1 RAJA-RAJA 19 : 1 - 18

1 RAJA-RAJA 19 : 1 - 18

Topik: Debata pangapul na sumurung.

19:1   Dung i dipajojor si Ahab ma tu si Izebel sude na binahen ni si Elia dohot pamununa di saluhut angka panurirang marhite sian podang.

19:2 Dung i disuru si Izebel ma suruanna manopot si Elia mandok tu ibana: Ingkon pinsangon ni angka debata ma ahu, molo so bahenonku tu hosam marsogot songon on, suang songon na binahenmi tu hosa ni sada sian angka nasida i.

19:3 Dung sahat hata i diboto si Elia hehe ma ibana mardalan marhamaol hosana, gabe sahat ma ibana tu Berseba na di Juda, jala ditinggalhon naposona disi.

19:4 Alai mardalan ma anggo ibana tu halongonan, sadari mardalan daona, dung sahat tusi hundul ma ibana marlinggomlinggom di bona ni sada hau tadatada laos mangidohon mate hosana, ninna ma: Nunga i sae ale Jahowa, buat na ma tagonan hosangki, ai apala dumenggan ahu marroha sian angka daompung.

19:5 Dung i dipapeak ma ibana laos modom di linggom ni hau tadatada i. Jadi ida ma, ro sada surusuruan manjama ibana, huhut didok tu ibana: Hehe ma ho mangan! (tingki modom do disise)

19:6 Dung i humusor ma ibana, gabe diida peak dingkan uluna sada sagusagu na ginoreng dohot sada gunsi marisi aek. Jadi dung mangan dohot minum ibana, diulahi muse ma modom.

19:7 Dung i ro surusuruan ni Jahowa paduahalihon manjama ibana huhut didok: Hehe ma ho mangan, ai dalan na dao do sidalananmu. (tingki modom do disise)

19:8 Dung i hehe ma ibana jala mangan minum, jala mardalan margogohon sipanganon i opatpulu ari opatpulu borngin lelengna, sahat ro di dolok ni Debata, i ma Horeb.

19:9 Masuk ma ibana disi tu bagasan sada liang laos marborngin disi. Dung i ida ma, ro ma hata ni Jahowa, mandok tu ibana: Aha do ni niulam dison, ale Elia?

 19:10 Dung i ninna ibana ma: Marmurukmuruk situtu do ahu nian humongkop ulaon ni Jahowa, Debata Zebaot, ai nunga ditadingkon halak Israel parjanjianmu, nunga maloha angka langgatanmu, jala nunga dibunu angka panurirangmu marhite sian podang, sasada ahu na ma tading, dohot hosangki dope dilului nasida naeng buatonna.

19:11 Dung i ninna Ibana ma: Ruar ma ho jala jongjong tu dolok na di jolo ni Jahowa, ai ida ma, naeng mamolus Jahowa! Tongkinnari ro ma habahaba bolon, na manorbani angka dolok dohot mambolai angka dolok batu mardalan di jolo ni Jahowa; alai ndada Jahowa dope di bagasan habahaba i. Dung salpu habahaba i ro ma lalo; alai ndada Jahowa dope di bagasan lalo i.

19:12 Dung salpu lalo i ro ma api; alai ndada Jahowa dope di bagasan api i. Dung salpu api ro ma alogo na tarangonangon.

19:13 Jadi dung dibege si Elia soarana i, dihungkupi ma bohina dohot sampesampena; dung i ruar ma ibana laos jongjong di baba ni liang i. Dung i ida ma, ro sada soara mandok tu ibana: Aha do na niulam dison, ale Elia?

19:14 Dung i ninna ibana ma: Marmurukmuruk situtu do ahu nian humongkop ulaon ni Jahowa, Debata Zebaot; ai nunga ditadingkon halak Israel parjanjianmu, jala nunga diloha nasida angka langgatanmi, nunga dibunui dohot angka panurirangmu marhite sian podang, jala sasada ahu na ma tading, dohot hosangki dope dilului nasida naeng buatonna.

19:15 Alai ninna Jahowa ma tu ibana: Mulak ma ho tu dalanmu hian tungkan Damaskus, laho ma ho tusi jala miahi si Hasael bahen raja gumomgom Ram.

19:16Miahi dohot si Jehu, anak ni si Nimsi bahen raja gumomgom Israel, miahi dohot si Elisa, anak ni si Sapat sian Abel Mehola bahen panurirang singkatmu.

19:17 Jadi manang ise na malua sian podang ni si Hasael, ingkon mate bunuon ni si Jehu ma i, jala manang ise na malua sian podang ni Jehu, ingkon mate bunuon ni si Elisa ma i.

19:18 Angkup ni tinggal dope hubahen di Israel pitu ribu halak, saluhutna i angka na so mangalompit ulu ni totna marsomba tu Baal dohot na so dung mangumma ibana.

HITA ANGKA DONGAN…Dua ma nuaeng “identitas” na tongon tatuhuk di portibi on. Identitas naparjolo, i ma: “gabe anggota masyarakat heterogen”. Lapatanna: rap mangolu jala rap marsaor do hita dohot angka dongan na marimbar agama, marimbar adat, marimbar di parmargaon, marimbar nang haroroan ni bona-pasogitta.

Identitas napaduahon, i ma: gabe ruas ni huria (Kristen - siihuthon Kristus).

Di portibi on, marragam ma na masa na taadopi jala tabolus: marganti sorin ma arsak nang las ni roha. Di tingki las rohanta, neang do panghilalaan, jala neang ma nang pamatang, sonang pingkiran.

Alai, molo ro ma arsak, ro nang biar, ponjot ma roha, ponjot nang pingkiran, jala gale ma nang pamatang / daging. Olo ma ndang ra mula-ulaon, jala losok ma nang roha, gale nang panghilalaan

Ringkot ma pangapulion nang panogarion tu angka na marsak roha. Hea do ra gale panghilalaanta, jala marsak nang rohanta ala ni parungkilon, ala ni ponjot ni sipingkiran, gabe ro pandelean. Bahkan adong na gabe STRESS.

Ala ni i, aha do siputikon sian jamita on, di na mangadopi arsak ni roha?

HITA ANGKA DONGAN…tongon ma diadopi si Elia arsak ni roha. Boasa marsak ibana? Ala adong asup-asup manang “ancaman” sian si Isebel. Sasintongna, si Isebel, sahalak parompuan do. Amantana margoar si Ahab. Si Ahab i ma sahalak raja ni bangso Israel.

Ditopot si Ahab ma si Isebel gabe parsinondukna (isterinya), alai si Isebel on i ma jolma na so olo marsomba tu Debata ni Israel. Sai marsomba tu gana-ganaan do ibana. Gabe tartait ma roha ni si Ahab manomba debata ganaganaan i, songon na sinomba ni si Isebel. Gabe tunduk si Ahab tu inantana na manomba gana-ganaan (DKI).

Jadi di jamita on, marsangkap do si Isebel naeng mambunu si Elia. Boasa? On ma bonsirna: Marpungu ma sude parhalado ni si Isebel, angka na manomba ganaganaan, godangna 450 halak. Pajumpang ma na 450 halak i dohot si Elia di dolok Karmel. Naeng masipatuduhon debatana be, manang debata ni ise na gumogo.

Dapot ma panghataion: diboan ma dua lombu jonggi, sipelehonon tu debata. Sada ma i dipasahat tu si Elia, jala sada nari tu si 450 halak i.

Jumolo ma si 450 halak i maneat lombu i, dung i dipotongi ma, laos dipeakkon di atas ni soban. Alai unang digorgori dohot api. Dijou nasida ma debatana sagogo ni gogona asa dipangan nian pelean lombu i, mamungka sian manogot sahat tu botari. Hape ndang ro debata nasida i.

Dung i, sahat ma bagian ni si Elia. Dipalungguk ma soban, dipotong ma lombu bagianna i, dipeakkon ma di atas ni soban. Didok muse dope asa ditonui soban i dohot aek.

Dung i, dijou si Elia ma Debata. Ro ma api sian banua-ginjang, dipangan api i ma sude soban na tonu dohot pelean lombu i. Longang be ma sude jolma na 450 halak i.

Salpu i, ditangkup si Elia ma na 450 halak i, laos diseati di topi ni sunge Kison. Marnida na masa i, dipaboa si Ahab ma tu inantana si Isebel, gabe martahi ma si Isebel naeng mambunu si Elia marhite angka suruanna. I do bonsirna, umbahen na mansai muruk si Isebel tu si Elia.

Umbege sangkap ni si Isebel, morot ma si Elia tu halongonan (gurun-pasir) tung mansai dao, so tung dibunu. Maradi ma si Elia di toru ni hau tadatada, laos marlinggom. Disi do gabe dipangido ibana ma asa dibuat Debata hosana.

Boasa dipangido ibana asa dibuat hosana?

Mulak ma songon na nidok naparjolo nangkin: boi do gabe lilu roha ni jolma, ala ni ponjot ni pingkiran. Mardomu muse nunga tung apala loja si Elia na mardalan i. Loja pingkiranna mamingkiri ancaman ni si Isebel, jala loja muse dagingna na mardalan i. Boi do gabe stress pangkorhonna.

Hea do hita manghilalahon songon na hinilala ni si Elia? Ala ponjot pingkiran, gabe dipangido ma hamatean. Gabe adong na marsangkap paujungkon hosana. Gabe adong na naeng maningkot. Adong na manginum putas, adong na manangkothon rungkungna, dna. Hea do hita manghilalahon parsoalan na mansai dokdok na songon i?

ANTONG ANGKA DONGAN…naposo ni Debata do si Elia, sahalak panurirang, jolma na jotjot manghatai tu Debata. Alai, nang pe solhot ibana tu Debata, ndang gabe so adong hamaolon siadopanna. Ndang gabe so adong parungkilonna. Gariada, lam dokdok do parungkilonna.

Songon i do nang hita. Jolma siihuthon Kristus. Angka naposo ni Debata, angka na porsea di Jesus Kristus. Molo dung gabe siihuthon Kristus hita, ndang na mandok gabe mago ma nasa parungkilon. Alai aha ma didok Jesus di Markus 8:34 Nasa na giot mangihuthon Ahu, disoadahon ma dirina, dituhuk ma silang na tu ibana i, diihuthon ma Ahu.

Na marlapatan: mansai dokdok do hape “resiko” molo gabe siihuthon Kristus. RADE do hamu sude manjalo “resiko” i? Mangihuthon Kristus, ingkon godang ma mangadopi hamaolon, songon na masa tu si Elia di na mangihuthon Debata.

Alai bereng hita ma aha muse na masa:

Na mangudut: di naung loja i si Elia, tarpodom ma ibana. Ro ma surusuruan manjama huhut didok: hehe ma ho mangan. Laos mangan ma si Elia. Salpu i, tarpodom ma muse ibana. Ro ma surusuruan paduahalihon manjama ibana huhut didok: hehe ma ho mangan. Mangan ma muse si Elia.

Alai, salpu mangan padua-halihon i, ndang modom be ibana. Borhat ma si Elia mardalan  leleng ni 40 ari sahat tu dolok Horeb, pinargogoan ni sipanganon i.

HITA ANGKA DONGAN…ndang dipasombu Debata naposoNa i torus didondoni hamaolon. Ndang dipasombu Debata ibana torus di bagasan hagaleon ni pardagingon. Disarihon Debata do ngolu ni si Elia. Bahkan, di tingki modom pe, dijama Debata do si Elia. Dungo ho jala mangan Elia, ninna Debata. I do pataridahon: mansai dihongkop Debata do ngolu ni angka na hinaholonganNa.

Songon i do nang hita saluhut. Tontu na di haholongi Debata do ngolunta umbahen na ditongos Debata anakNa Jesus Kristus. Mansai holong do roha ni Debata di hita sude. I do didok Johannes 3:16 Ai songon on do holong ni roha ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na salelenglelengna di ibana.

Antong aha didok Jesus di Lukas 12:29-30 unang ma lulululu rohamuna di sipanganon manang di siinumonmuna; unang bohabohaon rohamuna disi! Angka sipelebegu na di portibi on do mangalului angka sisongon i; alai diboto Amamuna do, na hasea angka i di hamu. 

HITA ANGKA DONGAN…disarihon Debata do na ringkot di ngolunta on. Diingot hamu dope jamita na di ari Minggu na salpu? Mateus 14: 13-21 > Holan lima roti dohot dua dengke sambing do hupeop hami dison. Alai di tangan ni Jesus, gabe mangerbang do i.

Na mangudut: Dung sahat si Elia tu dolo Horeb, masuk ma ibana tu sada liang, laos marborngin disi.

Disungkun Debata ma ibana: aha do niulam dison ale Elia? Ro ma alus ni si Elia: Marmurukmuruk situtu do ahu nian humongkop ulaon ni Jahowa, Debata Zebaot; ai nunga ditadingkon halak Israel parjanjianmu, jala nunga diloha nasida angka langgatanmi, nunga dibunui dohot angka panurirangmu marhite sian podang, jala sasada ahu na ma tading, dohot hosangki dope dilului nasida naeng buatonna.

Dipadua-hali Debata muse manungkun: aha diula ho dison ale Elia?

HITA ANGKA DONGAN…Naeng do hita bulus na marTuhan on. Unang adong gabus. Ai disungkun Debata do si Elia: na marhua do ho? Sasintongna, asa dihatahon si Elia do na sasintongna. Ai nunga manimbil ibana sian parsuruon ni Debata ala ni biarna tu si Isebel.

Boi do songon i nang hita di ngolu on. Ala ni biarta, ala ni dokdok ni sitaonon, ala ni ponjot ni pingkiran, ala ni godang ni hamaolon, ala ni parungkilon na mansai borat, laho pasidingkon i sian pingkiran, gabe lari hita tu angka ulaon na so patut.

Lari tu minuman keras, lari tu parjujian, lari tu kafe, lari tu narkoba, lari tu angka hiburan malam, dna. Hape so boi i pasidung parungkilon i.

Disungkun Debata ma si Elia, jala dilehon si Elia ma alus na so patut. Ai gabe muruk ibana tu Jahowa. Gabe disalahon ibana Debata, jala lari ibana sian parsuruon na parjolo gabe panurirang.

Hita pe, adong do na gabe lari sian “identitasta” naparjolo holan ala ni pasiding sipingkiran na borat, jala gabe tasalahon ma Debata, songon si Elian a mansalahon Debata. Alai nang pe songon i, ndang gabe pintor muruk muse Debata tu si Elia, baliksa gabe mulak do roha ni Debata, marhite na mandok: Mulak ma ho tu dalanmu hian.

Lapatanna: mulak ma ho tu ulaonmu gabe panurirang tu Damaskus. Miahi si Hasael bahen raja gumomgom Ram. Miahi dohot si Jehu, anak ni si Nimsi bahen raja gumomgom Israel, miahi dohot si Elisa, anak ni si Sapat sian Abel Mehola bahen panurirang singkatmu. Jadi manang ise na malua sian podang ni si Hasael, ingkon mate bunuon ni si Jehu ma i, jala manang ise na malua sian podang ni Jehu, ingkon mate bunuon ni si Elisa ma i.

Songon i do nang hita: molo tung dao  pe hita manimbil sian Jahowa, disuru do hita mulak muse. Molo tung na borat pe parungkilonta be, mulak ma hita tu Jahowa. Lehononna do pos ni roha songon na pinamasaNa tu si Elia: manang ise na malua sian podang ni si Hasael, ingkon mate bunuon ni si Jehu ma i, jala manang ise na malua sian podang ni Jehu, ingkon mate bunuon ni si Elisa ma i.

Lapatanna: ndang hahuaon ni manang ise si Elia. Gariada ramotan ni Debata do tongtong.

I ma podana nang tu hita sude. Pos ma rohanta di Debata, ai jagaonNa do tongtong ngolunta on, songon pajagana di si Elia. Nang pe ingkon mamolus ragam ni hamaolon si Elia, alai dilehon Debata do pos ni roha.

Songon i ma nang hita, nang pe marragam ro na pasorat pingkiran, urupan ni Debata do hita, jala POS MA ROHANTA disi. Ro ma hamu tu Ahu, hamu angka na loja jala na sorat, hupasonang pe hamu, Mateus 11:28..