1 MUSA 15 : 1 - 12, 17 - 18

1 Musa 15 : 1 – 12, 17 – 18 

15:1   Dung salpu angka jamita ondeng ro ma hata ni Jahowa tu si Abram marhitehite alatan, ninna ma: Unang ho mabiar ale Abram. Ahu do lombulombum, upam mansai balga.

15:2   Alai ninna si Abram ma: Oe ale Tuhan Jahowa, aha ma lehononmu di ahu? Sai na punu do ahu, si Elieser na sian Damaskus na ma sitean bagashu.

15:3   Angkup ni ninna si Abram: Ndi, ndang adong pinomparhu dilehon ho, jala ida, anak na tubu di bagasan jabungku na ma sitean ahu.

15:4   Dung i ro ma hata ni Jahowa mandok tu ibana: Ndang ibana tumean ho, na ruar sian butuham, ibana tumean ho.

15:5   Dung i ditogihon Tuhan i ibana ruar tu balian, jala ninna: Ua tailihon ma dompak langit i jala bilangi angka bintang, molo habilangan ho angka i. Dung i didok muse tu ibana: Songon i ma pinomparmu sogot.

15:6   Jadi porsea ma si Abram di Jahowa, gabe hatigoranna do i dietong Jahowa.

15:7   Dung i didok ma tu ibana: Ahu do Jahowa, na paruarhon ho sian Ur ni halak Kasdim, mangalehon tu ho tano on bahen teanteananmu.

15:8   Alai ninna si Abram ma: Ale Tuhan Jahowa, di aha ma tandaonku paboa ahu tumeansa.

15:9   Dung i ninna Tuhan i ma mandok ibana: Buat ma di Ahu sada lombu na marumur tolu taon dohot sada hambing na marumur tolu taon dohot sada birubiru tunggal na marumur tolu taon dohot anduhur sada dohot anak ni darapati sada.

15:10 Jadi diboan ma i sude di Tuhan i, angka dipardostonga ma i, dung i martoradan be ma dibahen; alai anggo pidong i ndang dibola.

15:11 Dung i marsonggopan ma angka pidong panoro tu angka juhut pelean i, alai diosikkon si Abram ma angka pidong i.

15:17 Jadi dung mate mata ni ari, jala holom marimpotimpot, ida ma, martimus ma sada pamurunan, jala disola sada sipusipu na gara holangkolang ni angka tanggotanggo.

15:18 Di ari na sasada i marpadan ma Jahowa dohot si Abram, ninna ma: Tu pinomparmu do lehononku tano on olat ni batang aek Misir sahat ro di batang aek na bolon, i ma batang aek Euprat.

Huria ni Tuhanta…Nunga hira-hira dapot hita sian turpuk on, paboa “diuji ma haporseaon ni si Abram”. Ai nunga tibu hian sai dipatubegehon Debata baga-baga i tu si Abram. Sampulu taon ma “hasurungan” ni si Abram di umur, martimbangkon inantana si Sarai. Molo 75 taon umur ni si Abram di na bungkas i nasida sian inganan hatutubuna, marumur 65 taon ma si Sarai.

(Alai marumur ma si Abraham 100 taon jala si Sarai 90 taon asa sorang si Isak). Jadi saleleng 25 taon ma sai dipaima si Abram asa tubu dakdanak di nasida.

Didok Debata ma tu si Abram (blm Abraham): bungkas ma ho sian tano hagodanganmu, dohot sian hatubuanmu, dohot sian bagas ni amam, tu tano sipatuduhononku tu ho.

Adong tolu jumpang hita “hahomion/ rahasia” sian pandokan on:

-       Hahomion naparjolo: “ndang dipabotohon Debata tu dia do si Abram bungkas” (tano sitopoton i).

-       Hahomion napaduahon: “ndang manjua manang marungut-ungut si Abram”, di parsuruon ni Jahowa, ala mardomu muse nunga marumur 75 taon si Abram di na jinalona hata i (1 Musa 12 : 4b).

-       Hahomion npatoluhon: behenonku ma ho matorop mabue, sopar ma pomparanmu songon torop ni rihit na di topi ni laut (bintang di langit, ay. 5).

Borhat ma si Abram, rap dohot pardihutana si Sarai, rap dohot si Lot, anak ni hahana i, tu huta na margoar HARAN (i ma huta na parjolo ditopot nasida). Dung piga-piga leleng nasida tinggal di huta Haran, mamora ma si Abram. Dungkon ni i, pinda huta ma muse nasida tu Kanaan, alai diboan si Abram ma nang angka hatobanna i sahat tu huta Kanaan.

Dung tinggal di huta Kanaan, masa ma haleon (kelaparan), gabe ingkon pinda ma muse si Abram dohot keluargana tu Mesir. Di Mesir pe, tong do mamora si Abram. Boasa boi mamora?

Laho manopot huta Mesir, dipaberengbereng halak Misir ma boruboru i (si Sarai), ai na uli situtu do ibana (60 thn lebih). Dijou si Firaun ma si Abram, ninna ma mandok ibana: ai ise do parompuan na binoanmi? Dialusi si Abram ma: ibotongku do i. Gabe marsangkap ma si Firaun mambuat si Sarai gabe inantana, alai dilehon ma tu si Abram angka birubiru, lombu, halode, angka naposo baoa dohot boruboru, dohot halode boruboru dohot angka unto.

Naeng dibahen si Firaun ma si Sarai gabe inantana, alai dihonahon Jahowa ma angka haporsuhon bolon tu raja Firaun dohot tu donganna sajabu ala hata ni si Sarai, jolma ni si Abram i. Jadi dijou raja Firaun ma si Abram, didok ma; dia do na binahenmi tu ahu? Boasa so dipaboa ho tu ahu jolmam ibana hape? Boasa dohononmu: Ibotongku ibana? Jadi naeng buatonku ibana bahen jolmangku. On pe, na, jolmam, buat ma, dung i laho ma ho. Dung i didokkon raja Firaun ma angka naposona bahen donganna pataruhon ibana dohot jolmana dohot sude na di ibana i.

Mulak ma muse si Abram dohot keluargana rap dohot si Lot tu tano Kanaan. Di huta Kanaan, masa ma parbadaion ni parmahan birubiru ni si Lot tu parmahan birubiru bi si Abram. Ujungna, daripada sai marsoal, manghatai ma si Abram dohot si Lot, ninna ma: pillit ma di ho inganan. Ia tu hambirang ho, tu siamun ahu; ia tu siamun ho tu hambirang ahu.

Jadi dipillit si Lot ma di ibana sude angka luat humaliang Jordan, borhat ma ibana tungkan habinsaran. Asa sirang ma nasida na marsabutuha i. Marsirang ma si Abram dohot si Lot anak ni hahana i. Tinggal ma si Abram di Kanaan, alai anggo si Lot marhuta ma di Sodom. Rap mamora do halak i di ingananna be.

Olat ni i, ndang dope mardakdanak si Abram, ala na hol do si Sarai, pardihutana i. Nang pe songon i, sai tongtong do didok Debata tu si Abram “pahotonku do padanKu dompak ho, mardakdanak do ho, jala torop ma pinomparmu”.

Huria ni Tuhanta…Leleng ni 25 taon paimahon bagabaga, boi do i mambahen jolma gabe mandele. Alai laos disi do ringkot diuji haporseaon ni si Abram.

-      Mamungka sian na borhat si Abram sian huta hatubuanna, sai didok Debata do: hubahen pe ho gabe bangso na bolon (1 Musa 12 :1).

-      Didok Debata ma muse hata i: Jala bahenonku do pinomparmu sobokkon orbuk ni tano toropna, molo tung habilangan jolma orbuk ni tano on, habilangansa ma dohot pinomparmi (1 Musa 13:16).

-      Dung i muse, sahat ma hata i di bindu 15:9 on: Ua tailihon ma dompak langit i jala bilangi angka bintang, molo habilangan ho angka i songon i ma pinomparmu sogot.

Huria ni Tuhanta…Aha do na sai dipaima si Abram? Hasosorang ni dakdanak: Oe ale Tuhan Jahowa, aha ma lehononmu di ahu? Sai na punu do ahu, si Elieser na sian Damaskus na ma sitean bagashu. Ndang adong pinomparhu dilehon ho (mamora di arta dohot tano, alai ndang adong sitean artana i sian tubuna sandiri). Batak mandok: Hagabeon, Hasangapon, Hamoraon….dst..

Saleleng 25 taon Abram diuji Debata di na paimahon dakdanak: Sabar do ibana paimahon? Mandele do ibana? Tundal do si Abraham sian Debata? Ujian do i di si Abram. Manguji haporseaonna asa lam togu. Asa haporseaon na tahan uji.

Husederhanahon ma jo jamita on:

Sude do ra hita mardakdanak parsingkola. Husungkun ma jo hita: lomo do rohanta anakta i naik kalas? Lomo. Alai, asa naik kalas ibana, ingkon bolusonna do ujian. Adong do sian hita natoras na mandok: unang pola dohot anakhi ujian. Manang, boi do naik kalas molo so mandohoti ujian? Antong molo songon i do, lomo do rohanta dipatupa ujian i? Boasa dipatupa ujian i? Asa talup tu tingkat na tumimbo muse sahat tu na dapot izajah. Sahat tu na dapot citacitana. Ai adong do jolma on so pola marsingkola gabe boi sarjana?

Huria ni Tuhanta…nuaeng ujian i, sahat ma muse tu dirinta ganup marsada-sada, songon na sahat tu si Abram i. Tontu adong be do siparungkilhononta songon parungkilon ni si Abram. Manang adong be do na tahirim songon na hinirim ni si Abram.

Naparjolo, ra, nunga leleng hita sai paimahon i. Tahirim asa malum hita sian parsahiton. Tahirim asa denggan sude parianakhonon. Tahirim asa muba ma angka amantana be tu hadengganon. Tahirim asa denggan sude parngoluonta. Asa masa i, aha do narumingkot auhononta?

Ingkon mulak do hita muse tu turpuk jamita on. Aha jumolo didok Debata tu si Abram? Unang ho mabiar ale Abram. Ahu do lombulombum, upam mansai balga. I ma muse pandok ni Debata tu hita di borngin on: Unang ho mabiar ale Ompu Padot, Unang ho mabiar ale Ompu Torkis, dna.

Godang do na gabe so dapot hita, ala ni biar ni roha. Parrohaon na mabiar, pajonok-jonok do i tu na hurang marhaporseaon. Ndang na mandok asa pajago-jagohon hita, alai naeng do hita paposhon rohanta tu Debata asa diurupi hita. Ala torop dope sian hita naung porsea di Debata, alai ndang pos rohana. I do umbahen sai torop dope hita angka Kristen on mangalu-alu tu haportibion on molo jumpangna hamaolon, ndang tu Debata marpos ni roha.

Napaduahon, dilehon Debata ma tu si Abraham na gabe paposhon rohana: Ua tailihon ma dompak langit i jala bilangi angka bintang, molo habilangan ho angka i, songon i ma pinomparmu sogot. (Bintang na rumiris, ombun na sumorop…anak ma di ho riris, boru pe torop). Tontu, marpingkir dope si Abram: Songon dia ma i, ai nunga matua be ahu……”. Mungkinkah itu terjadi?

Sungkun-sungkun i pe, boi do jotjot tapandok: Mungkinkah itu bisa terjadi? Memang, molo sian pihak ni hita jolma, ndang mungkin be boi si Abram mardakdanak,  ai nunga matua. Alai, sian Debata: ndang adong na so tarpatupa Debata. Ala ni, pingkiran ni jolma do na mandok “ndang mungkin”, alai Debata mandok: ndang adong na so boi hupatupa. Laos songon i do di ngolunta on, tongtong ma tahaporseai, paboa ndang adong na so tarpatupa Debata.

Napatoluhon, disungkun si Abram ma muse Debata: Ale Tuhan Jahowa, di aha ma tandaonku paboa ahu tumeansa. Dung i ninna Tuhan i ma mandok ibana: Buat ma di Ahu sada lombu na marumur tolu taon dohot sada hambing na marumur tolu taon dohot sada birubiru tunggal na marumur tolu taon dohot anduhur sada dohot anak ni darapati sada. Martimus ma sada pamurunan, jala disola sada sipusipu na gara holangkolang ni angka tanggotanggo.

Aha na naeng jumpang hita sian i? Unang holan na sip hita. Ringkot do hita marhabaranion “manungkun” Debata, mandok: Ale Tuhan, aha ma tandana patupaun-Mu di ahu? Jala ringkot do hita “berkorban” mamelehon lombu, hambing, birubiru, anduhur, darapati. Sungkunhon songon i di bagasan tangiang, dung i pelehon peleanmu, asa patuduhononNa ma gok angka tanda di ngolunta, songon na pinatupana tu si Abram.

Napaopathon: on ma na rumingkot. Di na pinatongon ni Debata di si Abram tano siteanonna jala dipasahat Debata pomparan marhite si Isak muse, sasintongna gombaran do i di hita angka naung porsea di Jesus Kristus. Tontu ndang tano i be na rumingkot situjuonta, alai marhite Jesus naeng sahat ma hita tu tano Kanaan na manongtong, i ma surgo na pinaradeNa i. Molo didok pe si Abram gabe ompu ni angka na porsea di portibi on, ndang sian pomparan parmudaron be hasasahatna tu hita di partingkian sinuaeng on, alai marhite haporseaon nama (haporseaon di bagasan Jesus). Ala pomparan ni si Abram do Jesus (Ida Mateus Bindu 1)