1 MUSA 17 : 1 - 7, 15 - 16

1 MUSA 17 : 1 – 7, 15 – 16

(ABRAM – ABRAHAM & SARAI – SARAH)

17:1   Jadi dung marumur siapulu sia (99) taon si Abram, diida ma ro Jahowa na mandok tu ibana: Ahu do Debata, na sun hinagogo; sai marparange di jolongku ma ho, jala daulat roham!

17:2 Asa hupahot padanhu dohot ho, jala hupatorop situtu ho.

17:3  Jadi manungkap ma si Abram. Dung i mangkatai Debata muse dohot ibana:

17:4 Ianggo Ahu, ida ma, nunga hot padanhu dohot ho, jala torop angka bangso marompu tu ho sogot.

17:5 Ala ni ndang be si Abram goarmu dohonon, si Abraham ma goarmu, ai nunga hupabangkit ho gabe ompu ni torop angka bangso.

17:6 Jala sopar situtu ho tumpahanku, jala pabangkitonku ho gabe ompu parsadaan ni angka bangso, jala marroan sian ho angka raja.

17:7 Sai pahotonku do padanhu tu ho dohot tu pinomparmu sogot marsundutsundut, gabe padan salelenglelengna, paboa Ahu gabe Debatam dohot Debata ni pinomparmu sogot.

17:15 Dung i didok Debata muse tu si Abraham: Ndang be si Sarai dohononmu goar ni jolmam, si Sarah ma goarna.

17:16 Ai pasupasuonku ibana, jala lehononku ma di ho anak sada nang sian ibana, jala pasupasuonku ibana gabe angka bangso; gari raja ni angka bangso marroan sian ibana sogot.

Huria ni Tuhanta...

Di tingki margoar ABRAM dope, ndang adong pola dibaritahon di Bibel i songon dia pangalaho ni si Abram on (manang na jungkat, manang na burju). Alai nunga tibu diparade Debata hian si Abram dapotan baga-baga, paboa torop ma pomparanna muse, jala tardok ma ibana gabe ompu ni angka na porsea. Didok Debata ma tu si Abram (blm Abraham): bungkas ma ho sian tano hagodanganmu, dohot sian hatubuanmu, dohot sian bagas ni amam, tu tano sipatuduhononku tu ho.

Adong tolu jumpang hita “hahomion/rahasia” sian pandokan on:

-    Hahomion naparjolo: “ndang dipabotohon Debata tu dia do si Abram bungkas” (tano sitopoton i?).

-       Hahomion napaduahon: “ndang manjua manang marungut-ungut si Abram”, di parsuruon ni Jahowa, ala mardomu muse nunga marumur 75 taon si Abram di na jinalona hata i. Umur 75 taon, nunga tardok be i naung matua. (Adong do hita nuaeng on na marumur 75 taon? / 1 Musa 12 : 4b).

-     Hahomion npatoluhon: behenonku ma ho matorop mabue, sopar ma pomparanmu songon torop ni rihit na di topi ni laut. Hape, sahat tu na marumur 75 taon si Abram di na bungkas i nasida, so adong dope dakdanak, ala na hol (mandul) do si Sarai.

Borhat ma si Abram, rap dohot pardihutana si Sarai, rap dohot si Lot, anak ni hahana i, tu huta na margoar HARAN (i ma huta na parjolo ditopot nasida). Dung piga-piga leleng nasida tinggal di huta Haran, mamora ma si Abram. Dungkon ni i, pinda huta ma muse nasida tu Kanaan, alai diboan si Abram ma nang angka hatobanna i sahat tu huta Kanaan.

Dung piga-piga leleng nasida tinggal di huta Kanaan, masa ma haleon (kelaparan), gabe ingkon pinda ma muse si Abram dohot keluargana tu Mesir. Di Mesir pe, tong do mamora si Abram.

Dung piga-piga leleng ibana di Mesir, mulak do muse si Abram tu tano Kanaan, alai marsirang ma si Abram dohot si Lot anak ni hahana i. Tinggal ma si Abram di Kanaan, alai anggo si Lot marhuta ma di Sodom. Rap mamora do halak i di ingananna be.

Olat ni i, ndang dope mardakdanak si Abram, ala na hol do si Sarai, pardihutana i. Nang pe songon i, sai tongtong do didok Debata tu si Abram “pahotonku do padanKu dompak ho, mardakdanak do ho, jala torop ma pinomparmu”.

Nuaeng, sahat ma tu jamita on. Di turpuk on, umur ni si Abram 99 taon ma (ay. 1), jala umur si Sarai 89 taon (bnd. 1 Musa 17:17 Tung tubuan anak ma jolma sisaratus taon jala manubuhon ma tagamon si Sarah, na marumur siapulu taon). (Nga “keriput” be halakon nadua, ndang adong be gogona).

Ro ma muse hata ni Debata tu si Abram, mandok: pahotonku ma padanHu dohot ho. Marparange ma ho di jolongku jala daulat roham.

Aha do reaksi naparjolo na pinatuduhon ni si Abram: muruk do ibana? Manang mandele do si Abram ala mamungka sian umur 75 taon ma sai dipetubegehon Debata hata i?

Tongtong do serep roha ni si Abram, pola sahat tu na manungkap ibana (ay.3).

Ndang be si ABRAM goarmu, alai muba ma gabe ABRAHAM, na marlapatan: Ompu ni torop angka na porsea. Jala ndang be SARAI goar ni pardihutam, alai muba ma gabe SARAH, lapatanna “pasupasuonKu ma ibana”. (Taon na ro songon on, tubuan anak ma si Sarah, jala bahen ma goarna si Isak, 1 Musa 18:18). Ise na so mengkel molo adong sahalak ina marumur 90 taon tubu-tubuan?

Huria ni Tuhanta...

Pasti do gumodang laho pingkiranta tu si Sarah ala manubuhon anak ibana dung matua.

Alai adong do na ummarga sian ni na ingkon hangoluhononta di bagasan haporseaon:

Naparjolo: didok Debata tu si Abram: bungkas ma ho sian tano hagodanganmu, dohot sian hatubuanmu, dohot sian bagas ni amam, tu tano sipatuduhononku tu ho.

Ndang diboto si Abraham huta situjuon i, jala ndang diboto muse aha na naeng masa di jolo an. Alai mansai hibul do rohana mangoloi parsuruon ni Jahowa, jala pos rohana na ramotan ni Jahowa do ngoluna nang keluargana.

Nuaeng, molo tapahombar i tu ngolunta marsada-sada: ndang itaboto aha na naeng masa di jolo an di ganup pardalanan ni ngolunta nang rumah-tangganta be. Boi do hita songon si Abraham na pos rohanta di pangaramotion ni Debata? Pos do rohanta nuaeng na mar-Tuhan on. Apakah kita betul-betul percaya akan penyertaan Tuhan? Yakinkah kita kalau Tuhan selalu melindungi?

Napaduahon: “ndang manjua manang marungut-ungut si Abram”, di parsuruon ni Jahowa, ala mardomu muse nunga marumur 75 taon si Abram di na jinalona hata i. Molo tapahombar i tu ngolunta: manjua do hita di ganup parsuruon ni Debata. Apakah kita selalu menolak atau menyangkal perintah Tuhan? Lumobi di hita parhalado: sudahkah kita betul-betul tanggung jawab atas tohonan yang kita terima masing-masing. Hibul do rohanta mandalanhon i, manang sai manjua dope hita? Ringkot do on pasungkunhononta tu ganup dirinta be, ruas nang parhaldo.

Molo ruas ibana, itasungkun ma jo rohanta be “adong do ungut-ungut di hita di na mar-Tuhan on? Molo so pintor dipasahat Jahowa pangidoanta nang pangkirimonta, pintor mandele do hita? Adakah Abraham juga kehilangan harapan ketika dia harus memiliki anak pada saat dia berusia 100 tahun? Ndang na mandok asa sude hita mardakdanak di umur 100 taon. Aha be gogo?

Napatoluhon: behenonku ma ho matorop mabue, sopar ma pomparanmu songon torop ni rihit na di topi ni laut. Sarah melahirkan Isak pada umur 90 tahun. Sasintongna, itabayangkon jo hansit ni na tinaon ni si Sarah on. Ingkon dung matua ma ibana hape asa tubuan anak, jala gabe siparengkelon ma i. Alai na rumingkot naeng botoonta sian na masa i, i ma: ndang adong na so tarpatupa Debata. Suhar sian pingkiranta, tuk do i dipatupa Debata, ala Debata na sun hinagogo do Ibana (ay. 1). Sian na hol alai gabe sopar pomparan ni si Abraham. I do umbahen na didok si Abraham ompu ni na porsea ala ndang adong sian pamanganna haruar hata na mandok “ndang toho i Tuhan”.

Napaopathon, na mansai ringkot hangoluhononta tarlumobi di ngolu parrumah-tanggaon, i ma; sahat tu na matua, ndang adong sangkap ni si Abraham manirangkon si Sarah ala leleng jumpang di nasida haroro ni dakdanak. Hape mansai ringkot do di halak Jahudi hasosorang ni dakdanak lumobi baoa. Sadia leleng ma si Abraham dohot si Sarah mangkirim asa jumpang nian na sinangkapan. Alai sabar do nasida paimahon harorona. Martingki be do sude na di tano on.

Mansai ringkot ma di hita tutu hasadaon ni parrumah-tanggaon, nang pe so ingkon dipasahat Debata dakdanak. Na so jadi sirang, ia so sinirang ni hamatean. Molo itajaha 1 Musa 23:19 “Dung i ditanom si Abraham ma si Sarah, jolmana i tu liang ni hauma Makpelah, tondong ni Mamre, i ma Hebron na di tano Kanaan”. Na marlapatan, setia do si Abraham sahat ro di hamatean na manirang nasida.

I ma na gabe sorminan di hita lumobi di angka na naeng marrumah-tangga dohot angka na markeluarga. Tongtong mangolu jala mardalan di bagasan hasadaon. Amen.