1 Korint 1 : 18 - 31

1 KORINTUS 1 : 18 – 31

1:18    Ai haotoon do hata na taringot tu silang i di roha ni angka na laho mago; alai hagogoon ni Debata do i di hita na dapotan haluaon.

1:19    Ai na tarsurat do: "Huagohon habisuhon ni na bisuk jala hubolongkon roha ni parroha."

1:20    Didia ma na bisuk? Didia ma sibotosurat? Didia ma parsinabul di tano on? Nda gabe haotoon habisuhon ni portibi on dibahen Debata?

1:21    Ai mangihuthon habisuhon ni Debata, ndang ditanda portibi on Debata marhite dalan habisuhon; gabe dihalomohon Debata ma paluahon angka na porsea i marhitehite jamita haotoon.

1:22    Ai na mangido tanda do anggo halak Jahudi, jala mangalului habisuhon do ia halak Junani.

1:23    Alai Kristus na tarsilang i do hujamitahon hami; pargasipan do i di halak Jahudi, haotoon di sipelebegu.

1:24    Alai di angka na tarjou i, nang Jahudi, nang Junani, gabe hagogoon ni Debata dohot habisuhon ni Debata do Kristus i.

1:25    Ai umbisuk do haotoon ni Debata asa angka jolma i, jala gumogo do hagaleon ni Debata asa angka jolma i.

1:26    Bereng hamu ma, angka dongan, panjouonna di hamu: Ndang piga hamu na bisuk mangihuthon sibuk, ndang piga na gogo, ndang piga na sangap hian.

1:27    Alai na oto di roha ni portibi on dipillit Debata, laho pailahon angka na bisuk; jala na gale di portibi on dipillit Debata, laho pailahon na gogo.

1:28    Angka na teuk di portibi on jala na marlea dipillit Debata: Tung sisoada i do, asa soadahononna naung jongjong hian,

1:29    asa unang manenganenga agia ise jolma maradophon Debata.

1:30    Alai sian Ibana do umbahen na di bagasan Kristus Jesus hamu, ai Ibana do gabe habisuhon di hita sian Debata dohot hatigoran dohot habadiaon dohot haluaon.

1:31    Asa saut na tarsurat i: "Na naeng mamuji dirina, mangasahon Tuhan i ma ibana mamuji!

Huria ni Tuhanta...

Adong do dua hagogoon na sai manait jolma di ngoluna be. Naparjolo i ma “hagogoon” ni hagiot ni portibi on”, jala napaduahon i ma “hagogoon ni Debata”. Adong do jolma na mura tarela/tartait jala manggomol parbinotoan nang habisukon ni portibi on. Alai laos adong do jolma nang na manghasiholi gogo ni Debata maringan di ngoluna.

Huria ni Tuhanta...

Dilehon turpuk on do tu hita dua gombaran pangalaho ni jolma. Naparjolo mai sian halak Jahudi, dung i pe napaduahon sian halak Junani. Aha do huroha na mansai tangkas botoonta sian sifat ni halak Jahudi? Memang, ingkon okuhononta do, paboa bangso na malo jala na gogo do halak on, bangso na tarpasupasu, bangso na tarpillit. Bangso na makmur jala mamora. Bangso na boi manaluhon angka musu marloksa-loksa.

Gabe so dietong be angka hasurungan i na songon sibasa-basa/pasupasu sian Debata. Ujungna patubu ginjang ni rohana ma ala ni angka hasurungan i. Molo nunga tubu ginjang ni roha, boi do gabe “leas” roha marnida angka na asing na so sarombang dohot iba hape.

Mansai tangkas do di parningotan ni bangso Jahudi na “mengagungkan” Raja Daud. Jala sai masihol do bangso Israel na ingkon ro ma muse Raja na songon si Daud gogona. I ma MESIAS na sai dipaima i. Hape ro ma Jesus di bagasan haserepon. Tubu di bara ni pinahan. Hundul di atas halode, ndang mamboan podang, paheanNa pe biasa-biasa.Keluargana pe angka na pogos.

Ala ni i do sai jotjot ma “marsual” halak Jahudi maradophon Jesus. Nang pe sai jotjot di jolo ni simalolong nasida dipatupa Jesus angka halongangan, alai ndang porsea halak i di Jesus na gabe Mesias. Dipamalum angka na pangpang, na ngungu, na huliton, na mapitung, na nengel, sahat tu pangolu naung mate.

Alai sai tong do ndang porsea halak i. Maksud ni halak i, ingkon marporang ma Jesus maniop podang, laho manaluhon musu, i ma halak Romawi, ala topet hatiha i bangso Jahudi dijajah Romawi (i ma tanda na nidok ni ayat 12 i). Patandahon ma jo tu hami, na boi Ho manaluhon musu. Patandahon ma jo tu hami, na boi Ho pamatehon angka bangso penjajah. Patandahon ma jo tu hami “ha-Mesiason-Mi” molo na tutu do Ho Mesias.

I do umbahen na sai mangido tanda halak Jahudi. Sahat tu hau pinarsilang, sai mangido tanda dope halak Jahudi, mandok: palua ma jo diriM sian silang i, molo na tutu Ho Mesias. I do umbahen na so porsea halak Jahudi di Jesus naung ro gabe Sipalua.

Mamungka sian pamilliton ni bangso Israel pe, sai jotjot do halak on mangido tanda sian Debata, hape nunga di tonga-tonga nasida be TANDA i. Isarana “dipalua Debata nasida sian parhatobanon Misir, dilehon Debata mangan Manna saleleng di pardalanan (halongonan), diondingi marhite api na marsijongjong molo tingkii borngin, diondingi marhite ombun na marsijongjong molo tingki arian, diondihon nasida sian ngka parporangan saleleng di parhorsikan, minum aek sian batu, diida halak i do na bola dua laut rara, i do angka TANDA i.

Sahat tu na ro Sipalua i, i ma Jesus na gabe TANDA na mansai patar, tangkas, nalnal. Alai sai dipangke halak i do hagogoon ni pingkiran mangalapati i sude, ndada gogo ni haporseaon. Sai naeng do songon si Daud nian Mesias di halak i na gogo marporang, na boi manaluhon musu marloksa-loksa.

Nang halak Junani pe, ala di halak on do habisukon ni parbinotoan, sai mangasahon logika/habisukon do nasida mangalapati haroro ni Mesias i.Molo hea dibege hamu, sian halak on do haroroan ni angka filsafat ilmu. Jadi mereka melihat segala sesuatu dari sudut ilmu pengetahuan.

Adong do pangantusion ni halak on, songon on: Di banua ginjang ma i, inganan ni angka na Badia (inganan ni angka dewa – Zeus, Hermes, Olympus, dna). Jala banua toru on inganan ni angka jolma na tardok ramun. Ndang mungkin Debata na Badia i olo marsaor dohot portibi na ramun on. Ndang mungkin Debata na Badia i, olo gabe jolma jala tarsilang. Jadi haotoon do di nasida barita ni silang. I do na sai manggoki roha nasida.

I do umbahen na didok di ayat 18 i, haotoon do hata na taringot tu silang i. Ala memang, pangantusion ni jolma hatiha i, angka na tarsilang i ma jolma panamun, na gok dosa nang hasalaan dohot naung hona “kutuk”. Ndang adong be “pembelaan” tu angka jolma na tarsilang. I do hata ni ayat 23: Alai Kristus na tarsilang i do hujamitahon hami; pargasipan do i di halak Jahudi, haotoon di sipelebegu. (dos do gabe sipelebegu angka na sai marguru tu pingkiran, na so porsea di Debata).

Jadi sai sipangke Jahudi nang Junani ma gogo ni habisukon dohot pingkiran mangantusi dalan ni Debata. Sai didok halak on ma: Angka na oto do Kristen i, olo marsomba tu naung tarsilang. Olo porsea tu Jesus naung hona uhum. Olo porsea tu Raja na tubu di bara ni pinahan. Ndang na mandok na so marguna pingkiran. Marguna sahali do pingkiran.

Alai, ndang tuk pingkiran i mangalapati sude Hata nang pambahenan ni Debata. Pikiran tidak sanggup menguasai seluruh Firman Allah, tetapi sebaliknya pikiran-lah yang harus dikuasai oleh Firman Allah. Boi do jolma gabe “rintik” molo sai holan mangasahon pingkiran mangalapati Hata ni Debata.Yesaya  55:8 Ai ndada pingkiranku pingkiranmuna i, jala ndada dalanmuna angka dalanku, ninna Jahowa.

Ala ni i do ndang dipaksahon Debata pasahathon Hata-Na tu angka na so manjangkon Hata i. Dipangke Debata ma angka jolma na dietong portibi on na so margogo, na dietong portibi on na gale, na dietong portibi on na so mardiha-diha. Dipillit jala dipangke Debata ma nasida “manghuntam” pamangan ni na mangetong dirina i bisuk (ay 27-28). Asa beha? Asa unang manenga-nenga agia ise jolma maradophon Debata (ay 29).

Hamu angka dongan na hinongkop ni Tuhan Jesus, molo taida sian turpuk on tu parngoluonta sinuaeng on, naeng hita dipaingot turpuk jamita on, mandok tu hita:

1. Dipillit Debata do bangso Jahudi gabe bangso-Na. Dilehon hamaloon, parbinotoan, habisukon, hamoraon nang gogo, alai gabe balik do muse dipangke nasida habisukon i mangalo Debata marhite na manulak jala mamparsilangkon Jesus na gabe Mesias. Ala ni i do gabe tu angka na so mardiha-diha do dipasahat Debata sahala laho pararathon barita na uli i.

2. Nuaeng dipillit Debata pe hita gabe angka naposoNa laho pararathon barita na uli i, ala ni huasonta sambing do i? Ala na so adong do sipangasahonon sian ngolu on, dilehon Debata ma bisukna i di hita ganup, di angka na manghaporseai Kristus. “Molo dipillit Debata jala dipangke pe hita di portibi nang di huria-Na, etong ma paboa habisukon ni Debata do na adong na di hita i”.

Sahali nari, molo adong pe parbinotoanta, marguru tu ayat 30 i, alai sian Ibana do umbahen na di bagasan Kristus Jesus hamu, ai Ibana do gabe habisuhon di hita sian Debata dohot hatigoran dohot habadiaon dohot haluaon.Ndang na gabe ugasanta i, ndang na gabe tahaginjangkon i, ndang na gabe tatenga-tengahon i, ndang adong be alasanta mardandi.Justru itu menjadi utang kita, molo so tapangke habisukon ni Debata i tu hadengganon manghobasi Ibana (ai Ibana/Jesus do gabe habisuhon di hita).

Saleleng taetong dope i haboionta sambing, dos dope hita songon na bisuk ni portibi on. Saleleng taetong i gabe sipangasahononton, dos dope hita disi songon na mansoadahon Debata.Molo songon i dope pangantusionta, boi do muse dipangke jala dipillit Debata jolma na asing laho pailahon hita (mulak muse tu ayat 27 i).

Ala ni i angka dongan, sai margogo ma hita sude mamangke bisuk na sian Debata i. Nang pe didok halak i gabe haotoon, alai taingot ma angka dongan (18 i), hagogoon ni Debata do i di hita na dapotan haluaon. Amen.