SERMON 1 RAJA-RAJA 8 : 22 - 23 + 41 - 43

Sermon Parhalado HKBP Resort Sion Nauli

1 Raja-raja 8 : 22 – 23 + 41 – 43 

(Jamita tu Minggu, 29 Mei 2016)

Topik: saluhut bangso di tano on, mananda goar-Mu

8:22   Dung i jongjong ma raja Salomo di adopan ni langgatan ni Jahowa mandompakkon sandok luhutan Israel, jala dipaherbang tanganna dompak langit.

8:23   Dung i ninna ma: Ale Jahowa, Debata ni Israel! Ndang adong Debata na tudoshon Ho di banua ginjang dohot di banua tonga on; Ho do tutu pahothon parjanjian dohot asi ni roha tu naposom, angka na marparange di jolom sian nasa rohana.

8:41   Nang halak sileban, na so sian bangsom Israel, na ro tahe sian luat na dao ala Goarmu.

8:42   Ai begeonnasida ma barita ni Goarmu na timbul i dohot tanganmu na gogo i, dohot botohonmu na toltol i, molo ro ibana martangiang di bagasan joro on:

8:43   Sai manangi ma Ho di banua ginjang, ojahan ni habangsam, jala bahen ma hombar tu saluhut na pinangido ni halak dagang i tu Ho, asa tung saluhut bangso di tano on mananda di Goarmu jala marhabiaran tu Ho songon bangsom Israel, asa tung diboto naung sahat jinou Goarmu tu atas joro na hupauli on.

PATUJOLO

Mansai tarbarita do buku ni 1& 2 Raja-raja on, ala dibaritahon i do ganup raja na mamarenta bangso Israel dohot Juda. Panurathonon ni buku on hira-hira di taon 640 & 550 ASK. Udut ni buku Samuel ma buku Raja-raja on, na marbona sian pangojakhonon ni si Salomo gabe raja dung marujung amongna si Daud. Padan ni Debata do na mandok ingkon sian pomparan ni si Daud do na manguluhon bangso i. Di mulana, marsada do harajaon i, alai di ujungna gabe tarbagi dua ma harajaon na bolon i: Israel Utara na somal digoari: Israel dohot Israel Selatan na somal digoari: Juda).

Dipabotohon do di bagasan buku 1 & 2 Raja-raja on, uju di harajaon Salomo ma singkop dipajongjong Bagas joro. Nian sian amongna si Daud pe, nunga disangkapi laho pajongjong bagas joro i, alai di partingkian ni si Salomo ma singkop jongjong bagas joro na di Jerusalem. Di 1 Raja-raja bindu 1 pe nunga tarida disi parjongjong ni bagas joro. Ala arga do Jahowa di bangso Israel, hadirionNa pe ingkon do mansai arga jala badia. Di bindu paualuhon on ma singkop dipabotohon naung jongjong bagas joro. Sada na mansai arga di pesta parjongjong ni bagas joro, i ma: tangiang. Martangiang si Salomo tu Jahowa, ala nunga singkop be jongjong bagas joro.

HATORANGAN

Ayat 22-23. On ma deba tangiang ni si Salomo. Sarupa do on songon tu tangiang ni si Daud di 2 Samuel 7:22-29. Jumolo do diokuhon si Salomo hasongkalon ni Debata. Ndang adong Debata na asing tudoshon Ho di banua ginjang dohot di banua tonga on. I do pataridahon paboa, ndang mardua Debata ni si Salomo (olat ni turpuk on). Adat di Timur Tengah, ingkon jongjong do hatoban (na tumoru) maradophon tuanna molo naeng marpangidoan. I do umbahen na jongjong si Salomo di langgatan ni Jahowa. Pangokuhonon ni si Salomo, di na so adong be tudosan ni Debata na sun gogo i, patubuhon pamujion sian bagas rohana jala ingkon marsomba ma saluhut jolma tu Jahowa na sasada i.

Ayat 41-43. Tangiang on ditujuhon tu angka halak dagang na tinggal di tano Israel, na dohot marsomba tu Jahowa (proselit). Aha do sibonsirina umbahen na dohot nasida marsomba tu Jahowa? Di ayat 42 didok: Ai begeonnasida ma barita ni Goarmu na timbul i dohot tanganmu na gogo i, dohot botohonmu na toltol i. Saluhutna i, martudutudu do i tu haluaon sian Misir (5 Musa 4:34). Haroro ni angka halak dagang marsomba tu Jahowa, pataridahon tung na songkal do Jahowa, Debata ni Israel. Di bagasan tangiangna, dipangidohon si Salomo do asa tong ma rade Jahowa umbege tangiang ni angka halak dagang i, asa tung saluhut bangso mananda Jahowa jala marhabiaran tu Jahowa. Tangiang ni si Salomo on, i ma tangiang pangondianon, asa tung sude portibi on dipalua Jahowa.

SIPAHUSORHUSORON

1.     Ndada holan na manangiangkon harajaonna si Salomo, alai dohot do diondihon ibana nang halak dagang. Ndada holan tu halak Israel sambing hajongjongan ni bagas joro i. Alai dohot do nang halak dagang mamparsaulihon bagas joro. I do na jumpang hita nang di hata ni Jesus: di Johannes 10:16 Adong dope angka birubirungku na asing, na so sian bara on. Ingkon dohot do angka i togihononku; tangihononnasida do soarangku, dung i gabe sada punguan ma i jala sada ma parmahan. Jala laos i do nang parsuruon tu ganup angka sisean uju naeng manaek Jesus tu banua ginjang: Mateus 28:19 Laho ma hamu, podai hamu ma saluhut bangso, didi hamu ma nasida tubagasan Goar ni Ama. Anak dohot Tondi Parbadia. Laos i do muse na jumpang hita di si Kornelius na pajumpang dohot si Petrus: Ulaon ni Apostel 10:34 Nunga tangkas dapot rohangku, na so siida bohi Debata. I do tutu haroro ni Jesus tu portibi on. Mamboan nasa jolma tu Debata asa manjalo haluaon. Ndang holan tu piga-piga halak haluaon i, alau tung tu saluhut jolma do, so pola marnida bangso, haum, parhataan dna.

2.     Tangiang ni si Salomo, pataridahon na denggan do parsaoranna dohot Debata. Disosohon jamita on ma tu hita asa taharingkothon ma ngolu partangiangon.

3.     Marsorminan sian jamita on, huria ndada holan na manghobasi dirina sambing. Alai ingkon “terbuka” do manghobasi portibi on. I do Visi ni HKBP: HKBP Gabe pasupasu tu portibi on. Jala sada sian Misi, i ma: Mamaritahon Barita na uli tu na so mananda Kristus dope. Gabe sira ma huria, jala gabe panondang mamboan Missio Dei (Ulaon ni Debata) tu portibi on (Mat. 5:13-14). Amen.

Pdt. W. M. Hutapea