1 SAMUEL 16 : 1 - 13 DIPILLIT JALA DIMIAKI DEBATA

1 Samuel 16 : 1 - 13

Topik: Dipillit jala dimiaki Debata.

16:1  Dung i ninna Jahowa ma tu si Samuel: Sadia leleng on ho marsak taringot tu si Saul, naung pola hubolongkon, asa unang be raja ibana gumomgom Israel? Gohi ma sahanmu dohot miak, jala laho ho, naeng suruhononku ho tumopot si Isai, isi ni Betlehem; ai nunga hupillit di Ahu sada sian angka anakna bahen raja.

16:2 Dung i ninna si Samuel ma: Songon dia ma langkangku tusi? Ai begeon ni si Saul ma barita i, jadi bunuonna ma ahu. Dung i ninna Jahowa ma: Togutogu ma anak ni lombu sada, jala dohononmu ma: Laho mamele tu Jahowa do ahu umbahen na ro.

16:3 Ingkon pioonmu huhut si Isai tu pamelean i, dung i Ahu pabotohon tu ho manang aha sibahenonmu, ingkon miahanmu di Ahu manang ise sidohononku tu ho.

16:4 Dung i dibahen si Samuel ma na nidok ni Jahowa, jala sahat ibana tu Betlehem. Jadi tarsonggot situtu ma angka sintua ni huta i manjumpangkon ibana, huhut didok: Hata hademakon do na hinarohonmu?

16:5 Dung i ninna ibana ma: Hademakon do! Laho mamele tu Jahowa do ahu umbahen na ro. Manguras ma hamu, asa ro hamu donganku tu pamelean i! Dung i diuras ibana ma si Isai dohot angka anakna, laos dipio nasida tu pamelean i.

16:6 Jadi dung masuk nasida, dibereng ibana ma si Eliab, gabe ninna rohana ma: On do huroha simiahan di jolo ni Jahowa!

 16:7 Alai didok Jahowa ma tu si Samuel: Unang ho mamereng tu rupana, manang tu tongam di dagingna, ai nunga hubolongkon anggo ibana, ai ndada marguru tu parnidaan ni jolma; ianggo jolma rupa do na niidana, alai anggo Jahowa roha di bagasan do na niidana.

16:8 Dung i dijou si Isai ma si Abinadab, jala didokkon ibana mamolus sian jolo ni si Samuel; alai ninna si Samuel ma: Ibana pe ndang na pinillit ni Jahowa.

16:9 Dung i didokkon si Isai ma si Samma mamolus, alai ninna si Samuel muse ma: Ibana pe laos na so pinillit ni Jahowa do.

16:10 Jadi songon i didokkon si Isai pitu angka anakna mamolus sian jolo ni si Samuel; alai ninna si Samuel ma tu si Isai; ndang adong na pinillit ni Jahowa sian nasida i.

16:11  Dung i ro muse hata ni si Samuel tu si Isai: Holan on do angka anakmu? Dung i ninna ibana ma: Tinggal dope ianggo siampudan i, jala ida ma, marmahan birubiru do ibana. Jadi ninna si Samuel ma tu si Isai: Suru ma mangalap ibana; ai ndang tagamon hundul hita laho mangan, nda jolo ro ibana tuson.

16:12 Jadi disuru ma na mangalapi ibana. Alai tarrara do dagingna, uli dohot rupana sorur do ro di panailina. Dung i ninna Jahowa ma: Hehe ma ho, miahi ma ibana, ai i ma ibana!

16:13 Jadi dibuat si Samuel ma sahan parmiahan i, jala dimiahi ibana di tongatonga ni angka hahana. Dung i songgop ma Tondi ni Jahowa tu si Daud olat ni na sadari i dohot tu jolo on. Dung i borhat ma si Samuel laho mulak tu Rama.

HITA ANGKA DONGAN…Pintor tapahombar ma tu ngolunta be, sada na so itahalomohon masa di ngolu on, i ma: MARSAK. Marragam do sibonsiri ni na marsak. Boi do gabe marsak natoras ala ni tilaha, manang parungkilon na ro. Boi do marsak ala ni na agoan arta. Boi do muse gabe marsak ala ndang jumpang na sinangkapan manang na hinirim. Na deba marsak ala pangalaho ni anakhon na so denggan. Na deba marsak ala ni hapogoson manang na sinadongan na so ada.

Na masa tu Nai Malliting, pola sai marsak ibana ala adong sihirimonna. Na burju do amantana. Dipamanat Ama ni Malliting ma muse inanta i. Ai dung sai marsak ho huparrohahon, songon na marsak ho Nai Liting? du…

Songon i do nang si Samuel, tongon di bagasan arsak ni roha. AHA DO NANIARSAKHONNA? (HAD…Samuel i ma sahalak MALIM (Imam). Alai si Saul ma na gabe raja ni bangso Israel. Di sada tingki, uju harajaon ni Saul, disuru Debata ma si Saul manguluhon bangso Israel marporang mangalo bangso Amalek angka sipelebegu i. Parenta ni Debata: saluhut nasa jolma nang pangisi ni huta Amalek, ingkon siaphonon. Unang adong na tading.

Hape, dung monang si Saul, ndang sude dirasiphon ibana pangisi ni huta Amalek. Alai diboan ibana ma raja ni halak Amalak i na margoar Agag rap dohot angka arta nang pahan-pahanan na denggan, asa pelehononna tu Debata. Disi do parmuruk ni Debata tu si Saul: Ai Debata sijalo pelean na marharoroan sian taban-taban do AHU? Ninna Jahowa.

1.     Siboto roha do Debata (Sadia leleng on ho marsak?). Manang aha pe na di bagasan rohanta, diboto Debata do i. Manang na denggan, manang tahi na roha, diboto Debata do i.

2.    Tongtong marpanungkun tu Debata (Songon dia ma langkangku?).

3.    Umbotoan do Debata patuduhon dalan asa boi malua jolma sian arsakna be (Pat. ay 2).

4.    Molo jolma, pardompakn do jumolo diparrohahon, alai Debata ndang marnida bohi. Roha parbagasan do tahe. Jadi na marminggu on pe hita, ndang na laho patuduhon bohi.

5.    Torop do na tarjou, otik do na tarpillit (8 na tarjou, alai sada do na tarpillit). Sungkun-sungkun: na tarjou do hita jala na tarpillit? - 1 Petrus 2 : 9 Alai marga na pinillit do hamu, haMALIMon na raja, bangso na badia, houm na ginomgomanna, asa tung dibaritahon hamu denggan ni harohaon ni Ibana, naung manjou hamu sian na holom tu hatiuronna halongangan i.

6.    Ndang adong na boi mangambat hasahatan ni pasupasu ni Debata (ay.8). Pamilliton ni si Daud, saluhut do i hinorhon ni huaso ni Debata. (Suru ma mangalap ibana, ay 11).

7.    Unang leas rohanta tu dongan jolma. Ala siampudan si Daud, gabe loja-loja marmahan ulaonna. Hape i do dalan ni Debata paradehon si Daud marmahan bangso Israel muse.

8.    Molo tarpillit hita manuhuk ulaon manang aha pe (ulaon na denggan), unang pola dihaginjangkon nasa haboionna nang rohana be. Alai sai burju ma mulaulaon jala sai dihamauliatehon ma i.