ma si Eliezer hatiha i na gabe hatoban ni si Abram. Lam lungun ma panghilalaan ni si Abram ala ndang anakna be na manuhuk hamoraonna. I do pandok ni si Abram: Sai na punu do ahu, si Elieser na sian Damaskus na ma sitean bagashu. Pandokan i pataridahon na so adong be dakdanak di si Abram, i do gabe “pasrah” ibana mangalehon artana i tu hatobanna si Eliezer muse.

Ayat 4-5. Dialusi Debata ma si Abram marhite hata na mansai uli alai laos maol haporseaon. Ala di hajolmaonna, ndang talup be boi mardakdanak sahalak parompuan naung matua jala hol (pat. 1 Musa 18:11). Lam didok Debata ma muse “torop ma pinomparmu songon torop ni bintang di langit”. Tontu maol do antusan ni pingkiran pandokan on. Haru sahalak pe so adong dope, alai nunga pintor dibagabagahon torop songon bintang di langit. Sambolus, mansai las do nian roha ala sahat na pinarsininta-sinta, alai sambolunari boi dohonon “ndang tarpatupa i”, ala nunga matua daging.

Ayat 6. Porsea ma si Abram. Alus na mansai tangkas jala unduk di hata ni Debata. Alus na boi mangalobii pingkiran ni jolma. Ai mamungka sian bonana pe, so diboto si Abram inganan sitopotonna di parsuruon ni Debata asa bungkas ibana. Holan haporseaon na hibul do di pangundukhononna di parsuruon ni Debata. Di jamita on pe, jumpang hita do na songon i. haporseaon na hibul do alusna di na didok Debata: torop ma pinomparmu songon torop ni bintang di langit. Haporseaonna i do na diida Debata. I do gabe sahalak na pinapulik ni Debata do si Abram gabe ompu ni angka na porsea.

SIPAHUSORHUSORON

1.   Biar ni roha. Songon si Abram do sude jolma on, na hea mangadopi biar ni roha. Sada sian i, i ma na so adong dakdanak na manguduti parmargaon / hajolmaon. Alai, di bagian na asing pe, boi tardok marragam do sihabiaran ni hita jolma. Isara: hapogoson, parkarejoan, parbue ni hauma, parporangan, parsahiton, dna. Biar na marlobi boi do mambahen jolma gabe mago pangkirimon, stress, jala gabe marsahit. Molo so adong alus na patogarhon roha, boi do gabe lilu hita jolma, sahat tu na mangujungi ngoluna sandiri. Sasintongna, ringkot do botoon “aha do sibonsiri ni biar” di turpuk on? Molo sian hajolmaon hita marnida na masa on, boi do tardok, persoalan harga diri di na humaliangna. Ndada holan artana i na ingkon pasahatonna tu hatobanna Elieser, alai dao ummarga sian i ndang boi si Abram mardakdanak. Boi ma gabe asing panghatahonon ni angka na humaliang.

2.   Ro Debata gabe lombulombu, manaluhon roha biar. Memang, ndang dapot hita di jamita on “sadia balga” ma biar ni roha ni si Abram. Alai sian hatana i na mandok: Sai na punu do ahu, si Elieser na sian Damaskus na ma sitean bagashu, tarida ma naung mago pos ni rohana. Alai, dung ro alus ni Debata, mandok “Ndang ibana tumean ho, na ruar sian butuham, ibana tumean ho”, disi do gabe tubu pos ni roha ni si Abram. Dipapos Debata roha ni si Abram, marhite na manogihon ibana marnida jala mamilangi torop ni bintang, mandok: songon i ma torop ni pinomparmu”. Sian na masa on, botoonta ma paboa “Debata silehon pos ni roha do Debatanta i”. Na rade gabe lombulombu di ganup jolma na marpos ni roha tu Debata. Ala ni, ganup na porsea, ingkon do denggan parsaoranna dohot Debata, asa rade Debata mangalehon diriNa gabe lombulombu (pelindung).

3.   Haporseaon gabe dasor di pos ni roha di pangurupion ni Debata. Panghataion ni Debata dohot Abram, pataridahon na denggan do parsaoran disi. Tarida do i mansai elek do si Abram pasahathon na di rohana tu Debata, lumobi di haroro ni dakdanak. Asa ndada na tubu songon i pos ni roha nang haporseaon i. Tontu, naung dihilala si Abram do di angka na masa naung binolusna di hinagodang ni pagurupion ni Debata. Ai ndang adong na so tarpatupa Debata. I do gabe hot haporseaonna na ingkon masa sude na binagabagahon ni Debata, lumobi di haroro ni dakdanak baoa. Nian mansai mura do manghaporseai na masa tu si Abram on ala boi tajaha saluhut pardalananna. Alai molo masa i di ngolunta, tarpaima hita di sihirimon pola marpulu taon, hot do pos ni rohanta? Hot do panghirimonta? Disi do boi jolma i gabe harhar haporseaonna na marDebata i, gabe laho ma tu hagogoon ni portibi on. Sahit na so ra malum, pangkat na so ra dapot, hamoraon na so ra jumpang, rongkap na so ra sahat, rumah-tangga na so ra denggan, dakdanak na so ra muba sian hajahaton, dna, boi do i manggugai pos ni rohanta na marDebata on. Diharingkothon ma parsaoran na denggan dohot Debata, jala ingkon manongtong do i. Unang gabe sipargale. Si Abram pe, ala jolma do ibana, tontu mangharingkothon “proses” do ibana asa porsea di bagabaga ni Debata. Jala ndada holan sahali diadopi ibana “proses” i. On ma na patut sitiruon ni angka na porsea i. Hasatiaon dohot hasabaron diharingkothon ma di “proses” i. Roha biar dohot tahutan, gabe bagian ni “proses” patubuhon haporseaon, saurdot dohot parsaoran na denggan dohot Debata. Alai di na hurang pos ni rohana, hurang manghaporseai di bagabaga ni Debata, boi do i gabe patubu pandelean. Tatiru ma songon si Abram na marpos ni roha di pangurupion dohot lombulombu na sian Debata. Amen.

Pdt. W. M. Hutapea