1 Musa 2 : 8 - 15

Jamita: 1 MUSA 2 : 8 – 15

2:8     Dung i dipungka Debata Jahowa ma sada porlak di Eden tartungkan habinsaran, jadi tusi ma dibahen jolma na jinadihonna i.

2:9     Dung i dipantubuhon Debata Jahowa ma sian tano i nasa hau, angka na denggan idaon, jala tabo panganon, ro di hau hangoluan na di parsitongaan ni porlak i, nang hau parbinotoan ni na denggan dohot na roa.

2:10   Dung i ruar ma sada batang aek sian Eden i, asa dibornohi porlak i, manirpang ma sian i gabe opat batang aek bolon.

2:11   Goar ni parjolo: Pison, na mangaliati sandok tano Hevila, panombangan sere disi.

2:12   Jala meram situtu sere ni na saluat i. Jumpang do huhut disi landus dohot batu soham.

2:13   Ia goar ni batang aek paduahon: Gihon, na mangaliati sandok tano Kus.

2:14   Ia goar ni batang aek patoluhon: Hidekel (Tigris), na mamolus tungkan habinsaran sian Assur. Ia batang aek paopathon, i ma Euprat.

2:15   Dung i ditogihon Debata Jahowa ma jolma i paojakkon ibana tu porlak Eden i, asa dipaulaula jala diramoti.

Epistel: PANGUNGKAPON 22 : 1 – 5

22:1   Dung i dipatuduhon ma tu ahu batang aek hangoluan na tio songon sorminan, na ruar sian habangsa ni Debata dohot Birubiru i.

22:2   Di tongatonga ni alamanna dohot di batang aek i angkupangkup adong hau hangoluan, na marparbue sampuludua hali, na mangalehon parbuena ganup bulan; ia bulung ni hau i gabe hahisaron ni angka bangso.

22:3   Ndang adong be na hona bura. Disi do habangsa ni Debata dohot Birubiru i; angka naposona i ma marhalado di Jolona.

22:4   Idaonnasida do Bohina; di pardompahannasida do Goarna.

22:5   Ndang masa be disi borngin, ndang ringkot be di nasida palito manang sondang ni mata ni ari, ai sondangan ni Tuhan Debata do nasida, jala na mangarajai do nasida salelenglelengna.

HAD…

Molo adong sada ampang na gok marisihon eme, beha do bahenon asa boi ampang i digoki dohot boras? (Ingkon pauseon ma eme i jolo, asa gokan muse boras). Naeng do marsiajar hita sian pandokan tongkin on. Asa boi siat tu pingkiranta parbinotoan na imbaru, ingkon pasidingon ma jo pangantusion naung leleng i, na sai longkot di bagasan pingkiranta be.

Ra, di pingkiranta na saleleng on, nang di pangantusionta, gombaran na boi dapot hita taringot tu Debatanta i, i ma songon sasahalak Raja na hundul di habangsana, na marpahean na mansai arga, jala sihabiaran. Sabotulna, molo tajaha lembar-lembar parjolo di Bibel i (1 Musa 1 + 2), ndada songon Raja na hundul di habangsana Debatanta i. Saleleng on “ra”, adong do sian hita na mangantusi Debata i songon tukang sihir, na boi patupa halongangan.

Alai, bereng hita ma di jamita on: Ingkon longang hita marnida gombaran ni Debata na manompa portibi on. Pambonai ni Bibel i (barita panompaon) i ma sian bindu 1 + 2. Jamita di hita bodari on ima sian bindu 2. Dung i, dipungka Debata ma sada porlak Eden tungkan (HKBP) HABINSARAN. Molo dipungka sada porlak, ise ma tukang porlak i?

Berarti, digombarhon do Debata i songon sahalak tukang porlak na pature-turehon porlakNa. Hea do hita laho tu porlak? Pangkeonta do jas tusi? Pangkeonta do abit na arga tusi? Pangkeonta do sipatu na mansai arga tusi? DAONG.

Na mangudut: ayat 9: Dipantubuhon Debata Jahowa ma sian tano i nasa hau. Tabayangkon ma jo nuaeng, dijamai parporlak i tano liat, paturehon nasa hau. Tontu molo nijama tano liat, ingkon do marbuntak jala hodokan ala ni lojana. Torus do mangula parporlak i sahat tu na singkop, ala ingkon adong ma na naeng ojakhononna ma tu porlak i (ay. 15).

Na mangudut muse: ay. 10: Ruar ma sada batang aek sian Eden i (sumber air). Tabayangkon ma muse parporlak i manggali tano, songon na mamungka sumur, asa adong na mambornoki porlak i. Dung ruar aek i, dibagi parporlak i ma muse gabe 4 bagian: ay. 11 – 14: aek na parjolo mamolus sian Hevila. Aek na paduahon mamolus sian tano Kus. Aek na patoluhon mamolus sian tano Assur jala aek na paopathon mamolus sian tano Eufrat (Betlehem). Boasa dibagi? Asa tung dapotan hangoluan na humaliang.

Na mangudut: dung sidung dipature porlak i, ditogihon ma jolma i tu bagas porlak Eden, asa dipaulaula jala diramoti.

HAD…ndang apala na manggugai haporseaonta be, umbahen na hujamitahon pe songon i, ala mansai sederhana do huhatahon hami. Adong tona na ingkon siputikonta sian panorangion i.

Naparjolo: naeng do pabotohonon ni jamita on tu hita: ia Debatanta i, i ma Debata na tongtong mangula. Ndang debata na marlemba-lemba. Debatanta i: i ma Debata na aktif. Jala saleleng adong portibi on, Debatanta i, i ma Debata na tongtong mangula. Mamungka tajaha Bibel i, sian 1 Musa sahat tu Buku Pangungkapon, digomgarhon do Debatanta i, Debata na tongtong mangula. Mangula do Debata marhite si Musa, Josua, Samuel, Saul, Daud, Salomo, angka panurirang, angka Malim. Mangula nang di bagasan Jesus, mangula Debatanta i marhite angka sisean dohot angka Apostel. Mangula do Debata nang marhite sian angka ParhaladoNa, termasuk angka sintua. I do gombaran na pinabotohon ni Bibel i.

Tona napaduahon sian jamita on, i ma: ay. 15 Dung i ditogihon Debata Jahowa ma jolma i paojakkon ibana tu porlak Eden i, asa dipaulaula. Parenta naparjolo na sahat tu jolma, i ma: Mangula. Boasa ingkon mangula? Ala Debatanta i pe torus do mangula. Dok jo mauliate ala diloas Debata dope hita marhosa jala sehat. Sada ulaon ni angka na sehat (hipas) i ma: mangula (ay. 15).

Ndang hea marimbar ulaon dipatorang Bibel i. Sude nasa ulaon na mangkorhon hadengganon, i do na mansai ringkot. Boasa diullushon Debata tu jolma i Tondi-Na? Asa mangula jolma i marhite panuturion ni Tondi ni Debata. Adong do jolma on: ulaonna “pemulung” alai sonang panghilalaanna. Baliksa, adong do hita jolma, gok hepeng nang hamoraonna, alai ndang las rohana. Ala ni aha do i? Ala hurang do hita mandok mauliate tu Debata.

Nuaeng, alusi hita ma di bagasan rohanta be: Aha do ulaonta siganup ari? Las do roham mangulahon i?

Dok ma mauliate molo diloas Debata dope hita mula-ulaon. Ai mansai torop do jolma nuaeng na so dapot ulaon. Nang pe sai didok: hansit do na mula-ulaon on. Alai dao humansit na so boi mula-ulaon / menganggur.

Memang, saleleng na mangula on, boi do gale daging, bosan, jengkel, kurang semangat. Wajar do i ala jolma na mangolu dope hita. Ai molo dung mate, ndang hilalaon ni na loja. Alai dalan laho pasiding i sude, naparjolo sahali na ingkon suan di bagas rohanta i ma: haholongi ulaonmi. Dokdok pe ulaon i, alai molo las do roha mangulahon i, ndada pola borat panghilalaan. Alai, tung ulaon dia pe i, molo nunga jumolo jut roha, maol ma marujung di bagasan na denggan. (I do nang umpasa ni hita Batak: Horbo ni Padang Bolak, manggagat di balian. Molo so lomo roha, gok ma sidalian).

Coba dibayangkan ketika sedang “berpacaran”. Tentu kita akan selalu senang bertemu dengan si dia walau pun dalam keadaan hujan dan panas terik. Itu dikarenakan “cinta” yang masih membara serta diliputi perasaan senang. Apalagi pada saat-saat bersentuhan dan berpegangan, semuanya akan terasa sangat indah. Bagaikan terbang ke langit ke tujuh. Untuk itu, buatlah juga pekerjaan saudara sebagai cinta.

Jadi, molo marimba be pe ulaonta, alai unang etong i ulaon na metmet. Sude do arga nasa ulaon na mangkorhon tu na denggan, ala sian Debata do i tajalo. Alai ni, mangula ma hita di bagasan hibul ni roha, unang satonga roha. (Muse hurang do tabona molo satonga-satonga. Holan tolor do na tabo satonga masak). Jaha: Poda 15:13 Roha na hilas pasihar panaili, alai molo marsak roha margudompong ma tondi. Poda 17:22 Roha na hilas manumpak hahisaron, alai anggo tondi na gondok pamalas holiholi). Ala ni i, mansai ringkot do las ni roha di na mula-ulaon on.

Tona napatoluhon: Dung i ditogihon Debata Jahowa ma jolma i paojakkon ibana tu porlak Eden i, asa dipaulaula jala diramoti. Had…ulaon i, asing ni gabe pasupasu, na mangula pe ingkon do huhut mangaradoti. I do tanggung jawab di hita. Gok nuaeng jolma na so bertanggung-jawab di ulaonna. Ditabai hau di harangan, ujungna masa ma banjir. Moru ma oksigen, lam mohop ma paortibi on. Angka binatang di harangan dibantai. Ringkot do tanggung-jawab.

Hea do dibege hamu taringot tu Talenta? (Mateus 25:15-17: Lima bagian, dua bagian dohot sada bagian). Nang pe so diawasi Tuan i angka naposona i, alai pangula naparjolo dohot napaduahon, burju do mula-ulaon. Alai pangula napatoluhon i, holan na modom. Ujungna hona uhum. I do pataridahon, paboa ulaonta i, i ma sada tanggung-jawab na mansai arga. Manang aha pe ulaonta, burju ma mangula, unang holan na modom. Sotung sanga ro serangan fajar.

Pangujungi ni jamitaon ma muse:

Nangkin, nunga hudok, ia pambonai ni Bibel i (1 Musa 1 + 2 / dua bindu) i ma taringot tu panompaon. Jala tarida ma disi Debata na mangula, patupahon porlak Eden. Nuaeng pangujungi ni Bibel i pe, dua bindu do (Pangungkapon 21 + 22). Bereng hita ma di bindu 21:2  Jala huida ma huta na badia i tuat sian banua ginjang sian Debata, i ma Jerusalem na imbaru, na pinature songon oroan na sinanggulan mandapothon harajaanna (huta na badia = Kota yang kudus).

Molo di bona ni Bibel i, lumobi di jamita bodari on: dipungka Debata ma sada porlak Eden. Alai di pangujungi ni Bibel, dipature Debata ma muse huta na badia (kota Kudus), i ma porlak Eden na imbaru.

Di jamita bodari on (ay. 10 ruar ma sada batang aek sian Eden). Alai di Eden na imbaru i: (Epistel Pangungkapon 22:1 adong ma batang aek hangoluan: i ma Jesus Kristus).

Jamita bodari on: ay. 15: Dung i ditogihon Debata Jahowa ma jolma i paojakkon ibana tu porlak Eden i, asa dipaulaula jala diramoti. Di Epistel Pangungkapon 22: 3 Ndang adong be na hona bura. Disi do habangsa ni Debata dohot Birubiru i; angka naposona i ma marhalado di Jolona. Lapatanna: di portibi on hita mangula, di surgo dohot do hita mangula rap dohot Jesus.

Ala ni i, taharingkothon ma mamangke tingki na adong on mula-ulaon, asa dapotan pasupasu ma hita. Amen.