1 RAJA-RAJA 17 : 8 - 16

1 RAJA-RAJA 17 : 8 – 16

17:8   Dung i ro ma hata ni Jahowa tu ibana songon on:

17:9   Borhat ma ho laho tu Sarpat na mardonokkon Sidon, maringan disi ma ho; ida ma, nunga hudokkon sada parompuan na mabalu disi marmudu ho.

17:10 Dung i borhat ma ibana laho tu Sarpat; jadi dung sahat ibana tu harbangan ni huta i, ida ma, adong ma disi sada parompuan na mabalu na marsobansoban. Dung i joujou ma si Elia mandok tu nasida: Ua alap di ahu aek i otik di bagasan tabutabu on, asa minum ahu.

17:11   Alai dung laho nasida naeng mangalap, joujou muse ibana mandok tu nasida songon on: Ua buat di ahu santopik sagusagu di bagasan tanganmu.

17:12 Alai ninna parompuan i ma: Songon sintong na mangolu Jahowa, Debatam, ndang adong sagusagu di ahu nanggo sada, nda holan itak sampohul di bagasan hudon, angkup ni miak otik di bagasan guriguri, jala ida ma, na marsobansoban do ahu, asa laho ahu paulihon itak i di ahu dohot di anakki, asa mangan hami na dua dung i mate ma.

17:13 Alai ninna si Elia ma tu nasida: Unang ho mabiar, laho ma ho, bahen ma songon na nidokmu, alai pauli di ahu jumolo sian i sada sagusagu na metmet, jala boan tu ruar di ahu, dung pe i asa pauli di ho dohot di anakmu.

17:14 Ai songon on do hata ni Jahowa, Debata ni Israel: Ia itak na di bagasan hudon ndang olo suda, jala miak na di bagasan guriguri ndang jadi marsik, paima jumpang ari haroro ni udan tongoson ni Jahowa tu sisik ni tano on.

17:15 Dung i laho ma parompuan i, dibahen ma songon na nidok ni si Elia, gabe mangan nasida, nang ibana nang parompuan i ro di isi ni jabuna ariari.

17:16 Ia itak na di bagasan hudon ndang olo suda, jala miak na di bagasan guriguri ndang olo marsik, hombar tu hata ni Jahowa, naung pinaboana hian marhite sian si Elia.

HITA ANGKA DONGAN…

Elia na marlapatan Jahowa do Debatangku. Tingki i, si Ahab ma na gabe raja ni bangso Israel jala inanta ni si Ahab margoar Izebel. Masa ma hatiha i ari logo/kemarau, mahiang ma nasa tano dohot suansuanan, gabe masa ma haraparon, saleleng tolu satonga taon.

Dipabotohon si Elia ma tu si Ahab, paboa masa ma ari logo na mansai leleng, molo so muba pangalaho ni bangso Israel. Aha huroha pangalaho ni Israel? Nunga marbalik be roha nasida sian Debata Jahowa, gabe marsomba tu ganaganaan Asyera (16:32-33).

Boasa boi bangso Israel gabe marsomba tu ganaganaan i? Ala unduk Raja Ahab tu inantana, na mangarahon marsomba tu ganaganaan. Ujungna gabe mangihut ma bangso Israel marsomba tu ganaganaan. Disi do ro paminsangon ni si Elia tu Raja Ahab, asa marhamubaon jala mulak ma tu jahowa. Alai molo so mulak be nasida tu Jahowa, masa ma ari logo (kemarau panjang / ndang ro be udan dohot ombun).

Disuru Debata ma si Elia morot tu tu topi ni sunge Karit, jala maringan ibana disi hira-hira sataon. (Di bagasan na sataon i, sai ro do pidong sigak manaruhon juguk dohot sagusagu manogot dohot bodarina i, jala sian sunge i ma si Elia minum.

Sahat tu na marsik sunge i ala so ro be udan, disuru Debata ma muse si Elia borhat tu huta Sarfat, di jabu ni sahalak na mabalu. Tongon do marsoban-soban na mabalu i jumpangna. Dijou si Elia ma na mabalu i, mandok: lehon di ahu aek asa minum ahu. Dung dilehon aek i, didok si Elia ma muse: ua bahen di ahu santopik sagusagu, asa mangan ahu.

Alai dialusi parompuan na mabalu i ma: songon sintong na mangolu Jahowa Debatam, ndang adong di ahu sagusagu, so holan itak sampohul dohot miak otik. Na marsoban do ahu asa hupature di hami sipanganon, dung i mate ma.

Alai ninna si Elia ma: UNANG HO MABIAR, patupa ma jumolo di ahu. Ai didok Jahowa do: itak na di bagasan hudon ndang olo suda, jala miak na di bagasan guriguri ndang jadi marsik, paima jumpang ari haroro ni udan tongoson ni Jahowa tu sisik ni tano on.

Dipatupa parompuan i ma songon nanidok ni si Elia i. Gabe mangan nasida. Tutu, itak na di bagasan hudon ndang olo suda, jala miak na di bagasan guriguri ndang olo marsik,

HITA ANGKA DONGAN…aha do na boi dapot hita sian jamita on:

Naparjolo: dipillit Debata do si Elia gabe parhalado-Na, mamboan hata hatigoran na sian Debata. Ndang hea manjua pamangan ni si Elia manulak parsuruon ni Debata, laho maminsang nasa na sala i. Jala ndang manjua muse si Elia dung didok Debata asa morot ibana tu topi ni sunge Karit.

Nuaeng pe di hita parhalado, na dipillit Debata, ringkot do hita bulus mangulahon haparhaladoon on songon si Elia. Ida ma, di angka na bulus mulaulaon, sai na urupan ni Debata do i di ngoluna.

Napaduahon: Marhuaso do Debata marmudu-mudu ngolunta molo pos roha di Debata. Disuru Debata do pidong sigak mamboan sagusagu dohot juhut laho panganon ni si Elia. Hape pidong sigak, i ma pidong na mansai mongkus di sipanganon (memakan bangkai), jala na haram do pidong on molo di halak Jahudi. Alai bulus do roha ni si Elia manghasabamhon na binoan ni pidong sigak i. Boi do hita manghasabamhon nasa na adong di hita nuaeng on?  

Napatoluhon: di tingki susah, memang maol do hita marsilehon-lehon, manang maol do hita masiurupan. Alai, ringkot do hita marnida jala maniru namabalu on. Lehon ahu minum, ninna si Elia. Jala bulus do na mabalu i mangalehon siinumon, hape ari logo do di tingki i. lehon ahu mangan, ninna si Elia. Alai ninna parompuan i ma: Songon sintong na mangolu Jahowa, Debatam… Sungkun-sungkun di hita: Debata ni ise do didok parmpuan i? Debata ni si Elia.

Berarti, olo do ra, ndang dohot parompuan i marsombahon Jahowa. Ai didok ibana do: Debatam. Ndang adong sagusagu di ahu nanggo sada, nda holan itak sampohul di bagasan hudon, angkup ni miak otik di bagasan guriguri, jala ida ma, na marsobansoban do ahu, asa laho ahu paulihon itak i di ahu dohot di anakki, asa mangan hami na dua dung i mate ma.

Na marlapatan: ndang digabusi na mabalu i aha na adong di ibana. Bulus do rohana paboahon keadaanna dohot anakna i. “Ia dung mangan hami, mate ma”. Alai dipapos si Elia ma roha ni na mabalu i: itak na di bagasan hudon ndang olo suda, jala miak na di bagasan guriguri ndang jadi marsik, paima jumpang ari haroro ni udan tongoson ni Jahowa tu sisik ni tano on.