Sermon 1 Korint 2 : 6 - 16

SERMON PARHALADO HKBP RESORT SION NAULI

Tu Minggu 05 Februari 2017: 1 KORINT 2 : 6 – 16

Topik: Manjalo habisuhon ni Debata.

2:6   Alai habisuhon do huhatahon hami di angka naung rimpas; alai nda tung habisuhon na di portibi on, manang habisuhon ni partogi ni portibi on, angka na laho salpu.

2:7    Habisuhon ni Debata do tahe na simo jala na buni, naung dipaojak Debata hian sian mula ni mulana bahen hasangaponta.

2:8   I ma na so ditanda agia ise sian angka partogi ni portibi on; ai aut ditanda, ndang tagamon parsilangkononna Tuhan na marsangap i.

2:9     Saut do na tarsurat i: "Na so dung niida ni mata, na so dung binege ni pinggol, na so dung hehe di bagasan roha ni jolma, i do diparade Debata di angka na mangkaholongi Ibana."

2:10    Alai dipapatar Debata do i tu hami marhite sian Tondi i. Ai sude do didodo Tondi i, ro di angka hasimoon ni Debata.

2:11   Ai ise jolma umboto na di jolma i, ia so tondi ni jolma na di bagasan ibana? Suang songon i: Ndang adong na tumanda na di Debata, ia so Tondi ni Debata.

2:12   Alai ndang hujalo hami tondi portibi on; Tondi na sian Debata do, asa dapot botoonnami na binasabasahon ni Debata tu hami.

2:13   Jala i do huhatahon hami, ndada di bagasan hata habisuhon ni jolma na targuruhon, tung na pinodahon ni Tondi do, laho manimbangi angka partondion mangihuthon ruhut ni tondi.

2:14    Ndang tarjalo jolma hian na sian Tondi ni Debata, ai haotoon do i di rohana; ndang tartandasa i, ai partondion do mandodo i.

2:15    Alai saluhutna i didodo partondi; alai ndang tardodo manang ise anggo ibana.

2:16    Ai ise ma naung tumanda roha ni Debata, asa ajaranna Ibana? Alai roha ni Kristus i do anggo di hami.

PATUJOLO.

Tarbarita do huta Korint na mansai ribur. Didok huta na ribur ala “Kota Pelabuhan” do huta i dohot “Kota Partiga-tigaan”. Marroan ma tu huta i angka partiga-tiga sian desa na ualu angka na marimbar paradatonna, jala na deba laos gabe tinggal do di huta i. Alai ndada holan ala nii umbahen na gabe tarbarita Huta Korint, adong do i muse deba ala di huta i do pamusatan ni parsiajaran, “Kota Olahraga”, jala Inganan Parsombaon tu “Dewa Cinta-AFRODITE”. Gabe mangkorhon ma i muse tu angka pangalaho ni luat i, patubu angka parmabuhon dohot pangalangkupon. Ala nii do dipasingot Apostel Paulus angka ruas ni Huria Korint asa unang gabe sarombang nasida dohot angka ulaon haportibion, dipasiding ma i saluhutna ai sai mangkorhon tu hajahaton dohot dosa do angka pangalaho si songon i.

HATORANGAN.

Jotjot do hita hurang manghilalahon na adong Tondi Parbadia. Songon dia do nuaeng gogo ni Tondi Parbadia on, jala songon dia muse ma hataridaan ni gogoNa i. Tabereng ma ngolu ni si Paulus.

Di tingki so porsea dope ibana di Kristus, margoar ma ibana si Saulus. Jala tarbarita do on sahalak silele Kristen. Nunga tung torop halak Kristen i dipamate on. Jala molo dibege on barita ni halak Kristen i, pintor hatop do on manjalahi asa pusaonna (tangkap dan bunuh).

Fakta na asing muse, ia si Saulus ndang tarbilang i sisean ni Jesus na sampulu dua i. Boi dohonon, ndang hea pajumpang si Paulus dohot Jesus adop bohi, (tidak pernah bertatap muka, sama halnya dengan kita semua). Alai, gumodang do surat ni si Paulus di Bibel i martimbangkon sisean ni Jesus na sampulu dua i. (ndang na mandok na ummoto sisean na sampulu dua i martimbangkon si Paulus).

Dison ma naeng botoonta, na mangula jala margogo do Tondi Parbadia. Ndang gogo ni jolma mambahen ibana gabe siparbarita, alai gogo ni Tondi Pabadia do. Hita pe saluhut, ndang gogo ni jolma mambahen hita gabe siihuthon Kristus, nang pe hataridaanna gumodangan do hita gabe kristen ala natorasta be nunga jumolo kristen. Alai Tondi do na mangula disi.

I do na naeng dohonon ni Paulus di turpuk on, “ndang gogongku” na hupatujolo, manang ndang habisukon ni jolma na hupangasahon. Ai habisukon ni jolma, na laho salpu do i saluhut (ay. 6c). Alai habisukon ni Debata do na hupangasahon jala na hupabotohon tu hamu.

Ala ni i do, ndang tardodo ni jolma habisukon ni Debata na di bagasan Tondi i. Alai Tondi i, marhuaso do i mandodo hita jolma. Termasuk si Paulus na di roro ni Tondi i gabe siseanNa, ndada na gabe si Paulus na mandodo Tondi.Jala nunga dipaojak Debata hian i sian mula ni mulanabahen HASANGAPONTA. (Jadi mansai arga do angka na pinatupa si Debata di hita jolma, ala hita ma na unsangap sian saluhut na tinompaNa).

Alai mago do hasangaponta i, ala: ndang adong nanggo sada hita jolma na mananda i. Ndang adong nanggo sada hita jolma na mangoloi i. Ndang adong nanggo sada hita jolma na unduk tusi, gabe taPARSILANGKON do Ibana, i ma Jesus i (jaha ay. 8). Hape sian mula ni mulana nunga diparade Debata i di hita, ALA: (diparade Debata di angka na mangkaholongi Ibana, 9c).

Molo tahaholongi sasahalak, sai tagogo do patupahon na dumenggan tusi. Tahaholongi pardijabunta be, tapatupa ma na dumenggan tusi. Tahaholongi parsinondukta be, tapatupa ma na dumenggan tusi. Dang huboto atik tung beha adong sian hita on na patupahon na dumenggan tu dongan sabagas ni halak? Tahaholongi anakta be, jadi tapatupa do na dumenggan tusi olat ni na tolap.

Debata pe songon i do tu hita jolma. Dilehon Ibana do na ummarga i tu hita asa malua hita sian dosa, Ima Anak sasada-Na i Jesus Kristus (Joh. 3 : 16). Alai tong do i ditulak jolma i. Tong do maol jolma i manjangkon I sahat tu tingki on. I do umbahen na sai digogo Apostel Paulus mandok, ndang na habisukonhu na hupatupa, jala ndang habisukon ni portibi on, alai habisukon ni Debata do i (ay. 12).

Nuaeng taida ma di ngolunta be. Contoh: molo tung pe adong taboan piga-piga halak naung gabe porsea di Kristus, unang taetong i ala ni gogonta, hamaloonta, manang haboionta. Alai na mangula do Tondi Parbadia marhite-hite ho. Boasa olo Tondi i mangula marhite ho? 1 Korint 6:9 ... Tondi Parbadia na di bagasan hamu. Jadi nunga dipasonggophon Debata be Tondi-Na i di bagasan rohanta be. Na sipata do i hapit ala sai gumodang dope rohanta di haliangi haportibian on. I do na mangajari hita mamboto saluhut angka na binasa-basahonna i tu hita (ay. 12).  Jadi ndang gogonta be na mangula, alai gogo ni Debata do di bagasan Tondi marhite sian hita.

PANIMPULI.

Torop do hita jolma na manggoari dirina Kristen, siihuthon Kristus, alai sai haportibion on dope ditiop. Maralo pingkiran dohot pangalahona sian pingkiran ni Jesus. Gok do jolma na umbotosa hasintongan, alai ndang olo mangulahonsa. Marhite jamita on, disosohon do tu hita ganup, asa unang mansadi jala unang maila patupa angka na denggan.

Boi do dohonon ni portibi on: haotoon do molo mangulahon na denggan (14). Ala ni unang gabe maila hita patupahon i, songon Paulus na so mansadi patupa na denggan nang pe sai direhei portibi on. Pargogoan ni Tondi i do ganup jolma na rade mangalehon dirina mangulahon angka na uli na denggan. Amen.