1 Korint 12 : 3 - 13

Turpuk: 1 Korint 12 : 3 – 13

“SADA DO HITA DI BAGASAN TUHAN I”

12:3     Dibahen i hupabotohon ma tu hamu: Ndang tarbahen halak, na mangkatai marhitehite Tondi ni Debata, mamburai Jesus; jala holan marhitehite Tondi Parbadia do targoar Jesus, Tuhan.

12:4      Ragam do parasirohaon i; alai sada do Tondi.

12:5      Ragam do ulaon (di huria); alai sada do Tuhan.

12:6      Ragam do hagogoon; alai sada do Debata na mangkorhonsa di bagasan sasudena i.

12:7      Alai laho manumpak do dibasabasahon jala dipataridahon Tondi i tu ganup.

12:8      Ai tu na sada on dilehon do marhitehite Tondi i hata habisuhon; alai tu na sada an hata parbinotoan marhitehite Tondi na sasada i.

12:9      Tu na asing muse haporseaon di bagasan Tondi na sasada i, tu na asing huaso pamalumhon di bagasan Tondi na sasada i.

12:10     Tu na asing gogo patupahon halongangan, tu na asing panurirangon, tu na asing na mananda ragam ni tondi, tu na asing muse mangkatahon di hata na leban, tu na asing pajojorhon parhataan i.

12:11     Alai saluhutna i dipatupa Tondi na sasada i, ai asingasing be disagihon i tu ganup, guru lomo ni rohana.

12:12     Umpamana: Hibul do daging i, alai torop do anggo ruasna, jala ruas na torop i manjadihon daging na sasada i; songon i do Kristus.

12:13     Ai Tondi na sasada i do dipandidihon tu hita saluhutna, gabe sada daging, nang Jahudi, nang Junani, nang hatoban, nang anak mata; jala tu saluhut hita dipainumhon Tondi na sasada i.

Huria ni Tuhanta...mansai “ampit” ma nuaeng turpuk sadari on molo tapahombar tu dirinta be. Tardok do hita angka naung “porsea” di Jesus Kristus, jala nunga tajalo huaso ni Tondi Parbadia. Sada na mansai patar di hita gogo ni Tondi Parbadia, i ma: dipahinsathita sian podomanta be jala ro tu parmingguan on.Molo tung adong dope angka na malas, anggo Tondi Parbadia torus do i mangula di bagasan rohanta be. Na sipata do hurang tinggil haporseaonta umbotosa i.

Nuaeng pe..

Berengonta ma di turpuk on angka na masa di huria na adong di huta Korint. Dung manaek Jesus tu banua ginjang, sampulu ari nari dipasonggophon Debata ma tondiNa Tondi Parbadia tu angka sisean ni Jesus. Gabe margogo ma angka sisean i so pola mabiar manghatahon Jesus do Kristus naung monang manaluhon hamatean, jala naung hehe sian hamatean.

Ala ni angka jamita i ma, gabe torop ma jolma muse na porsea di Kristus. Naparjolo sahali pintor porsea do 3.000 halak sinonggopan ni Tondi Parbadia jala tardidi.Di na sinonggopan ni Tondi parbadia i do, dapotan asi ni roha nasida sude i ma na ginoaran “karisma” / talenta. Sian i ma bonsir ni parjongjong ni huria di ganup angka inganan, termasuk ma i nang huria di huta Korint songon turpuk sadari on.

Alai adong ma hamaolon di tonga ni huria i. Hea do dibege hamu hata na mandok: Sisean ni Paulus do ahu, sisean ni Apollos do ahu, sisean ni Kefas do ahu, sisean ni Kristus do ahu. Sian i taboto, nunga adong be parbolat-bolatan di huria Korint. Adong na mangetong dirina na tumingkos sian na asing. Hami do na dumenggan ninna angka na mangetong dirina sisean ni Paulus. Hami do na tumingkos ninna angka na mangetong dirina sisean ni Apollos. Hami do na tumingkos ninna angka na mangetong dirina sisean ni Kefas. Adong na mangetong dirina na tumingkos ala sisean ni Kristus ibana.

Adong na mangetong dirina na unsangap, adong na mangetong dirina na ummalo, adong na mangetong dirina na umbadia, adong na manengahon haboionna, adong na paburnang diri ala adong hamoraonna, adong na paginjang roha ala ni sinadonganna / artana. Jadi nang pe sahuria, alai ndang saparsaoran, ndang sapangkilalaan, ndang masiurupan. Gabe holip ma roha sapangkilalaan, hinorhon ni hasurungan na marimbar on.

Hape sasintongna, tung na so jadi do masa sisongon i di tonga ni huria. Boasa ndang boi masa sisongon i? Mulak ma hita tu turpuk i. Ayat 3 “Dibahen i hupabotohon ma tu hamu: Ndang tarbahen halak, na mangkatai marhitehite Tondi ni Debata, mamburai Jesus; jala holan marhitehite Tondi Parbadia do targoar Jesus, Tuhan”.

Huria ni Tuhanta...molo dung do tardok hita kristen, jala naung sinonggopan ni Tondi Parbadia i hita, tontu ndang jadi be haruar sian pamangan nang pangalahonta mandok: “ahu dope na sumurung/hami dope na ummangat”.Molo so disi ahu, ndang mardalan huria i. Molo so disungkun ahu, sursar do i ulaon i. Jadi ahu dope sian hita an raja panungkunan. Molo sai lohot dope i di bagas roha, dos dope hita disi songon na mamburai Jesus.

Didok turpuk on ma songon on: ganup jolma naung sinonggopan ni Tondi Parbadia, gabe margogo do i  mambaritahon naung hehe Jesus sian hamatean, jala dapotan asi ni roha (Karisma – anugerah) do ganup angka na porsea laho padimun-dimun huria i, i ma na ginoaran “karisma”. Naeng ringkot botoon sian dia do haroro ni i, jala tu dia pamangkena, songon pamodaion ni Apostel i di turpuk on.

Mansai tangkas do diboto Apostel Paulus parngoluon ni jolma di huta Korint, songon i nang angka ruas ni huria na marharoroan sian ragam ni “sibonsiri” (latar-belakang). Dipaingot Apostel Paulus do, ia “karisma” i ma silehon-lehon ni Debata. Jala pangkeon do i laho padimun-dimun pardalanan ni huria, songon naung tarjou angka na porsea i tu ganup angka pangkobasion di tonga ni huria.

Digombarhon do i songon sada pamatang/daging, alai torop do anggo ruasna, jala ruas na torop i do manjadihon daging na sasada i, nang pe marimbar be pamangkena. Songon i do nang huria na songon pamatang ni Kristus. Di huria i ma sada angka ruas na marragam i, nang pe marimbar be sibasa-basa na jinalona sian Tuhan i. Ulaon ni ruas i ma mamangke “sibasabasa” naung jinalonamanghobasi huria na songon pamatang ni Kristus.

Dipaingot Apostel Paulus do huria na di huta Korint, asa diboto mamangke karisma i, ndada laho marginjang ni roha manang paburnang diri. Alai songon “tanggung-jawab” do i laho mangulahon angka ragam ni ulaon di tonga ni huria i. Tontu, ndang na mangalului hasangapon manang huaso disi, alai so ganda holan  na manghobasi Debata marhite huria-Na.

Dapotan asi ni roha do ruas na adong di huta Korint marhite na digoki Tondi parbadia nasida. Jala ojak di nasida ragam ni silehon-lehon. Asa marhite silehon-lehon na marragam i ma, pangkeon ma i laho “bersaksi” taringot tu Kristus naung monang i. Tontu angka ruas naung digoki Tondi Parbadia, tuk ma i mandok Jesus do Tuhan i.

Tondi Parbadia na “mangula” di ganup roha ni ruas i do patubuhon haporseaon na mangolu, - mangokuhon paboa Jesus do Tuhan -  i do gabe dasor panghobasion ni ganup na porsea marhite talentana be. Asa ganup na porsea ndang be mangula saguru tu lomo-lomona be, alai marhite silehon-lehon ni Tondi i do.

Marragam do angka ulaon, parasinirohaon nang hagogoon di tonga ni huria, jala marragam do nang “sibasabasa” dipasahat Debata tu huria i, alai saluhut na i marharoroan sian sada Tondi Parbadia. Jala pangkeon ma i manghobasi huria i, ndada mangalului hasangapon ni marsasahalak.

Ganup angka na porsea di Jesus, nunga dipasahat be tu ibana silehon-lehon i marhitehite Tondi na sasada i. Ala ni i, ganup angka naung manjalo sibasa-basa, ingkon pangkeonna ma i ndang holan tu dirina, tung pangkeon ma i “mangalusi” panjouon ni Tondi i, di panghobasion ni huria.

Adong piga-piga sibasabasa naung dipaandar di turpuk on, i ma: habisuhon; parbinotoan, haporseaon, huaso pamalumhon, gogo patupahon halongangan, panurirangon, mananda ragam ni tondi, mangkatahon di hata na leban, pajojorhon parhataan i, dna.

Molo tung pe adong be di jolma i sibasabasa, jala molo tung pe ingkon marimbar, ndada ala ni lomo ni roha ni jolma i na patupahon i. Ndada hinorhon ni huaso ni jolma i manang ala ni habisukonna. Alai, saluhut i sian lomo ni roha ni Tuhan i do, jala haroroanna pe sada do sian Tondi i. Apostel Paulus pe ndada laho mansoadahon haimbaron i, manang manghungkupi nasa parasingan ni sibasabasa na adong di ganup ruas. Alai, andul sian i, naeng dohononna paboa ulaon ni Tondi Parbadia do parasingan i.

Hasadaon ni huria, ndang asa gabe holan samassam “sibasabasa” i, alai asa gabe hagogoon do parasingan ni ganup talenta, laho pahinsathon haporseaon ni ruas, jala patoguhon parsaoran. Dalan pamurahon pangantusion ni ruas na di Korint taringot tu parasingan ni sibasabasa, dihatahon ma umpamana, i ma daging ni jolma.

Marragam do ruas di daging i, adong do i simanjojak, siubeon, simalolong, sipareon dna, alai hasadaon ni angka ruas ni daging i do manjadihon daging na sasada i. Ndang adong ruas ni daging i na mandok “ahu do na ummangat”, alai rap ringkot do sude di hasadaon ni pamatang i.Songon i do nang ganup ruas ni huria na marimbar be sibasabasa naung jinalona, ndang dohononna be “ahu do na ummangat”.

Alai, di hasadaon ni ruas na marimbar talenta i do hagogoonna, na songon pamatang ni Kristus, jala Kristus ma na gabe ulu ni pamatang/huria i. Ala ni i, ndang na manghobasi dirinta hita di huria i, alai na manghobasi pamatang ni Kristus do. Tondi na sasada i do naung dipandidihon (“diusehon”) tu ganup jolma nang pe marimbar haroroanna (latar-belakang), termasuk ma i Jahudi, Junani, anak mata, anak hatoban, nang hita halak batak pe, angka na porsea di Jesus Kristus.

Dipaandar turpuk on ma ojakan na tangkas tu angka huria na marimbar di parhataan, adat, inganan dna, paboa sada do ojakanna i ma Tondi Parbadia. Songon ni muse di tonga ni huria marsada-sada, nang pe marragam angka “talenta” ni ruas ni huria, jala marragam nang angka sihobasan, alai sada do nang ojakanna i ma Tondi Parbadia na sasadasa i.

Ala ni i, parasingan ni ganup sibasa-basa ni ruas di panghobasion ni huria, ndang gabe hahurangan manang hasurungan i. Alai gabe “tanggung-jawab” tu Tuhan i do i. Marhite sibasabasa naung tajalo i ma hita manghobasi, padimun-dimun huria jala pahinsathon ngolu partondion ni ganup ruas nang na sahuria i. Dihaporluhon ma haserepon ni roha, molo tung adong be di ibana sibasabasa i. Ai holan na manghobasi kristus do hita disi marhite sibasabasa i. Amen.

Boi do mago talenta?