1 Johannes 3 : 19 - 24

1 Johannes  3 : 19 – 24

3:19   Disi ma botoonta, paboa sian hasintongan hita jala tapapos rohanta di Jolona.

3:20   Molo disolsoli rohanta hita, umbalga do Debata sian rohanta jala diboto saluhutna.

3:21   Hamu angka haholongan, molo so disolsoli rohanta hita, marhiras ni roha do hita maradophon Debata.

3:22   Jadi manang aha pe tapangido, jaloonta do sian Ibana, ala taradoti patikna jadi taula lomo ni rohana.

3:23   On do patikna: Naeng porsea hita di Goar ni Anakna Jesus Kristus, huhut masihaholongan, songon naung tinonahonna i tu hita.

3:24   Siradoti patikna, i do na mian di bagasan Ibana jala Debata di bagasan ibana. Jala sian on do taboto, naung mian Ibana di bagasan hita: Sian Tondi i, na nilehonna i tu hita.

HURIA NI TUHANTA...

Adong ma hamaolon hatiha disurathon turpuk on. Adong angka panggunturi ni huria. Ia angka panggunturi i, sanga do masuk tu huria, alai haruar ma muse nasida. I ma na manggoari dirina  “pengikut aliran gnostik” na holan mangasahon parbinotoan ni jolma/pingkiran.

Ndang porsea halak on na Jesus do Mesias. Ala di pangantusion ni nasida, ia Mesias, i ma na mansai badia, na so “mungkin” boi marsada dohot  jolma (Jesus). Ai Jesus jolma na biasa do, ndang toho Ibana anak ni Debata. Na boi male, na boi tarpodom, na boi mauas, jala dos do i songon hita jolma na mardosa on. Jala sai marusaha do halak on mangela-ela ruas i asa marbalik sian hakristenon.

Dipandok halak on ma, na loakon do molo mangihuthon Jesus, ai hasalaan do i. Dirungkari halak on ma muse angka dosa2 naung hea diulahon nasida. Adong do antong na gabe tarela, jala adong ma muse na gabe ganggu rohana. Toho ma i, sada na mangambati hita pajumpang dohot Debata, i ma dosa na hea taulahon. Jotjot do jolma “diihot” / dibelenggu dosa masa lalu, gabe maila ma hita pajumpang dohot Debata. Ujungna gabe lam mandao ma.

HURIA NI TUHANTA...

Serangan-serangan yang paling menyakitkan adalah apabila serangan itu ditujukan ke hati, tu roha. Poda 15:13 mandok: “Roha na hilas pasihar panaili, alai molo marsak roha margudompong ma tondi”. Roha parbagasan do pamusatan di pangulahonon dohot panghataion. Molo masa ganggu ni roha, boi do i manghorhon “stress”, maol ma muse porsea. Manang, adong do na porsea, alai holan na porsea sambing. Ndang pos rohana.

Hape taboto do, tu roha parbagasan i do inganan parmianan ni Debata marhite angka Hata-Na, gabe taboto ma mangulahon hasintongan di haporseaon tu Jesus. Alai, ndang sae holan na porsea. Ai molo holan i do, sibolis i pe porsea do di Debata, jala angka dotdot do sibolis marnida Debata (Jakobus 2:19).

I do na pinaingot ni turpuk on, tu angka ruas na sai ganggu dope rohana nang tu hita saluhutna, angka na golom ria-ria, PORSEA ma di Jesus na tuk manesa dosa. (Percayalah, sebab Yesus adalah satu-satunya Juruselamat kita). I do holong ni rohaNa na sun BALGA i, “Ai songon on do holong ni roha ni Debata di portibi on, pola do AnakNa na SASADA i dilehon, asa unang mago ganup na porsea di Ibana.

Memang toho do i, sada na pinarsinta ni Debata sian hita i ma, manolsoli diri mananda dosanta. Alai ndang sae be holan na manolsoli diri, hape ndang adong “perubahan diri”. Malah, adong do jolma gabe sala manolsoli, adong ma na laho tu Club malam, adong na minum2, adong na manjama narkoba, dna. Manolsoli diri, ingkon na mangihut do muse, huhut mangaradoti patikNa, jala rap masihaholongan (23). Ala angka siradoti patik do na gabe mian di bagasan Ibana jala angka i do na tuk mangulahon holong ni roha i (24).

Disi ma botoonta, paboa sian hasintongan do hita jala pos ma rohanta di Ibana. Ndang na hita hasintongan i, alai gabe sian hasintongan do hita molo nunga mian hita di bagasan Ibana. Manang aha pe tapangido, jaloonta ma i. Marhite panghaporseaon na tangkas tu Debata, disi ma sahat hita tu parbinotoan dohot pangantusion “na umbalga do Debata” sian rohanta jala diboto Ibana do saluhut (20).

Sekali lagi dikatakan, dosa dapat menjauhkan kita dari Tuhan, tapi bagi orang-orang yang menyesali dosanya, semoga dia semakin dekat juga kepada Tuhan. Ketika orang sudah dekat kepada Tuhan, dengan sendirinya ia akan mencintai Firman Allah. Ketika dia sudah mencintai Firman Allah, dengan sendirinya juga dia akan melaksanakannya. DAN ketika ia melaksanakan Firman Allah, dengan sendirinya juga, ia akan menerima apa saja yang diminta.