SERMON 1 PETRUS 2 : 4 - 10

SERMON PARHALADO

HKBP RESORT SION NAULI DISTRIK XXVI LABUHANBATU

Jamita tu Minggu, 14 Mei 2017 (Minggu Kantate)

1 PETRUS 2 : 4 - 10

Topik: Bangso na pinillit jala arga di Debata.

2:4 Ai nunga didapothon hamu Ibana, na songon batu na mangolu, na binolongkon ni jolma; alai na pinillit jala na arga, ia di Debata.

2:5 Sai olo ma nang hamu paulion, songon angka batu na mangolu, gabe bagas partondion jala hamalimon na badia, laho mamboan angka pelean partondion, halomoan ni roha ni Debata, marhitehite Jesus Kristus.

2:6 Ai na tarsurat do di Surat i: "Hupeakhon do di bagasan Sion sada batu parsuhi, na marpili jala na arga; ndang na tarila na porsea di Ibana!"

2:7 Arga do Ibana di hamu, angka na porsea; alai di angka na so porsea i: Batu na binolongkon ni angka pande bagas i, i ma gabe batu parsuhi,

2:8  jala gabe batu partuktuhan jala batu pargasipan. Ai na tartuktuk do nasida disi, ala so dihaporseai nasida hata i; ai tusi do nasida dipadiri.

2:9 Alai marga na pinillit do hamu, hamalimon na raja, bangso na badia, houm na ginomgomanna, asa tung dibaritahon hamu denggan ni harohaon ni Ibana, naung manjou hamu sian na holom tu hatiuronna halongangan i.

2:10 Hamu, angka na so bangso najolo, gabe bangso ni Debata nuaeng; angka na so niasian hamu najolo, gabe niasian do nuaeng.

Patujolo.

Surat ni apostel Petrus na parjolo ditongos tu huria manang halak Kristen na adong di luat Pontus, Galatia, Kappadokia, Asia na metmet dohot Britinia (1:1). Hira siotik partubu jala bilangan na metmet do halak Kristen di tongatonga ni huta na ginoaran di ginjang i, i ma angka luat ni pardebata sileban dohot sipelebegu. Godang jala jotjot do ditaon angka na porsea i haporsukon, dilele, dipaporsukporsuk, diuhum marutang hosa atik pe so haru adong salana. Ndada apala panggomgomi na patupa haporsukon i tu nasida. Tarida do i sian sosososo ni apostel asa unduk tu panggomgomi nang angka sitiop huaso. Alai na manusai nasida i ma angka parugamo na asing, angka sipelebegu. Nasida ma na mangotapi angka na porsea tu Jesus Kristus patupa partangiangan, patupa pamujion dohot parsombaon tu Debata.

Na ro do haporsukon i tu angka siihuthon Kristus marhite pambahenan ni angka sipelebegu i. Disura roha, umbahen na masa i, ala dipinsang halak Kristen angka parsipelebegu i, ala so marlapatan parsombaon nasida. Ala halak Kristen i, halak na ro do tu luat i, gabe dirajumi pangisi ni huta i ma na panusai nasida di tongatonga ni huta i. I do umbahen na dipalumbahon apostel Petrus asa marparange na denggan nasida di tongatonga ni angka parbegu i, martimbangkon maminsang pangalaho nasida (2:12). Porsuk do ditaon halak Kristen ala ni panindangion di haporseaon tu Jesus. Godang do na mate martyr, na mate hona uhum ala ni haporseaonna be. Alai laos godang do na marbalik, na olo manundalhon naung hinaporseaanna i. I ma lomos ni roha ni apostel Petrus umbahen na ditongos ibana suratna on. Disosoi do huria i di na nidokna: Ai tagonan do, hamu manaon haporsuhon ala ni ulaon na denggan, molo tung i lomo ni roha ni Debata; unang ma ala ni ulaon na roa (3:17, pat 3:14, 2:20). Marhite pangantusion sisongon i ma disosohon apostel Petrus, asa hot di bagasan haporseaon tu Jesus Kristus. Songon Jesus na gabe pangoloi di parsuru ni Debata, songon i ma nang halak Kristen, na gabe pangoloi, songon batu na mangolu, asa gabe sitindangi di haluaon na pinatupa ni Jesus Kristus.

Hatorangan.

- Jesus Kristus do batu na tarpillit.

Digombarhon apostel Petrus do pangoloion ni Jesus di parsuruon ni Debata songon batu na mangolu. Marharoroan sian na pajongjong bagas di masa ni apostel Petrus do lapathonon batu na mangolu i. Ianggo najolo, jala jumpang dope i sahat tu tingki on, molo pajongjong bagas halak Israel, nang bangso na humaliangsa, sian batu do sude ugasanna. Sian batu do na gabe tiangna, sian batu do na gabe ojakan ni tiang parsuhi, na manea dokdok ni tarupna. Asa hira so adong do pola dipangke hau. Ndang pola masa marbungkulan songon jabu na di hita on. Pande bagas i do na mamillit batu manang na tu dia jala tu aha peakhononna. Manang na gabe batu parsuhi, manang na gabe batu tu tiang, manang na gabe dorpi, manang na gabe tarup. Pande bagas i do na umbotosa hinadenggan ni batu i, jala manontuhon hainadenggan ni hapeakanna. Molo dipillit pande bagas i sada batu na gabe pardorpian, tung so boi do batu i manulak pamilliton ni pande bagas i. Tung sura dipillit sada batu sipeakhonon gabe batu parsuhi, so boi manjua batu i. Asa, pangoloi do sude batu tu pameakhonon ni pande bagas i.

Jesus Kristus do batu na mangolu i, na binolongkon ni jolma, alai na pinillit jala na arga di Debata, ai Ibana do pande bagas i (ay. 4). Nunga dipillit Debata hian Jesus Kristus sian mulana andorang so ojak dope tano on (Jes 28:16,  Joh 1:1-3, Kol 1:16-17). Na ro do Jesus Kristus tu portibi on, tu na di Ibana hian, alai ndang ditanda portibi on Ibana (Joh 1:10-11). Songon batu na binolongkon do Ibana, hape batu na tarpillit do, na pinillit ni Debata, jala na gabe batu parsuhi. Asa nang so diargahon portibi on Ibana, arga do ianggo di Debata. Ibana do batu ojakan ni haporseaon na mamboan jolma pardosa tu haluaon. I do umbahen didok: "Hupeakhon do di bagasan Sion sada batu parsuhi, na marpili jala na arga; ndang na tarila na porsea di Ibana!" Batu parsuhi i, i ma Jesus sandiri, naung leleng dipaimaima harorona (ay. 6).

Pangoloion ni Jesus Kristus tu Debata Ama na marsuru Ibana tu hasiangan on, i do na gabe ojakan ni pangoloion ni ganup na porsea. Asa manang ise na gabe siihuthon Jesus Kristus ingkon gabe pangoloi ibana tu Jesus Kristus di ganup tingki, di las ni roha nang di arsak ni roha. Songon Kristus na gabe pangoloi manaon haporsukon, na hansit, na pola ingkon mate tarsilang, naeng songon i ma halak Kristen mangoloi huhut mangihuthon Ibana. I do umbahen na didok Jesus: nasa na giot mangihuthon Ahu, disoadahon ma dirina, diporsan ma silang na tu ibana, diihuthon ma Ahu (Mat 16:24). Alai ndang dipasombu Jesus Kristus hita soratan manuhuk silang na ampe tu hita. Dijou do angka na porsea asa ro tu Ibana: ro ma hamu tu Ahu (Mat 11:28-30).

Gabe batu na mangolu ma hamu.

Sai olo ma nang hamu paulion, songon angka batu na mangolu (ay. 5). Saluhut halak Kristen, marsadasada, keluarga nang hatopan, tarjou do songon batu na mangolu di jolo ni Tuhan Jesus Kristus. “Batu na mangolu” (figuratif) taringot tu pangalaho ni jolma, pangoloionna dohot haundukonna tu parsuruon ni Debata marhitehite Jesus Kristus. Dijou jala dipillit Jesus Kristus do hita tu ganup panghobasion, hombar tu ulaon naung ampe tu hita (Joh 15:16). Ala Debata marhite Jesus Kristus do na marsuru hita, haposan do Ibana di parsuruonNa i. Jaloonta do gogo dohot huaso mangula ulaon na pinasahatNa tu hita (pat. Luk. 10:16). Ala ni tama do ingkon pangoloi hita tu Ibana na marsuru hita. Songon angka batu na mangolu i, marragam do na boi haporluonna, hagunaanna dohot ingananna. Alai pande bagas i do na manontuhonsa manang tu dia jala manang gabe aha guna ni batu i. Na so boi manjua ibana, jala na so tupa manulak hapeakanna naung ditipakhon tu ibana. Ai Debata marhite Jesus Kristus do na manjou, mamillit dohot marsuru tu sada ulaon. Ala ni i, na so tupa hita manjua tu parsuruon ni Jesus Kristus na sahat tu hita be.

Ganup halak Kristen ingkon gabe batu na mangolu, bagas partondion, hamalimon na badia. Ndada holan ngolu pardagingon ngolu ni angka na porsea, alai huhut do ngolu partondion. Marhite ngolu partondion i do boi jumpang bagas joro ni Debata di ngolu ni sadasada halak. Ai gabe inganan mangido huhut manjalo pasupasu, inganan pasahat pamujion tu Debata. Ndada holan i tahe, na boi do ngolu ni jolma i gabe langgatan hamalimon pasahat pelean na hushus tu Debata. I ma ngolu ni jolma na tau halomoan ni Debata marhitehite Jesus Kristus.

Jesus Kristus do na patupa ngolu ni jolma gabe bagas partondion. Ibana do batu parsuhi na tarpillit jala na arga. Atik pe batu naung dibolongkon Ibana, alai gabe batu partuktukan ma i ala ndang olo nasida manjangkonsa (ay. 8). Alai gabe batu na arga ma i di angka na porsea i. Ai holan marhite Jesus Kristus do umbahen na boi hita gabe sijalo haluaon. Arga do Ibana di hita ala Ibana do na humongkop hita. Ala arga do Ibana, laos dohot ma hita arga, ala arga do hita ditobus, ai pola marsitaonon, mate tarsilang Ibana holan humongkop hita jolma pardosa (ay. 7. Pat 1 Kor 6:20).

Marga na pinillit do hamu (ay. 9a).

Ditongos do surat 1 Petrus on tu na 12 marga ni halak Israel, angka naung porsea di Jesus Kristus, na tongon marserak (diaspora) di luat Asia na metmet i. Ndada ala hinabalga manang ala denggan ni parange umbahen na dipillit Debata na 12 marga i, alai ala asi dohot holong ni rohaNa do jala hot Debata manggoki padan naung niuarihonNa i maradophon ompunasida si Abraham. Ianggo sian pangalaho ni bangso Israel di Padan Narobi, tangkas do bangso na tangkang roha jala parungutungut. Alai dipillit Debata do bangso i gabe bangso haholongan ni rohaNa. Songon i do nang ngolu ni halak Kristen. Ndada sian dirinta umbahen na dipillit, alai ala ni holong ni Debata marhite Jesus, dipillit ma hita gabe angka siseanNa (Joh 15:16).

Hamalimon na raja (ay. 9b).

Nang pe di bagasan haporsukon godang halak Kristen i di jamita on, dipaingot apostel Petrus do nasida asa tongtong mangolu di bagasan habadiaon jala mangarajai diri, asa unang mangihut tu harorangon ni portibi on (pat. 2 Musa 19:6). Ringkot situtu parange na badia, ndada na pabadiabadiahon. Alai, ala Debata sandiri do na mamillit, jala ala Badia do Debata, ingkon badia ma parange ni na pinillitNa (3 Musa 19:2).  Sian i taida, ia hamalimon i ndada holan manggombarhon marsasahalak, alai tung saluhut do. Manang ise na porsea di Debata jala rade mangihuthon na nidokNa, nunga bongot ibana tu harajaon malimmalim. Ndada sian hajolmaon haroro ni harajaon i, alai ulaon ni Debata sandiri do pajongjongkonsa marhite Jesus Kristus. Alai diigil do sian jolma i, asa rade paulion (ay. 5) songon angka batu na mangolu.

Houm na ginomgoman (ay. 9c).

Ndada holan parnampuna sambing Debata, alai sahat do tu na ginomgomanNa. Di bagasan parungkilon pe, hot do Debata mangaramoti. I ma na papos roha ni halak Kristen diaspora (pangaranto) i asa hot di haporseonna tu Tuhan Jesus Kristus. Ndada na dipasombu Debata nasida, alai laos dohot do Debata manghilalahon nasa haporsukon ni na porsea i.

Asa tung dibaritahon hamu denggan ni harohaon ni Ibana (ay.  9d).

Ala nunga dipillit na porsea i gabe angka siseanNa (hamalimon na raja), tontu adong ma siulaonna, i ma: mambaritahon  denggan ni harohaon ni Debata.  Dia ma huroha i? I ma ala mulak rohaNa sian rimas tu asi ni roha. Uju parpiar ni murukNa, digoar do bangso i: Lo-ruhama lapatanna Nai sohinasian, ala ndang marpamuati be roha ni Debata, dohot Lo-ami lapatanna na so bangsongKu. Alai nuaeng, ala ni holong ni roha ni Debata, mulak do rohaNa, marhite na manongos AnakNa Jesus Kristus na mangalehon hosaNa. I do umbahen didok: Hamu, angka na so bangso najolo, gabe bangso ni Debata nuaeng; angka na so niasian hamu najolo, gabe niasian do nuaeng, ay 10.

Hahonaan tu jamita:

- Nunga 156 taon be HKBP jongjong manghobasi sian asi ni roha ni Debata. Sian haholomon do ngolu ni halak Batak tarjou, ala toropan do hasipelebeguon diula. Dijou jala dipillit Debata ma bangso Batak marhite angka Missionaris. Sian haholomon tu hatiuron, sian hadosaon tu habadiaon, sian hatoban ni dosa tu naposo ni Debata. Taparhatopot jala tahangoluhon ma hadirionta naung dipillit jala diparbadiai Debata.

- Jesus Kristus do batu ojakan, batu na pinillit ni Debata jala na arga bahen haluaon ni hajolmaon. Ingkon ingoton ni hita jolma do i. atik pe godang ugamo, torop na mangalehon ojakan marhite pingkiran manang habisukon hajolmaon, alai ndang boi singkaton ni i  Jesus Kristus songon batu ojakan ni haporseaonta. Sala mandasor sega ma luhutan. Sala mamangke ojakan ni haporseaon, sursar ma hangoluan. Unang ma adong sian halak Kristen na so tangkas umbotosa ojakan ni haporseaonna.

- Gabe batu na mangolu do sude halak Kristen, siihuthon Kristus. Na marsitutu mangula ulaon na sahat tu ibana, na rade manjalo panjouon ni Debata. Ndang tarila nasa na porsea tu Jesus Kristus. Alai baliksa, ganup halak na manjua mangoloi panjouon ni Kristus, sai na tartuktuk do nasida. Ala ni, molo nunga dijalo ulaon (tohonan) unang ma gabe partuktukan i ala so marsitutu mangula ulaonna. Unang gabe sihataan, jala gabe ro ma hailaon.

- Ala di hasiangan on dope hita, na boi masa do parungkilon, masa hasusaan, jala masa haporsukon tu ngolu ni halak na porsea di Jesus Kristus. Alai ndang pola sihabiaran be i, ala nunga ditaluhon Jesus i sude. Gariada tahe, lam hatindangkononta ma: marhite haporsukon i do adong habengeton na manghorhon hatauon, asa patubu panghirimon di haluaon na sian Jesus Kristus.

- Hot ma hita mian di ojakan na sasada i, i ma Jesus Kristus. Unang olo tarela tarboanboan tu ojakan na asing. Ai Jesus Kristus do ojakan na tutu. Dungkon ni, ndang adong manang aha dohot manang ise na tau ojakan ni ngolunta nang haporseaonta. Amen.

(Pdt. W. M. Hutapea).