1 RAJA-RAJA 8 : 54 - 61

Jamita tu tanggal 31 Desember 2015 (bodarina)

1 RAJARAJA 8 : 54 – 61

DIDONGANI JAHOWA MA HITA,

UNANG MA DITADINGKON IBANA HITA

8:54  Jadi dung sun ditangiangkon raja Salomo tu Jahowa saluhut tangiang dohot pangidoan ondeng, hehe ma ibana sian adopan ni langgatan ni Jahowa dohot sian na marsinggang i dohot sian na pinaherbangna i tanganna dompak banua ginjang.

8:55 Laos jongjong ma rajai, huhut mamasumasu sandok luhutan Israel, pola dipagogo soarana mandok songon on:

8:56 Pinuji ma Jahowa, naung mangalehon hasonangan tu bangsona Israel, hombar tu sandok naung pinarbagana i! Ndang adong tartinggal nanggo sada hata sian saluhut hatana na denggan i, naung pinaboana hian marhite sian si Musa naposona i.

8:57  Sai didongani Jahowa, Debatanta i ma hita, songon naung nidongananna angka ompunta na jolo; sai unang ma ditadingkon Ibana hita manang mambolongkon hita.

8:58  Sai ditaiti ma rohanta tu Ibana, asa marparange hita di saluhut dalanna huhut mangaradoti angka tonana dohot patikna dohot uhumna, angka naung tinonahonna tu angka ompunta i.

8:59  Jala saluhut hata pangidoan on, angka naung husombahon di adopan ni Jahowa, sai ngomngom ma i di jolo ni Jahowa, Debatanta i borngin dohot arian, asa pasintongonna uhum tu naposona dohot tu bangsona Israel, singkop ariari!

8:60  Asa tung saluhut bangso ni tano on mananda, paboa Jahowa do Debata, jala dungkon ni Ibana ndang adong.

8:61  Jala ingkon sun daulat rohamuna tu Jahowa, Debatanta i, asa marparange di bagasan angka patikna jala mangaradoti angka tonana suman songon sadarion.

Hamu Angka Dongan…

Naeng sahat ma hita di ujung ni pardalanan ni ngolunta di taon 2015 on. Jala naeng udutanta ma muse pardalanan on tu taon na imbaru 2016 na naeng piga jom nari masa i. Andorang so bongot hita tu 2016 ringkot do hita mangaruji-ruji angka naung salpu i.

Psalmen 90:12 mandok: Sai parroha i ma hami mamilangi angka ariarinami, asa dapotan roha na bisuk hami.

Tontu, di bagasan partingkian naung salpu i, lumobi di na sataon bolon 2015 on, torop do naung itabolus, trop naung ita-adopi. Arsak dohot las ni roha. Adong do donganta na marhabot ni roha ala marujung ngolu na hinaholonganna, adong na marungkil ala ni parsahiton, laos adong do muse na marlas ni roha marhite na sorangan dakdanak dohot ala ni angka pangomoan.

Marlao-ro do jolma di portibi on, laos marlao-ro do arsak nang las ni roha. Marimbar be do muse angka siadopan ni ganup rumah-tangga, marimbar do nang siadopan ni hita na marsasahalak.

Adong do hita na malaum sian parsahiton, adong do hita “ra” na malua sian parmaraan, denggan sude angka hasil ni kobunta be, jala dapot hita bahat pangomoan sian i. Angka na tardok pegawai negeri, denggan sude ulaonna, angka na tardok partiga-tiga mangomo di ulaonna, denggan pangalaho ni angka ianakhonta na marsingkola, jala na parpudi: di bagasan hahipason hita nuaeng. Nda patut ma hita mandok mauliate tu Debata?

Disi do ingkon ringkot hita marbisuk, songon pandok ni si Salomo i. Na bisuk do jolma na olo mamilangi ari-ari ni ngoluna. Na bisuk do jolma na olo mandok mauliate tu Debata. Na bisuk do jolma na olo mangaruji-ruji pardalanan ni ngoluna.

Hamu Angka Dongan…

Songon i ma Raja Salomo na jumpang hita di turpuk jamita on. Leleng do asa singkop jongjong Bagas Joro, inganan partangiangan ni bangso Israel. Mamungka sian amongna si Daud, nunga sai marsangkap naeng pajongjong bagas joro.

Alai ndang diloas Debata si Daud pajongjongkon bagas joro i. Tu anakna si Salomo do dipasahat Debata ulaon i, jala singkop ma jongjong Bagas Joro i uju hinarajaon ni si Salomo.

Asa dung sidung dipajongjong bagas joro i, dipapungu Raja Salomo ma sude pangisi ni Israel di jolo ni bagas joro i di Jerusalem jala martangiang ma Raja i tu Jahowa.

Hamu Angka Dongan…

Aha do naeng dapot hita sian jamita bodari on?

Naparjolo: Salomo, i ma sahalak raja na manguluhon bangso Israel. Boasa diarahon Raja Salomo sude luhutan ni bangso Israel di Bagas joro? Asa pajumpang bangso i dohot Debata.

Somalna, molo denggan uluan, denggan do nang sahat tu angka na nirajaanna. Uluan do angka sintua lingkungan di ganup lingkunganna be. 

Uluan do hita angka natoras di ganup rumah-tanggana be. Naeng denggan angka ianakhonta i nang keluarganta be, ingkon denggan do jumolo natoras na tardok uluan.

Tanggung-jawab ni Raja Salomo do mamboan saluhut bangso Israel pajumpang dohot Debata di Bagas Joro i, laos i ma muse na gabe tanggung-jawab ni hita angka natoras mamboan keluargana be nang ianakhonna be pajumpang dohot Debata di Bagas Joro.

BOASA? Asa tung saluhut bangso ni tano on mananda, paboa Jahowa do Debata, jala dungkon ni Ibana ndang adong (ay. 60). Asa tatanda ise do Debatanta i.

Napaduahon: Di na binoan ni Raja Salomo i sude bangso i pajumpang dohot Debata, pintor martangiang do Raja Salomo tu Debata, asa anggiat diramoti Debata sude bangso Israel jala sai marpamuati Debata di angka dosa ni bangso i.

Songon i ma dihalaputi Raja Salomo na martangiang i, naeng do songon i jumpang di hita saluhut, asa tahalaputi (manang taharingkothon) ma ngolu na martangiang.

Tangiang do gogonta di ngolu on. Tangiang do dalanta manghatai dohot Debata. Tangiang i do na gabe “hosa” di haporseaonta. Molo so martangiang be hita di ngolunta on, tontu ndang na marhosa dope haporseaonta, jala dos ma i naung “mate”.

Songon uluan si Raja Salomo di bangso Israel na manangiangkon bangso na nirajaanna i, sai songon i ma hita angka uluan nang natoras manangiangkon angka na pinasahat tu hita be (keluarga nang ianakhon), anggiat dipasupasu Debata.

Napatoluhon: Dung sidung Raja Salomo martangiang, dipasahat ibana ma pasupasu (mamasumasu sandok luhutan Israel – adong disi hata “sandok”).

Na marlapatan: tu sude do pasupasu i dipasahat, ndada tu piga-piga halak, jala ndada holan tu dirina sambing, alai tu sandok bangso i do.

Di hita na pungu di inganan on: HATA aha do na jumotjot haruar sian pamanganta on? PASUPAU do manang BURA? Pasupasu do manang hata barangsi? Pasupasu do manang gabus? Pasupasu do manang rehe-rehe? Pasupasu do manang PUSAPUSA? Pujipujian tu Debata do manang pangaloon? Naeng do pamangan on mandok angka hata na denggan nang asa rap tarpasupasu sude hita.

Napaopathon: Pasupasu aha do dipasahat tu bangso i? Sai didongani Jahowa ma hita, sai unang ma ditadingkon Jahowa hita (ay. 57).

Di hita sude na pungu on: pasupasu ni Debata na sahat tu Bangso Israel marhite Raja Salomo, laos pasupasu i do muse na dipasahat tu hita: Nunga dipasupasu Debata hita di taon 2015 on, nang pangidoan sai dipasupasu jala didongani Jahowa ma hita di taon 2016, sai unang ma ditadingkon Jahowa hita.

Napalimahon: Aha ma na naeng patupaonta, dung tajalo pasupasu i, dung taboto paboa ndang adong Debata na asing dungkon ni Debatanta i? Manang aha ma na gabe tanggung-jawab haporseaon di hita?

Ayat 56 Pinuji ma Jahowa, naung mangalehon hasonangan. Ala ni i, puji ma tongtong Jahowa naung mangalehon hasonangan di ngolunta on. Unang tung halupahon denggan ni basaNa i.

Aha ma muse na gabe tanggung jawab di hita?

Ayat 58 mandok: asa marparange hita di saluhut dalanna huhut mangaradoti angka tonana dohot patikna dohot uhumna.

Tanggung jawab di hita ganup, dung tajalo pasupasu i, i ma: sai marparange na denggan ma hita tu joloan on jala taradoti angka patikNa. Jadi pasupasuonNa ma hita ganup ari, arian nang borngin.

Amen.