1 MUSA 3 : 8 - 15

1 MUSA 3 : 8 – 15 

3:8   Dung i dibege nasida ma soara ni Debata Jahowa, na medangedang di porlak i di haroro ni alogo mareak bot ari, gabe martabuni ma si Adam dohot jolmana i di holangkolang ni hau angka na di porlak i maradophon bohi ni Debata Jahowa.

3:9    Dung i joujou ma Debata Jahowa di si Adam, ninna ma mandok ibana: Didia do ho?

3:10  Jadi ninna si Adam ma: Hubege nian soaraM di porlak i, gabe mabiar ahu, ai marsaemara do ahu, umbahen na martabuni ahu.

3:11  Dung i ninna Debata ma: Ise na paboahon tu ho, na marsaemara i ho? Nda tung dipangan ho sian hau na hupatikkon i mangorai panganonmu?

3:12  Dung i ninna si Adam ma: Boruboru na nilehonmu bahen donganku, i do na mangalehon tu ahu sian hau i, gabe hupangan.

3:13  Dung i ninna Debata Jahowa ma tu boruboru i: Boasa songon i bahenonmu? Jadi ninna boruboru i ma: Ulok i do paotooto ahu, gabe hupangan.

3:14  Dung i ninna Debata Jahowa ma tu ulok i: Ala dibahen ho songon i gumodang ma torungku tu ho sian tu nasa pahanpahanan dohot sian tu nasa na manggulmit di ladang. Butuham na ma jururhononmu, jala orbuk panganonmu saleleng di ngolum.

3:15 Jala bahenonku ma parbadaanmu dohot boruboru i, ro di pinomparmu tu Pinomparna. Ibana mangalisathon ulum, gabe pargutonmu tambihulna.

Huria ni Tuhanta..

Huboan ma jo pingkiranta tu zaman ni si Adam & Hawa. Tabayangkon ma jo nuaeng sahalak ni si Adam di porlak i. Ndang adong donganna masipangkulingan. Dung, ditompa Debata ma sahalak parompuan asa adong dongan ni si Adam. Tarpodom ma si Adam. Dibahen Debata. Dibuat ma sada rusukna jala ditompa ma gabe sahalak parompuan. Ditogihon Debata ma parompuan i tu jolo ni si Adam. Dung diida si Adam parompuan i, mansai las hian do rohana.

Huria ni Tuhanta...

Ringkot jo botoonta, MARSAIMARA do nasida na dua di porlak i. MARSAIMARA alai ndada na MAILA. Boasa ndang maila? Ala HABADIAON ni Debata dope na mangalinggomi nasida. Manghata-hatai nasida nadua di porlak i huhut mardalan-dalan. Didok Debata ma tu nasida: Jadi do panganonmu sian saluhut parbue ni hau na di porlak on. Alai anggo sian hau parbinotoan ni na denggan dohot na roa, ndang jadi panganonmu; ai sadari dipangan ho sian i, sai na MATE do ho. (Olo ompung, ninna si Adam do jalo).

Dung i ro ma sibolis marrumang ulok, ninna ma tu si Hawa:“Atehe tongon do didok Debata, na so jadi panganonmuna sian saluhut hau angka na di porlak on”?Ninna si Hawa ma muse mandok ulok i: Sude do boi panganonnami, alai hau na di parsitongaan ni porlak i, na so jadi panganon, ai mate ma hami. Ninna ulok i ma muse: Ndang na tutu hamu mate. Sadari dipangan hamu sian i, tonggor ma matamuna, gabe doshon Debata hamu umboto na denggan dohot na roa.

Holan umbege hata “ndang na tutu hamu mate, alai gabe doshon Debata ma hamu”, disi do gabe tartait roha ni jolma i. (Ndang mate be, ala doshon tu Debata).

Disi do gabe dibuat si hawa ma parbue i, dipangan jala dilehon tu si Adam. Dung dipangan nasida parbue i, pintor TONGGOR ma mata nasida. Diboto ma hape na MARSAIMARA do nasida. Dung diboto na MARSAIMARA nasida, gabe MAILA ma. Disomoti ma bulung ni hau ara bahen abit nasida.

Huria ni Tuhanta...

Nuaeng nunga be dipangan nasida parbue ni hau i. Sai martabuni ma nasida ala nunga tubu be roha ILA. Ro ma Debata manjou si Adam “di dia do ho”? Alai gabe asing do alusna: Hubege nian soaraM di porlak i, gabe mabiar ahu, ai marsaemara do ahu, umbahen na martabuni ahu.

Dung i ninna Debata ma: Ise na paboahon tu ho, na marsaemara i ho? Nda tung dipangan ho sian hau na hupatikkon i mangorai panganonmu? Ninna si Adam ma muse: Boruboru na nilehon-Mu bahen donganku, i do na mangalehon tu ahu sian hau i, gabe hupangan.

Ninna Debata Jahowa ma tu boruboru i: Boasa songon i bahenonmu?Jadi ninna boruboru i ma: Ulok i do paotooto ahu, gabe hupangan.

Ninna Debata Jahowa ma tu ulok i: Ala dibahen ho songon i gumodang ma torungku tu ho sian tu nasa pahanpahanan dohot sian tu nasa na manggulmit di ladang. Butuham na ma jururhononmu, jala orbuk panganonmu saleleng di ngolum. Bahenonku ma parbadaanmu dohot boruboru i, ro di pinomparmu tu Pinomparna. Ibana mangalisathon ulum, gabe pargutonmu tambihulna.

Huria ni Tuhanta...

Nuaeng, marsorminan ma hita tu na masa di turpuk on, jala pahombaronta ma jamita on tu ngolunta sinuaeng on:

Naparjolo: dimulana i, mansai sonang do ngolu ni si Adam dohot si Hawa. Tidak kurang sesuatu apa pun. Sonang do modom, so loja karejo, holan na ripe mangan do, ala nunga rade saluhut dipatupa Debata. Alai, hinorhon ni hajahaton / dosa na diula, boi do gabe sursar manang harhar hasonangan i. Ngolunta pe boi do songon i, gabe mago hasonangan molo gabe olo hita mangulahon hajahaton. Boi do gabe mago hasonangan molo so diboto mangorom diri. Cth: (Di tingki pegawai biasa amanta i, sonang do keluargana dohot di angka parianakhonon. Alai lam leleng, tamba timbo ma jabatan, songon i nang dohot angka donganna saparkarejon. Ninna inanta on ma tu amantana, dna.......)

Napaduahon: Ninna Debata ma tu si Adam: Didia do ho? Sasintongna, alus tusi i ma: Dison do ahu. Alai asing do alus ni si Adam: Hubege nian soaraM di porlak i, gabe mabiar ahu, ai marsaemara do ahu, umbahen na martabuni ahu. Dung i ninna Debata ma muse: Hujamothon hian do ho nian ale Adam asa unang panganonmu sian parbue ni hau i, hape dipangan ho do. Ro ma alus ni si Adam: Boruboru na nilehon-Mu bahen donganku, i do na mangalehon tu ahu sian hau i, gabe hupangan.

Huria ni Tuhanta....sian angka alus i, nunga dapot hita parsiajaran bahwa si Adam tidak menjadi laki-laki yang bertanggung-jawab sebagai kepala keluarga. Malah sian alus ni si Adam i, disalahon ibana do Debata na mangalehon parompuan i tu ibana: Boruboru na nilehon-Mu bahen donganku, i do na mangalehon tu ahu sian hau i, gabe hupangan.  Sai hira na salah mangalehon Debata tu si Adam. I do umbahen na parjolo si Adam disunggul Debata, ndada si Hawa. Ala si Adam do na gabe uluan ni keluarga nasida, jala ingkon bertanggung-jawab do ibana di na masa i. Hape gabe masipabali-balian halak i, main lempar kesalahan, tidak bertanggung-jawab dan tidak mau terbuka atas kesalahan masing-masing.

Disungkun Debata ma muse si Hawa: Boasa songon i bahenonmu? Pintor hatop do ro alus ni si Hawa: Ulok i do paotooto ahu, gabe hupangan.

Huria ni Tuhanta...Songon i do na gok nuaeng na masa di ngolunta on. Gok nuaeng jolma on na so bertanggung-jawab di angka na niulana. Mencari kambing-hitam, mencari alasan, melempar kesalahan, masipabali-balian. Termasuk do i nang di tonga ni keluarga (ama – ina), boi do gabe sursar keluarga holan ala ni na so adong na patalu roha.

Napatoluhon:unang gabe sala mangantusi hita molo adong disi hata “ulok”. Memang molo tajaha di ayat 1 “Alai ulok do na umbisuk sian nasa na manggulmit di ladang, angka na jinadihon ni Debata Jahowa”. Godang do tanggapan negatif atau tanggapan miring taringot tu ulok on. Adong do hata “manguloki”, “parulok”, “mate-mate ulok” (adong dope diboto hamu tahe?). --- Alai dung dipangan jolma i parbue ni hau i, parjolo do diuhum Jahowa ulok i: “butuham na ma jururhononmu, jala orbuk panganonmu saleleng di ngolum”.Gabe manginsir ma ulok mardalan so habegean. Dipatuduhon i do bangko “kelicikan” ni sibolis, lambok hatana alai marpangait, lambok hatana alai mambahen mago, songon hatana tu si Hawa: Buat ma, tiop ma, jama ma, gomak ma, pangan ma, jala ndang tutu ho mate. alai gabe doshon Debata do ho.

Manisipi songon ulok, i do bangko portibi na mangela jolma asa unang unduk tu Debata. Manisipi, songon i do dosa i manegai parsaoran ni jolma tu Debata. Nian nunga diuhum Debata ulok i gabe marjirir sian na marpat hian. Alai sasintongna, gombaran ni haroro ni Jesus do i, paboa nunga dipasidung Jesus be huaso ni “ulok/dosa” i di hau pinarsilang i.Nunga ropuk be ulu ni sibolis di diropuk Jesus di silang i dohot marhite haheheonNa i.

Haheheon ni Jesus i do na gabe bohal di hita manang mangalehon gogo di hita mangalo dosa nang sibolis. Alai torop do jolma na so olo mamangke gogo na sian Jesus i mangalo dosa. Itu makanya banyak yang TERGODA. I do umbahen na didok di turpuk i “bahenonku ma parbadaanmu dohot boruboru i” / pinomparmu tu pinomparna. Jadi sahat tu sadari on, tong dope hita marporang mangalo dosa. Ise na olo TERGODA/TERGIUR maka iblis akan memperbudaknya. Alai angka na porsea di Jesus, pangke ma huasoNa mangalo sumbia ni sibolis i, asa unang gabe hatoban ni dosa i hita.

Nuaeng dijou Debata ma muse hita, songon na tu si Adam i: Di dia do ho? Taalusi ma gora-gora ni Debata i di bagasan roha na so marpalensem.

Margogo ma hita saluhut.