1 Johannes 3 : 18 - 24

1 JOHANNES 3 : 18 - 24 PAT JOH 15:12

Topik: Mangaradoti patikNa paboa naung mian di Ibana.

3:18 Hamu angka anaha, unang ma hatanta dohot dilanta mangkaholongi; naeng ma marhitehite pambahenan dohot hasintongan.

3:19 Disi ma botoonta, paboa sian hasintongan hita jala tapapos rohanta di Jolona.

3:20 Molo disolsoli rohanta hita, umbalga do Debata sian rohanta jala diboto saluhutna.

3:21 Hamu angka haholongan, molo so disolsoli rohanta hita, marhiras ni roha do hita maradophon Debata.

3:22 Jadi manang aha pe tapangido, jaloonta do sian Ibana, ala taradoti patikna jadi taula lomo ni rohana.

3:23 On do patikna: Naeng porsea hita di Goar ni Anakna Jesus Kristus, huhut masihaholongan, songon naung tinonahonna i tu hita.

3:24 Siradoti patikna, i do na mian di bagasan Ibana jala Debata di bagasan ibana. Jala sian on do taboto, naung mian Ibana di bagasan hita: Sian Tondi i, na nilehonna i tu hita.

Huria ni Tuhanta…di hita Kristen, parenta na so tarjua do na mangulahon holong (masihaholongan). Na mangulahon holong do parbue ni haporseaon, ala naung sangkambona hita dohot Kristus. Hea do ra tabege jamita ni parjamita, taringot tu Jesus na patudos diriNa tu “HAU ANGGUR”.

Ia hau anggur, tarhira bona ni jelok do, na manginsir/manjalar. Alai tutu, molo tung pe hona tu tano parbue ni jelok, ndang gabe busuk/sega. Jadi ndang pola diharingkothon “panungkol” tu suansuanan jelok. Alai molo hau anggur, tung sura dais parbue ni anggur i tu tano, boi do gabe sega/busuk. I do ingkon ringkot ma panungkol tu ranting ni hau anggur, asa unang busuk parbue ni anggur i, gabe tonggi ma panganon. Nasa ranting na so marparbue nang pe mian di bona ni hau i, digotap do i, dung i dipalungguk asa tutungon.

Dipatudos Jesus ma diriNa tu bona ni hau anggur, jala hita ma na gabe ranting ni hau anggur i. Tadok do hita Kristen, na sangkambona dohot Kristus, songon ranting ni hau anggur na mian di bonana. Sura pe naung sangkambona hita dohot Jesus Kristus, molo so adong panungkol di hita songon panungkol ni ranting ni hau anggur i, ndang tolap hita marparbuehon na denggan dohot na tonggi. Angka na busuk ma parbuenta.

Antong, aha do na gabe panungkol di hita, asa boi mangonjar rohanta mamparbuehon parbue na denggan jala tonggi? Aha ma panungkol i? I ma “Hata ni Debata (Firman Tuhan)”. Saleleng so tajangkon Hata ni Debata na gabe panungkol di haporseaonta, ndang tolap hita marparbuehon na denggan.

Huria ni Tuhanta…dipaborhat do hita sian Topik Minggu sadari on, na mandok: Mangaradoti patikNa paboa naung mian di Ibana. Adong disi hata “mian”. Jala dibuat do topik i sian ayat 24: Siradoti patikna, i do na mian di bagasan Ibana jala Debata di bagasan ibana. Boi tardok do hita naung mian di bagasan Kristus, ala sude  do hita mandok dirina Kristen. Alai gabe sada sungkun-sungkun na mansai arga di hita, i ma: nunga dohot ahu nuaeng mangaradoti patik ni Debata?

Aha do ulaning patikNa na ingkon siradotanta? Ayat 23 mandok: On do patikna: Naeng porsea hita di Goar ni Anakna Jesus Kristus, huhut masihaholongan, songon naung tinonahonna i tu hita. Ndada sae hape holan na “porsea” alai ingkon sahat do tu na mangaradotisa marhite pangulahonon na denggan. Ai molo holan na “porsea” do, sibolis i pe porsea do di Debata (Jak. 2:19). Na ringkot sisungkunhononta tu dirinta be, i ma: nunga parsidohot ahu nuaeng mangulahon holong ni roha i? Nunga huhaholongi nuaeng dongan na di lambungku?

I do umbahen na dipungka jamita on: unang ma hatanta dohot dilanta mangkaholongi; naeng ma marhite pambahenan dohot hasintongan (ay. 18). Alai unang gabe sala hita mangantusi holong ni roha on. Di bagasan holong i pe, adong do paminsangon asa unang mago. Ala ni, unang ma holan na mian sambing ranting i tu bonana, alai ingkon do marparbuehon na tonggi. Jala, molo tung pe boi hita mamparbuehon na tonggi, molo tung pe boi hita mangulahon na denggan tu dongan, molo tung pe boi hita patupa holong ni roha, unang pola tagam balos ni i. Sian Tuhan i ma jalo.

I do umbahen na diuduti muse di ayat 19 i: Disi ma botoonta, paboa sian hasintongan hita jala tapapos rohanta di Jolona. Sahali nari: sian hasintongan i do hita. Ise do hasintongan i? Johannes 14:6 Gabe didok Jesus ma tu ibana: Ahu do dalan i dohot hasintongan dohot hangoluan. Ndang adong na sahat tu Ama i, ia so marhite sian Ahu. JESUS do HASINTONGAN i.

Jadi molo taradoti patikNa marhite ulaon na masihaholongan, i do na ro sian hasintongan i sandiri, i ma Jesus. Jala Jesus pe, ndang hea dijalo Ibana balos ni angka na denggan naung niulahonNa. HosaNa, ngoluNa, mudarNa do dilehon tu hita, asa mangolu jala malua hita sian dosa. Ndada holan di hata dipataridahon Jesus i, alai sahat do nang tu pambahenan. Ndada holan di “pangabas”, alai dipataridahon do i marhite ulaonNa, angka dia ma i? Dipamalum angka na marsahit, diondingi angka na pogos, dilehon mangan angka na male, sahat tu na pangoluhon naung mate. I ma angka tiruan na tininggalhonNa di hita.

Ranting ni hau anggur i pe, ndang holan na mian di bonana. Alai ala ditungkol, gabe tuk ma marparbuehon na tonggi. Hita pe, ndada holan na porsea jala sangkambona (mian) sambing di Jesus, alai ingkon marparbue ma di pangulahonon. Manang aha dihaporluhon ranting i sian bonana, sai na jaloonna do i. Songon i ma hita. Manang aha tajalo, sai na pasahatonNa do i, asal mian jala tapatupa na masihaholongan. Ida hita ma di ayat 22 i: Jadi manang aha pe tapangido, jaloonta do sian Ibana, ala taradoti patikna jadi taula lomo ni rohana.

Na mangudut angka damang dainang nang naposobulung: Ndang na mandok na so adong be dosana molo dung gabe pandita. Ndang na mandok na so adong be dosana molo nunga gabe parhalado. Ndang na mandok na so adong dosana molo dung gabe Kristen. Sude do hita hea mangulahon dosa (na patar dohot na buni). Jala jotjot do hita talu hinorhon ni na sai marningot angka hadosaonta. Contoh: molo niarahon dongan asa marminggu, sai pintor ro do alus: “adong do amang tingkini muse”, ai pardosa godang dope iba”.

Huria ni Tuhanta…saintongna, alus na songon i, sian na so pamotoanta, nunga mangula be sibolis. Jala disi do patar hataluanta (torus ma hita gabe merasa bersalah, torus ma hita gabe terpojok, ujungna mengkel ma sibolis ala nunga jumolo hita talu). Angka pingkiran sisongon i do na jotjot lam mambahen hita sumurut, lam marpengpeng ma haporseaonta.

Torop dope hita Kristen on, dagingna di taon 2016 on, alai pingkiran nang rohana sai hot di taon 2015, 2014, 2013, ala ni dosa naung hea taulahon. Unang loas pingkiranmu, roham, tondim, TARIHOT di angka hadosaonmu naung salpu i. Rade do tongtong Debata manjangkon pardosa na manolsoli rohana. Jaha ayat 20 “Molo disolsoli rohanta hita, umbalga do Debata sian rohanta jala diboto saluhutna. Gotaphon nuaeng sian roham, mandok: nunga sidung be naung salpu i. Asa beha? Asa marhiras ni roha hita maradophon Debata (ay. 21).

Contoh: Petrus na pola sahat tu tolu hali mansoadahon Jesus. Alai di ujungna gabe marhiras ni roha do ibana mambaritahon hasintongan ni Kristus.

Antong aha do na ringkot siputihonta sian jamita on:

Naparjolo: unang ma hatanta dohot dilanta mangkaholongi; naeng ma marhitehite pambahenan dohot hasintongan. Na malo mandok songon on: tumagon do sada pambahenan na denggan martimbangkon saribu hata-na deak. Boi do marribu hata haruar sian pamangan, jala mansai mura do manghatahon holong. I do umbahen didok di 1 Korint 13:1 Tung sura huhatahon angka parhataan ni jolma nang surusuruan pe, anggo so parholong ni roha ahu, naung songon hangsa do ahu na mangkulingkuling jala songon ogung na maruolol. Ala ni i, naeng ma sude hita ruas ni HKBP Cinta Dame on, siulahon holong ni roha marhite pambahenan na denggan.

Napaduahon: Molo nunga masihaholongan hita, jumpang ma hata na mandok: “manang aha pe na tapangido, jaloonta do sian Ibana”. Ai masiurupan ma na sada dompak na sada. Galatia 6:2 mandok: Masiurupan ma hamu mamorsan angka na dokdok i; i ma dalan mangaradoti patik ni Kristus. Pangurupion ni Jesus, patar ma i nang sian angka dongan na masihaholongan i.

Napatoluhon: unang pola tagam balos ni na denggan naung taulahon. Jala unang sumurut mangulahon holong ni roha. Mateus 6:3 mandok: Asa jumpa dilehon ho asiasi, unang ma pola diboto tanganmu sihambirang na nilehon ni tanganmu siamun. Na marlapatan: ndang pola paboaboaon angka ulaonta be na denggan i. Diboto Tuhan i do i. Manang sadia godang pe naung tapatupa angka na denggan, unang pola bilangi i, jala unang pola tengahon i di jolo ni angka dongan.

Napaopathon: Pos ma rohanta jala unang be ganggu mangulahon na denggan i. Ai pargogoan ni Tuhan i do hita laho patupahon i. Boasa pargogoanNa? Siradoti patikna, i do na mian di bagasan Ibana jala Debata di bagasan ibana. Jadi “sumber” ni hagogoonta laho mangulahon holong i, i ma Debata di bagasan Jesus. Sumber ni ranting hau anggur gabe marparbue, i ma sian bonana. Hita pe, marparbue na denggan ma ala sian Jesus do haroroanna. Ala ni i, marhiras ni roha ma hita mandapothon Debata. Amen.