SERMON 1 RAJA-RAJA 8 : 54 - 61

SERMON

Jamita tu tanggal 31 Desember 2015 (bodarina)

1 RAJARAJA 8 : 54 – 61

DIDONGANI JAHOWA MA HITA,

UNANG MA DITADINGKON IBANA HITA

8:54 Jadi dung sun ditangiangkon raja Salomo tu Jahowa saluhut tangiang dohot pangidoan ondeng, hehe ma ibana sian adopan ni langgatan ni Jahowa dohot sian na marsinggang i dohot sian na pinaherbangna i tanganna dompak banua ginjang.

8:55 Laos jongjong ma rajai, huhut mamasumasu sandok luhutan Israel, pola dipagogo soarana mandok songon on:

8:56 Pinuji ma Jahowa, naung mangalehon hasonangan tu bangsona Israel, hombar tu sandok naung pinarbagana i! Ndang adong tartinggal nanggo sada hata sian saluhut hatana na denggan i, naung pinaboana hian marhite sian si Musa naposona i.

8:57 Sai didongani Jahowa, Debatanta i ma hita, songon naung nidongananna angka ompunta na jolo; sai unang ma ditadingkon Ibana hita manang mambolongkon hita.

8:58 Sai ditaiti ma rohanta tu Ibana, asa marparange hita di saluhut dalanna huhut mangaradoti angka tonana dohot patikna dohot uhumna, angka naung tinonahonna tu angka ompunta i.

8:59 Jala saluhut hata pangidoan on, angka naung husombahon di adopan ni Jahowa, sai ngomngom ma i di jolo ni Jahowa, Debatanta i borngin dohot arian, asa pasintongonna uhum tu naposona dohot tu bangsona Israel, singkop ariari!

8:60 Asa tung saluhut bangso ni tano on mananda, paboa Jahowa do Debata, jala dungkon ni Ibana ndang adong.

8:61  Jala ingkon sun daulat rohamuna tu Jahowa, Debatanta i, asa marparange di bagasan angka patikna jala mangaradoti angka tonana suman songon sadarion.

PATUJOLO

Sadari on ma pangujungi ni taon 2015. Ringkot do hita mangarujiruji na tolu on:

1.     Angka aha ma naung itaulahon.

2.    Aha ma na tongon itaulahon.

3.    Aha ma muse na naeng itaulahon.

Taringot tu naung itaulahon i, ringkot do pangarimangon, i ma: marguna do angka naung diula i? Marhadomuan do naung itaula i tu haporseaon di Tuhan, manang holan ulaon haportibion do na sai diula?

Di parngoluon ni Raja Salomo, jumpang hita do di turpuk ulaon ni Raja i na mansai ringkot, i ma papindahon (mamboan) poti parpadanan sian Sion tu Jerusalem (ay.1), ala nunga singkop be dipajongjong si Salomo bagas joro na di Jerusalem. Martangiang ma ibana tu Jahowa di jolo ni poti parpadanan i. Hata ni tangiangna, i ma:

a.    Pangokuhonon di pangaramotion ni Debata Jahowa (ay. 22-30).

b.    Mangido pangurupion ni Debata (39-45).

c.     Mangidohon asa ditangihon Jahowa tangiangna (46-53).

Na marlapatan, ndang tarlalap Raja Salomo di harajaon dohot di hamoraonna i, tongtong do diingot ibana marparsaoran dohot Debata. Ala dihaporseai Ibana, holan Debata do na mangaloas ibana gabe raja manggomgomi bangso Israel, jala Debata do na mangaramoti bangso i.

HATORANGAN

Di turpuk on, hataridaan ni rosu ni parsaoranna dohot Debata, i ma hatiha martangiang raja i di bagasan roha na hibul (54). Boasa ringkot di rohana na marsaor dohot Debata? Ala holan Debata do mual ni nasa pasupasu naung jinalo ni raja Salomo. Dohot ma muse di naung singkop dipajongjong ibana bagas joro. Ai amongna si Daud do na mambonai, alai marhaujungan ma i di tangan ni si Salomo. Dipajojor ibana saluhut pardalanan ni bangso i mamungka haruar sian Misir sahat ro di naung singkop jongjong bagas joro inganan parsombaon nasida. Asa anggiat saluhut pangisi ni bangso Israel marsomba tu Jahowa silehon hasonangan i (55-56). Simpul ibana martangiang, dipasupasu ma luhutan ni bangso i. Didok, Pinuji ma Jahowa, naung mangalehon hasonangan tu bangsona Israel. Hasonangan na pinasahat ni Jahowa tu Raja Salomo, mangonjar rohana mamuji Tuhan i. Hasonangan i, i ma ngolu pardagingon dohot partondion. Dilehon sipanganon ganup ari, ditumpaki do bangso i monang maralohon nasa musu, jala sonang nang diuulaon parsombaon tu Debata. Panindangion sisongon i do naeng hatahononta apala di ujung ni taon on, paboa na Jahowa do na mangaramoti ngolunta be. Di na naeng salpuhononta taon on, jala bongotanta taon na imbaru, ingkon parhatopotonta do, ndang sonang ngolunta molo marsirang sian Debata. Alai moloo rap dohot Debata, singkop ma di hit alas ni roha songon si Salomo naung manjalo denggan basa i. Atik pe torop na paet na tabolus, hamaolon dohot ragam ni paraloan, tarapul jala sonang do rohanta mamolus i ala rap hita dohot Jesus (Immanuel).

Dung dihatindangkon raja Salomo taringot tu angka denggan basa dohot asi ni roha i, dipasupasu ibana ma bangso i. Marrumang pangidoan tu Jahowa do pasupasu i asa tongtong ditaiti roha ni bangso i mananda Jahowa (ay. 58). Dipaingot bangso i, paboa songon pandonganionNa najolo di bangsoNa nang angka ompunasida, songon i do nang pandonganionNa tu joloan on. Di ayat 60 dipasahat do asa tung saluhut bangso i mananda paboa Jahowa do Debatanasida. Asi ni roha ni Jahowa di bangso i, mangigil panandaon dohot pangoloion sian bangso i.  

Ayat 57-59 dohot 60, parbue ni panandaonta di Debata, taulahon ma lomo ni rohaNa, i ma parange na denggan. I do pangidoan ni Raja Salomo di ayat i. Pandokan “sai ngomngom ma i di jolo ni Jahowa”, lapatanna sai jonok. Hajojonokta tu Jahowa mangigil parange na denggan. Hajojonokta tu Jahowa patuduhon ia hadirionta gabe joro ni Debata. Olo do hinrhon ni na sibuk mulaulaon mangalului na ringot di ngolu, gabe lalap jala lupa marparsaoran dohot Debata. Lam leleng lam dao, ndang lam jonok. Dipaingothon ma marhite turpuk on, asa:

1.     Unang halupahon Tuhan naung mangalehon pasupasu na godang i.

2.    Unang halupahon Tuhan na mangaramoti pardalanan ni ngolu on.

3.    Jala unang halupahon Tuhan na mangaramoti ngolum nang sogot.

Ayat 61, Jala ingkon sun daulat rohamuna tu Jahowa, Debatanta i. Asa dapot hadaulaton i, ingkon marparange di bagasan angka patik jala mangaradoti nasa tona nang uhum ni Jahowa. Nunga dipasahat hian i (patik) tu bangso i marhite si Musa.

I ma na gabe ruhut di parngoluon nasida di tano habaoran ni susu nang situak ni loba i. Nasa na unduk di patik i, jala diradoti Hata ni Debata, gok hadameon nang hasonangan ma ngoluna, songon Raja Salomo sandiri.

PANIMPULI

Di naung naung sahat hita nuaeng di ujung ni taon 2015 on, naeng bongot ma hita tu taon 2016, boi hita sahat manadingkon taon na buruk on, tontu ingkon haporseaonta do pangaramotion ni Debata di bagasan na sataon bolon on. Songon pangalehonNa di hasonangan tu bangso Israel, songon i do nang pangalehonNa hasonangan di ngolunta be. Hata-Na dohot pangaramotionNa i do na margogoihon hita di na sataon bolon naung tabolus i. Ala ni i, PINUJI ma Jahowa naung umpasupasuhon tu hita ragam ni pasupasu i.

Di naeng tasalpuhon ma nuaeng taon 2015 on, na patut do las rohanta. Ai gabe panindangion las ni roha ma i marhite haporseaonta. Nang di na naeng bongotanta taon na imbaru 2016, sai didongani Debata ma ngolunta tu joloan on, songon pandonganionna di tingki naung salpu. Asa tung ditanda saluhut bangso di tano on paboa Jahowa do Debatanta. Ala ni i, tagogo ma tongtong martangiang tu Jahowa songon panangiangkonon ni Raja Salomo di langgatan bagas joro i.

Di na mandalani tingki on, anggiat ma lam daulat rohanta jala marparange di bagasan angka Hata-Na dohot Patik-Na. ai Hata i do sulusulu di pat jala hatiuron di dalanku.  Amen.