1 PETRUS 2 : 21 - 25 MANGIHUTHON JESUS

Epistel Minggu, 08 Mei 2011

MISERIKORDIAS DOMINI

1 Petrus 2 : 21 – 25 “MANGIHUTHON  BOGAS  NI  JESUS”

Patujolo

Dokdok do sitaonon na niadopan ni Halak Kristen ala ni haporseaonna di Kristus Jesus, lumobi ala maringan nasida songon PAISOLAT / Halak Dagang di luat na asing ( na so sahaporseaon, na so sabangso, na so saparadatan ). Tusi ma hasahatan ni surat ni si Petrus na parjolo on. Diramoti Debata do huriaNa di bagasan hagogoon marhitehite haporseaon ( 1:5) asa sahat tu haluaon sipapataron di ujungna. Ringkot do jaloon hagogoon i, ala “manaon satongkin” di bagasan ragam ni pangunjunan. Diloas Debata do i masa, asa “taruji” haporseaon i, na andul ummarga sian sere na so manahan. Asa tardok na tutu haporseaonna, ingkon diuji do i marhite ragam ni ujian ( tapatudos ma tu Rom 5 : 3 - 5 Alai lumobi sian i dope, ai itahalashon do nang angka haporsuhon, ala taboto, dihorhon haporsuhon  i do habengeton  ni roha. Jala dihorhon habengeton ni roha i do hatauon, jala hatauon i do mangkorhon pangkirimon. Alai ndang na murak hita bahenon ni pangkirimon i, ala nunga diusehon tu bagasan rohanta holong ni roha ni Debata marhitehite Tondi Parbadia, naung nilehonNa i tu hita). Di pangungkapon didok “Sai burju ma ho rasi rasa mate, dung i lehononKu ma tu ho tumpal hangoluan, 2:10c. I do pangkirimon na ojak tu haporseaon dohot holong ni roha, paboa di ujung ni haporseaon i, i ma haluaon ni tondi ni angka na porsea ( 1 Petrus 1 : 9 ). Di tingki i, Huta Pontus, Galatia, Kappadosia, Asia dohot Bitinia, masuk do tu gomgoman ni harajaon Rom. Jotjot do masa “pangaleleion” / tindakan kekerasan tu halak Kristen ala ni haporseaon nasida di Kristus. Ditongos apostel Petrus ma surat on, laho patoguhon roha ni angka na marungkil i, unang mandele, alai asa benget jala marpangkirimon di bagasan haporseaon na togu.

Hatorangan ni Turpuk

Ayat 21. Tarjou tu bagasan haporsukon

Ndada didok Jesus angka siihuthon Kristus gabe laos so adong be na porsuk diadopi, alai nasa siihuthon Jesus, disoadahon ma hosanna, dituhuk ma silangna, jala rade ma marungkil. I do na so tarjalo ni si Petrus hatiha naeng ditangkup ma Jesus. Alai dung manaek Ibana tu Banua Ginjang, gabe tarjolma do si Petrus jala rade ibana manaon angka na porsuk ala marbarita na uli. Jala laos i do nang apoapona di turpukta sinueng, maniru pambahenan ni Jesus. Asa ndada pola tarsonggot roha ni angka halak Kristen molo masa angka pangaleleion, diskriminasi, dohot angka penutupan nang pembakaran gereja, ai nunga dipalumbahon hian naeng masa angka sisongon i, jala ingkon masa do i. Di angka na masa i, tatiru ma pambahen ni Jesus: dia ma i?

Ayat 22 - 24. Ibana ma gabe tiruan

Ndang mardosa Ibana, ai na Badia do. Alai “gabe dosa” do Ibana hinorhon ni dosanta na godang i. Ndang jumpang angkal di pamanganNa asa anggiat malua Ibana sian uhumanNa i. Ndang manginsahi di na hona insak, alai songon anak ni birubiru do na tinogu tu pamotongan, so ada pangaloon. Ndang mangasupi (mengancam atau pun dendam) di na manaon na porsuk alai mamasumasu do huhut didok “Ale Amang, sai marpamuati ma rohaM di hajahatonnasida, ai ndang diboto nasida manang aha na niulanasida i”. Ibana ma na mamorsan angka parungkilon dohot angka dosanta, asa taboto maniru angka pambahenanNa i, anggiat gabe togu haporseaonta di na mangadopi angka hamaolon dohot angka pangaleleion.

Ayat 25. Songon birubiru na lilu ( pat. Jes. 53:6)

Dipatorang ayat 25 on do, paboa andorang so parnampunaon ni Jesus hita, sai songon birubiru na lilu do, masitondong dalanna be, mampar, egosentris, dna. Alai mauliate ma di Debata marhite Jesus Kristus, naung manogu jala pasadahon hita di bagasan holongNa i, asa tuk masihaholongan angka na porsea di Jesus. Rade Ibana mangalului hita, laos jumpangNa, dung i ditobus ma angka dosanta asa dapotan haluaon dohot hangoluan hita. Malua sian haholomon, parungkilon, hatahuton, pangaleleion, laos manjalo las ni roha na manongtong i.

Panimpuli

- Maol do manjalo angka parungkilon molo sai taulahon na denggan. Sai dihirim jolma do asa jumpang na denggan molo diulahon na denggan. Ndada baliksa gabe marroan angka insakinsak, pangasupon, angkal, dosa dna na so hinalomohon ni roha. Sai sipata do itadok, “ai holan Jesus do na tuk songon i”, jolma dope iba, so na Tuhan. Olo ma gabe mandele angka jolma na mangulahon na denggan alai laos so adong balos na denggan dapotna molo so tangkas di ibana lapatan ni haporseaonna i. Alai ndada na mangenet balos na denggan anggo Jesus di na patupahon na denggan i. Sada na sipatupaonNa i ma asa malua sude jolma sian dosa nang hamatean.

- Manghaporseai holong ni roha dohot pasupasu ni Debata naung nilehonNa i di hita marhite hamamate ni Jesus manesa dosanta, gabe dihorhon i do panandaion na tangkas di hita asa unduk jala rade mangihuthon bogasNa.

- Manongtong ma manahan di parungkilon. Unang mandele (krisis iman), alai sai tubu ma haporseaon na “tahan uji”, jala disi ma tangkas na marMISERIKORDIAS DOMINI, ai gok asi ni roha ni Jahowa do tano on.

Ilustrasi kotbah : Dapat mengangkat kisah Marthin Luther King. Seorang tokoh pembebas di Amerika, yang menyarakan persamaan hak antara kulit putih dan kulit hitam. Pada akhirnya ia meninggal akibat ditembak mati oleh penembak misterius. Dari mulutnya tidak ada dendam, makian, bahkan perlawanan, tetapi ia mengucapkan sepatah kata yang mulia, “jangan membalas kejahatan dengan kejahatan, tetapi kalahkanlah itu dengan perbuatan kasih”. Silahkan dikembangkan.