Sermon 1 Johannes 3 : 18 - 24

HKBP DISTRIK XXVI LABUHANBATU

Jamita tu Minggu XIV Dung Trinitatis, 28 Agustus 2016

1 Johannes  3 : 18 – 24

Topik: Mangaradoti Patik-Na Paboa Naung Mian Di Ibana.

3:18    Hamu angka anaha, unang ma hatanta dohot dilanta mangkaholongi; naeng ma marhitehite pambahenan dohot hasintongan.

3:19    Disi ma botoonta, paboa sian hasintongan hita jala tapapos rohanta di Jolona.

3:20    Molo disolsoli rohanta hita, umbalga do Debata sian rohanta jala diboto saluhutna.

3:21    Hamu angka haholongan, molo so disolsoli rohanta hita, marhiras ni roha do hita maradophon Debata.

3:22    Jadi manang aha pe tapangido, jaloonta do sian Ibana, ala taradoti patikna jadi taula lomo ni rohana.

3:23    On do patikna: Naeng porsea hita di Goar ni Anakna Jesus Kristus, huhut masihaholongan, songon naung tinonahonna i tu hita.

3:24    Siradoti patikna, i do na mian di bagasan Ibana jala Debata di bagasan ibana. Jala sian on do taboto, naung mian Ibana di bagasan hita: Sian Tondi i, na nilehonna i tu hita.

PATUJOLO

Digurithon ma surat 1 Johannes on ala nunga jongjong aliran Gnostisisme na mangajarhon, paboa tondi i ma na denggan, jala daging i ma na jahat / na gok dosa. Ala ni, ndang boi pajumpang na denggan dohot na jahat. I do gabe ditulak nasida haDebataon ni Jesus Kristus. Ai jolma biasa do Jesus, na boi mauas, male, modom, tangis dna. Jala parsoalan na mansai koras dohot hakristenon i ma: ndang dihaporseai punguan Gnostik on na Jesus do Mesias Anak ni Debata na Badia i. Laho mangalo angka poda i, digurithon Johannes ma surat on. Diondolhon ma di surat on: Tondi ni Debata do na mian di bagasan Jesus Kristus naung gabe jolma i. Debata do Ibana na mangarumari diriNa dung i disolukhon ma rupa ni hatoban (Pat. Pilippi 2:7). Ro Jesus di bagasan daging laho patupahon haluaon di angka na porsea di Ibana. Ala nii, dijouhon do angka naung pinalua sian dosa, ingkon mamparbuehon angka parbue ni holong di ngoluna nang tu na humaliang.

HATORANGAN

Ayat. 18 Dua hata na mansai arga: Holong dohot Hasintongan. Na manghaholongi ndada holan di hata, ingkon sahat do i nang tu pangulahonon. Naeng do di na patupahon holong i tarida marhite ulaon na denggan jala di bagasan hasintongan. Molo tuk pe jolma i masihaholongan, ala naung jumolo do jolma i dihaholongi Debata marhite Jesus Kristus, hasintongan i. Ndang tarpatupa hita haholongan molo ndang taparhatopothon paboa Jesus do Anak ni Debata na badia i. Di bagasan Ibana do mian Debata, jala Ibana di bagasan Debata. Dipapatar Debata do holongNa i tu jolma marhite hamateanNa sandiri di bagasan Jesus. Ala tung mansai balga do pangkorhon ni holong di ngolu ni hita jolma, ndang adong na tuk singkop mangulahon i, so holan Jesus. Ala ni, diajari turpuk on ma hita asa maniru pambahenan ni Jesus, na manghaholongi portibi on, ai i do patik na so tarjua siulahononhon molo tingkos ibana siihuthon Kristus. Pola do adong 43 hali disurathon di 1 Johannes on, hata holong ala ni balga dohot hinaarga ni holong i. Naeng ma holong ni roha hataridaan ni parsaoran ni halak Kristen, ala sian Debata do haholongan i. Jala unok dohot pangarimpunan ni Hata ni Debata mamungka sian Padan na Robi sahat tu Padan na Imbaru, i ma holong ni rohaNa.

Ayat. 19. Di bagasan na mangulahon holong i do, maringan jolma i di hasintongan. Dipatuduhon ayat 19 on do i marhite hata “disi ma botoonta, paboa sian hasintongan hita”. Pahothon pos ni roha nang haporseaonta ma hata on paboa tingkos do hita sian Debata. Na mangulahon holong ni roha, dipataridahon i do “ise do hita” jala tu ise do hita porsea. Asa, ndada be ganggu angka na porsea i di na mangulahon holong i, ala hasintongan ni Kristus do na mangonjar na porsea i mangulahonsa.

Ayat. 20-22. Hatiha i, nunga ragat poda ni Gnostik on marhite na sai mangulahon hagiot ni daging, jala mangulahon nasa na boi pasonang roha. Jala marusaho do parpoda on mandok: sala jala mardosa do molo mamparhatopothon na Jesus do Mesias. Hinorhon ni, torop ma na gabe ganggu, lomos, jala sungkun-sungkun, gabe mangonai sahat tu bagasan roha nang ateate. Molo nunga ganggu roha, maol ma manjalo hasintongan i, jala masa ma na manolsoli roha (merasa bersalah). Serangan-serangan yang paling menyakitkan adalah apabila serangan itu ditujukan ke hati, tu roha. Roha parbagasan do pamusatan di pangulahonon dohot panghataion. Molo masa ganggu ni roha, boi do i manghorhon “stress”, maol ma muse porsea. Manang, adong do na porsea, alai holan na porsea sambing. Ndang pos rohana. Hape taboto do, tu roha parbagasan i do inganan parmianan ni Debata marhite angka Hata-Na, gabe taboto ma mangulahon hasintongan di haporseaon tu Jesus. Alai, ndang sae holan na porsea. Ai molo holan i do, sibolis i pe porsea do di Debata, jala angka dotdot do sibolis marnida Debata (Pat. Jakobus 2:19). I do na pinaingot ni turpuk on, tu angka ruas na sai ganggu dope rohana nang tu hita saluhutna, angka na golom ria-ria, porsea ma di Jesus na tuk manesa dosa. (Percayalah, sebab Yesus adalah satu-satunya Juruselamat kita). I do holong ni rohaNa na sun balga i. I do pataridahon na umbalga do Debata sian rohanta. Memang toho do i, sada na pinarsinta ni Debata sian hita i ma, manolsoli diri mananda dosanta. Alai ndang sae be holan na manolsoli diri, ingkon ihut do “perubahan diri”. Manolsoli diri, ingkon na mangihut do muse mangaradoti patikNa, jala rap masihaholongan. Ala angka siradoti patik do na gabe mian di bagasan Ibana jala angka i do na tuk mangulahon holong ni roha i. Marhite panolsolion diri di sude hahurangan dohot hasalaan, disi ma hita sahat tu sada joujou gabe marhiras ni roha mangulahon patikNa. Disi ma jaloonta bagabaga / pasupasu sian Debata. Marhite panghaporseaon na tangkas tu Debata, disi ma sahat hita tu parbinotoan dohot pangantusion “na umbalga do Debata” sian rohanta jala diboto Ibana do saluhut. (Sekali lagi dikatakan, dosa dapat menjauhkan kita dari Tuhan, tapi bagi orang-orang yang menyesali dosanya, semoga dia semakin dekat kepada Tuhan. Ketika orang sudah dekat kepada Tuhan, dengan sendirinya ia akan mencintai Firman Allah. Ketika dia sudah mencintai Firman Allah, dengan sendirinya juga dia akan melaksanakannya. Dan ketika ia melaksanakan Firman Allah, dengan sendirinya juga, ia akan menerima apa saja yang diminta).

Ayat 23-24. Tangkas do patikna di ayat 23 on, na mandok “asa porsea hita di Goar ni Jesus Kristus”, masihaholongan ma. Beasa ingkon masihaholongan hita? Ala, naung jumolo hita jolma dihaholongi Debata. Ndang ala ni angka haboionta, hamoraonta, dohot haulionta, umbahen na holong rohaNa di hita. Alai, holan ala ni ASI NI ROHANA i do umbahen na sahat haluaon i tu ngolu ni hita jolma pardosa naung manopoti angka dosana. Ai ndang tarbahen jolma i be malua sian angka hadosaonna molo sian gogona sambing. Ala ni ma ro Debata marhite Jesus paluahon hita pardosa. Holong ni Debata, ndang tading holan di bagabaga, alai dipapatar do i di hau silang i (Johannes 3:16 Ai songon on do holong ni roha ni Debata di portibi on……du). On ma hasintongan na so tardodo na gabe ojakan ni sangkap hatuaon na sian Debata. Sian parsuruon ni Debata di AnakNa na sasada i tu portibi on, tarida ma ndada jolma hape na manghaholongi Debata, Debata do na ro manghaholongi jolma i. Ndada sian tondi hajolmaon haroroan ni holong ni roha, alai sian Tondi ni Debata do. Debata sandiri do na patauhon holongNa i bahen pardengganan pasaehon dosanta. Ala ni dosa i, ingkon mago ma hita. Alai ala ni holongNa i, gabe dapotan hangoluon na saleleng ni lelengna ma jolma i. Marojahan tu balga ni holong ni roha ni Debata tu jolma i, dijouhon asa marparbue i di ngolu on marhite na masihaholongan. Ndang dung adong jolma naung marnida Debata, alai molo masihaholongan jolma i, mian ma Debata di bagasan diri nasida. Debata na so dung hea diida jolma, boi do tarida pangkorhonna di ngolu ni halak na manghaholongi donganna, ala Debata mian di bagasan ibana. Ala nii ma, molo itadok tahaholongi do Debata, hape ndang holong rohanta di jolma, “pargabus” do i. Ai beha ma manghaholongi Debata na so niida, hape jolma naung niida i pe so boi hinaholongan. Na mangulahon holong, i do na mian di bagasan Debata.

PANIMPULI

Joujou asa masihaholongan do apala na rumingkot di hita jolma apala di tingki  on, tarlumobi di masyarakat nang di na marhuria. Boi do bola parsaoran ni angka na martondong hinorhon ni na so masiantusan, gabe masiantukan. Ragam angka parsalisian diadopi jolma i, na boi manghorhon tu na hurang denggan laos gabe patubu parbadaion na sada tu na sada. I ma angka na ginoki ni roha na egois, na holan mangetong diri na tumingkos. Asa mago angka roha si songon i, holan sada do sihirimon, i ma Hata ni Debata. Jala asa tulus i, ingkon tatiru ma na pinatupa ni Jesus di ngoluNa laho manghaholongi jolma, (songon parrohaon ni Kristus Jesus ma parrohaonmuna, Pilippi 2:5).  Haroroan ni haholongan i tung tangkas do didok, ndada sian roharoha ni jolma manang sian parbinotoan ni portibi on, alai sian Debata do. Haholongan na sian Debata sambing do mambahen hadameon patar di portibi on. Anggo sian portibi on holan parsatongkinan do i. Boi do holong roha ni dongan, molo tingki mamora, alai dung marpogos gabe mandao be. Alai na sian Debata tung manongtong do. Halak na marholong ni roha sian Debata, i ma angka naung tubu di bagasan Debata sandiri. Panghorhon ni na masihaholongan, gabe mian ma Debata di bagasan ibana, jala ibana mian di bagasan Debata. Jotjot do ro Debata naeng mian di bagasan rohanta, alai laos jotjot do hita pajogalhon rohanta be. Ndang olo mangungkap roha asa mian Ibana disi, ala umporlu dope di rohanta hataboon ni portibi on. Ala ni, binsan tingki parasian dope on, tajou ma Ibana bongot tu bagasan rohanta, bagasta, parsaoranta nang di huria asa mian Ibana disi, laos mian hita di Ibana. Masihaholongan ma hita jolma, ai i do panjouonNa. Amen.

Pdt. W. M. Hutapea, STh