1 RAJA-RAJA 17 : 17 - 24

1 Raja-raja 17 : 17 – 24

(ELIA DAN SEORANG JANDA)

17:17 Jadi dung salpu angka jamita ondeng, marsahit ma anak ni parompuan, soranganna i, pola pasang situtu sahitna laos tos hosana.

17:18 Dung i ninna parompuan i ma tu si Elia: Aha parsaoranku tu ho, ale halak ni Debata? Rupa ro do ho tu ahu laho pasingothon dosangku dohot mambunu anakki?

17:19 Dung i ninna si Elia ma mandok nasida: Boan tuson anakmi. Dung i dibuat si Elia ma anakna i sian ampuanna, laos diboan ibana tu ginjang, tu bilut na niingananna i, jala diampehon ibana tu podomanna.

17:20 Dung i joujou ma ibana tu Jahowa, ninna ma: Oale Jahowa, Debatangku! Tung dohot ma parompuan na mabalu on, soranganki marhinamago bahenonmu laho mambunu anakna?

17:21 Dung i dipabustang ma ibana tolu hali di ginjang ni dakdanak i huhut joujou tu Jahowa, ninna ma: Ale Jahowa, Debatangku, ua paulak ma hosa ni dakdanak on tu bagasan ibana.

17:22 Jadi ditangihon Jahowa ma soara ni si Elia, gabe mulak hosa ni dakdanak i tu bagasan ibana, laos mangolu ibana.

17:23 Dung i dibuat si Elia ma dakdanak i jala diboan sian bilut parginjang tu toru, jala dilehon ibana tu inana huhut didok si Elia: Ida ma, na mangolu do anakmon.

17:24 Dung i didok parompuan i ma tu si Elia: Nuaeng pe asa huboto halak ni Debata do ho, jala hasintongan do hata ni Jahowa na ruar sian pamanganmu.

Huria ni Tuhanta...

Tung so adong do mar-ARGA angka na so mar-ARTA. Nang di tonga ni hajahudion pe, sipasidingon do angka jolma sisongon on, jala ndang porlu on siurupan. Ala adong do pangantusion ni halak i, ala ni dosana sandiri do umbahen na ro hapogoson. Laos i do na jumpang di sahalak na mabalu na di huta Sarfat. Sada do boruna, jala bohal nasida pe holan satangkar itak nama dohot saotik miak. Ia dung suda panganon nasida i, mate nama nasida ala so adong be sipanganon.

Alai tinggal ma si Elia di bagas ni na mabalu i. Saleleng rap nasida, ndang marna suda itak dohot miak i. Sai adong do panganon nasida ari-ari. Dung mardalan piga-piga leleng, di laon-laon ni ari, marsahit ma boru ni na mabalu on laos mate. Pintor tubu do di roha ni na mabalu i sungkun-sungkun na mandok: Aha do na pinamasa ni Debata di ngolungkon? Boasa uhumonNa ahu marhite hamatean ni borungkon? Ai na gabe pinsang-pinsang do on ulaning?

Hita pe na mar-Tuhan on, jotjot do ro pamingkirion si songon i, molo jumpangta parungkilon, apalagi na tilahaon. Pintor olo do tadok di bagas rohanta, “na dipinsang Debata do ahu nuaeng”? Aha do dosa na huula nuaeng?

Huria ni Tuhanta...hansit pe na masa i di na mabalu i, alai mansai dokdok do i di si Elia. Ndang diantusi jolma i sangkap ni Debata. Ai molo na lomo roha ni Debata, boasa pola jolo dung mate asa dipangolu. Nanggo di tingki na marsahit i nian dipamalum Debata boru ni na mabalu i. Alai, adong naeng dohononna disi.

Maol pe na niadopan ni si Elia, ndang ditadingkon ibana na mabalu i. Jala ndang gabe lilu ibana mangalu-alu. Sae do holan tu Debata ibana martangiang jala dipasahat ibana tu Debata na masa i. Disi do masa halongangan, hatiha pinasahat saluhut parsorion tu Debata. 1 Petrus 5:7 Tinggangkon hamu ma nasa na hinolsohon ni rohamuna tu Ibana, ai disarihon do hamu. Psalmen 37:5 37:5 Pasahat ma dalanmu tu Jahowa jala haposi Ibana, asa Ibana paturehon.

I do sada sitiruonta. Mangadopi hamaolon ni parngoluon, sae do holan tu Debata hita mangalu-alau, asa diurupi hita. Unang lao be tu haholomon ni portibi on. Manang na deba, holan ala ni hamaolon ni ngolu on gabe tu parminumon larina, tu parjujian, tu narkoba, dna. Hape adong do Debata na tuk mangalehon apul-apul.

Matangiang do si Elia joujou tu Jahowa, “O ale Jahowa, ua tung paulak ma hosa ni dakdanak on”. Ujungna diloas Debata do boru ni na mabalu i muse marhangoluan. Naeng dohononna, Debata na margogo do Debatanta i. Marhuaso do ibana di saluhut angka hagogoon, jala marhuaso do Ibana pangoluhon naung mate hian. Ibana do Debata na sun denggan i. Haposi jala haporseai ma Ibana. I do hata ni na mabalu i dung diida ibana nunga mulak mangolu muse boruna i. Didok ibana ma: “Hasintongan do Hata ni Jahowa”. Tuhan bekerja membuat suatu mizijat.Holan di bagasan Debata do jumpang hita hangoluan.

Tapahombar ma na masa on di ngolunta. Jala marsorminan ma hita disi. Molo jumpangta pe angka parungkilon, unang ma pintor tadok “uhuman ni Debata i”. Ai ndang adong ngolu on na so jumpangan parungkilon. Laut tidak ada tanpa gelombang, dan hidup juga tidak ada tanpa penderitaan. Boi do dipatupa Debata i laho manguji hagogoon ni haporseaonta, asa tuk hita mandok “hasintongan do hata ni Debata”. Marragam dalan ni Debata naeng manguji rohanta nang haporseaonta.