1 Musa 1 : 1 - 2, 4a

1 MUSA 1 : 1 - 2, 4a

1:1    Di mula ni mulana ditompa Debata, langit dohot tano on.

1:2  Dung i tarulang ma tano i gabe halongonan jala holom di atas lung i, dung i mangareapreap ma Tondi ni Debata di atas ni angka aek.

1:4a Nunga denggan na tiur  i diida Debata.

Huria ni Tuhanta…Dua na mansai ringkot sian jamita on na tinompa ni Debata, i ma langit dohot tano. Boasa langit jumolo ditompa martimbangkon tano? Pangantusion ni halak Israel, langit / banua ginjang, i ma inganan na so hajalahan, na so hasuhatan dohot na so tardodo. Dao umbidang langit sian tano / portibi. Jala mansai margantung do tano on tu na adong di langit (mata hari, ombun nang udan).

Ro mata ni ari, martubuan ma ragam ni suan-suanan.

Ro ombun, luminggom ma tano on.

Ro udan, martubuan muse nasa suan-suanan.

I do pataridahon, tung mansai ringkot (bergantung) do tano on tu langit. Alai, Pangantusion napaduahon, i ma pangantusion partondion. Llangit i ma inganan ni Debata. Torop do tarsurat di Bibel i na paboahon langit i ma inganan ni Debata (surgo). Molo dijaha di bahasa Inggris, didok ma: In the beginning, God created the heaven and the earth. Jadi, dilapati halak Jahudi do langit i ma inganan ni Debata.

Contoh: uju naeng ditampul si Abraham anakna si Isak, dua hali mangkuling suru-suruan ni Debata sian langit (surgo).

Contoh na asing: uju tardidi Jesus di sunge Jordan, ungkap ma langit (surgo), jadi ro ma suman tu darapati, jala songgop tu Jesus.

Contoh na asing muse: uju naeng tos hosaNa di silang i, manaili ma Jesus tu ginjang /langit, jadi didok Jesus ma: Ale Amang, tu bagasan tanganMu ma hupasahat tondingKu. I do manggombarhon, paboa langit i ma inganan parmianan ni Debata.

Jadi unang jo pintor tabahen di pingkiranta, paboa di mula-mulana, dipatupa ma langit dung i tano. Lapatan ni mula-mulana disi, songon patujolo ni sude na masa na tarsurat di Bibel i do. Tarsongon na manjaha buku / novel, adong ringkasan ni saluhut cerita i.

Jadi, jamita on (khusus ayat 1), i ma na gabe parmulaan ni saluhut panompaon ni Debata sian ari parjolo sahat tu ari paonomhon. Di langit dipatupa Debata ma nasa matani ari, bulan nang bintang, jala di tano dipatupa Debata ma nasa suan-suanan, binatang di darat, binatang di aek, dohot jolma.

Nuaeng, huboan ma jo pingkiranta: berimajinasi (membayangkan) panompaon on. Di mula ni mulana ditompa Debata, langit dohot tano on. Di dia do tano i? Hape molo tajaha muse tu ayat 2: Dung i tarulang ma tano i gabe halongonan jala holom di atas lung i, dung i mangareapreap ma Tondi ni Debata di atas ni angka aek.

Boi do gabe “bingung” hita padomuhon ayat 1 tu ayat 2. Ala di ayat 1 nunga adong tano, hape di ayat 2 ndang tarida dope tano i, ala tarulang / belum berbentuk. I ma nangkin na nidok i: ayat 1, i ma na gabe parmulaan (kata pembuka) ni saluhut panompaon ni Debata sian ari parjolo sahat tu ari paonomhon

HAD…hata “tarulang” disi, unang jo talapati songon tano na rambaon. Alai, lapatan ni na tarulang, i ma: ndang adong dope bentuk, kosong dope jala golap / mangholom dope. Molo di bagasan na holom, ndang adong disi hangoluan. Ai haholomon, i ma gombaran ni hamatean jala hatiuron i ma gombaran ni hangoluan.

Mangareap-reap ma ninna Tondi ni Debata di atas ni aek. Disirang Debata ma aek i gabe dua inganan. Sada ma i aek na ni langit, jala na paduahon aek na di tano. Dung i muse, aek na di tano i, dibahen ma tu sada inganan, digoar ma i laut. Alai goar ni na mahiang i ma tano: na gabe inganan ni jolma dohot binatang na marhosa sian igungna.

Asa, adong hangoluan, dipatupa Debata ma na tiur. Na tiur di portibi on, i ma mata ni ari. Ala ni mata ni ari, martubuan ma suan-suanan. Asa boi dipangan nasa binatang, ala bulung dohot parbue ni suan-suanan do dipangan nasa binatang nang jolma parjolona i, andorang so madabu jolma tu dosa. Jadi mansai manontuhon do guna ni na tiur. Na tiur i do hangoluan.

HAD…adong tano dohot pangisina, adong langit dohot pangisina. Boi do gabe “longang-tarhalomong” hita marnida nasa na tinompa on? Halongangan na parjolo, i ma: di dia do hapeakan ni tano on? Halongangan na paduahon: marjuta angka “benda di angkasa”. Halongangan na mangihut, i ma: mansai uli saluhut nasa na tinompa.

I do na pataridahon habalgaon ni Debata: sipanompa sian na so adong, gabe adong. Silehon hangoluan dohot hatiuron. Ndang diloas Debata haholomon i tongtong mangalinggomi tano on. Alai dilehon do hatiuron, na gabe panondang.

Nuaeng pe, idaonta ma muse di ngolunta on. Sasintongna, nunga dipataridahon Debata marhite ayat jamita on, na mansai ringkot do hatiuron di haholomon na di portibi on. Ala di panompaon i pa nunga adong han Jesus. Botul do i?

Antong, tarata-ratai ma muse parbinotoanta: Jaha Johannes 1 : 1 - 4 + 14.

1:1 Di mulana i nunga adong Hata i jala saor tu Debata do Hata i jala Debata do Hata i.

1:2 I ma na saor tu Debata di mulana i.

1:3 Saluhutna i marhite sian Hata i do, umbahen na manjadi; jala ndang adong nanggo sada sian naung jadi i, na so marhite sian I.

1:4 Di bagasan Hata i do hangoluan; laos hangoluan i do Panondang ni hajolmaon.

1:5 Na marsinondang do Panondang i di bagasan na holom, alai ndang dijangkon na holom i.

Tapahombar ma muse tu jamita on:

1:1    Di mula ni mulana ditompa Debata, langit dohot tano on (marhite Hata i).

1:2    Dung i tarulang ma tano i gabe halongonan jala holom di atas lung i, dung i mangareapreap ma Tondi ni Debata di atas ni angka aek.

1:4a Nunga denggan na tiur  i diida Debata.

Molo mata ni ari na gabe panondang di haholomon ni portibi on, Jesus ma na gabe Panondang di haporseaonta nang partondionta be. Di bagasan na tiur, adong ma hangoluan ala martubuan ma suan-suanan. Di bagasan Jesus na gabe panondang (hatiuron) adong ma hangoluanta. Johannes 12:46 12:46 Ahu do Panondang na ro tu portibi on, asa unang mian di na holom nasa na porsea di Ahu.

Ai molo mian hita di na holom, mate do hita. Ala na holom, i ma gombaran ni hajahaton, huaso ni siolis nang dosa. Alai di bagasan Jesus, jumpang ma hangoluanta, ala Ibana do hatiuron. Jadi mansai denggan do na tiur i.

Ala ni, diarahon jamita on do hita asa sai mian di nasa hatiuron, marhite ulaon na denggan. Unang gabe tarulang muse haporseaonta molo mulak hita tu na holom, asa unang rambaon.

Boasa ro Jesus tu portibi on? Ala holom do sude na di portibi on.

“Holom” gumodang do i martudu-tudu tu ragam ni pangalaho hajahaton dohot hadosaon. Ai dihorhon dosa i do hamatean (Rom 6:23 “Ai upa tinuhor ni dosa do hamatean”).

Jadi dos do hamatean tu haholomon. Secara sederhana, beha ma pangkorhonna molo torus holom portibi on, manang mate arus........ Boi do sungkot mardalan ujungna gabe tinggang, atau tidak ada kehidupan tanpa matahari/panondang.

I ma contoh sederhana na boi langsung itahilala. Gombaran songon i ma na pinatuduhon ni turpuk on, paboa ro do Jesus na gabe Panondang, mamboan hatiuron, manondangi ngolunta na di haholomon, asa tiur jala dapotan hangoluan hita (Joh. 8:12 >Dung i diulahi Jesus muse manjamitai nasida, ninna ma: Ahu do Panondang ni portibi on. Na so tupa mardalan di na holom na mangihuthon Ahu; di ibana do tahe Panondang hangoluan.

Jadi ro ma Ibana tu portibi on mamboan sondang dohot hangoluan, asa mangolu hita jala taboto marpangalaho na denggan. Ai jolma na di bagasan haholomon, dos do i songon na mapitung, jala jolma na sai di bagasan na holom, dos do i tu naung mate tondina.

Asa unang mapitung mata ni haporseaonta be, ro ma Jesus mamboan hatiuron. Asa unang mate hita na di haholomon on, ro ma Jesus mamboan hangoluan (Joh. 14:6 >Ahu do dalan i dohot hasintongan dohot hangoluan. Ndang adong na sahat tu Ama i, ia so marhite sian Ahu.

Maka hadirnya Yesus membawa terang ke dunia ini, untuk menjadikan manusia yang percaya kepadanya menjadi anak-anak terang (Mateus 5:14 Hamu do panondang ni portibi on – Kamu adalah terang dunia).

Tentu kalau seseorang sudah dijadikan Tuhan menjadi anak-anak terang, maka perilakunya juga harus mencerminkan anak-terang, bukan lagi perilaku dosa, kejahatan dan kuasa kegelapan. Karena terang dan gelap tidaklah mungkin bersatu.

Tontu angka jolma (hita) naung dipillit Debata gabe panondang ni portibi on, gabe angka siboan hatiuron ma. Ndang adong be nian jumpang disi pangalaho harorangan. Molo najolo hita sai marpangalaho haholomon, nuaeng ingkon marpangalaho hatiuron ma hita dung ro Jesus. Ingkon adong do perubahan tu na denggan. Amen.