1 Kronika 16 : 31 - 36

SERMON PARHALADO HKBP RESORT SION NAULI

Jumat, 08 April 2016

Di HKBP Hapoltahan Nauli

1 KRONIKA 16 : 31 – 36

16:31  Ingkon marlas ni roha ma antong angka langit, jala marolopolop tano on, jala paboaboa hamu ma di tongatonga ni angka parbegu, Jahowa do Raja!

16:32  Marhasakhasak ma laut i ro di isina! Marolopolop ma ladang i ro di nasa na disini!

16:33  Marolopolop ma disi sude angka hau di tombak di adopan ni Jahowa, ai nunga ro Ibana laho manguhum tano on.

16:34 Mandok mauliate ma hamu di Jahowa, ai na basa do ibana, ai ro di saleleng ni lelengna do asi ni rohana i.

16:35  Jala dok hamu ma: Tumpahi ma hami, ale Debata ni hatuaonnami, jala papungu, jala palua hami sian angka bangso parbegu, asa hupuji Goarmu na badia i jala martanggulhon pujipujianmi hami.

16:36  Pinuji ma Jahowa, Debata ni Israel, sian na saingan sahat ro di salelenglelengna, jala rim bangso i mandok: Amen! Jala pujipujian di Jahowa.

PATUJOLO

Dung si Daud na gabe raja manggantihon si Saul, na parjolo sahali dipatupa ibana, i ma: papindahon Poti Parpadanan sian Kiryat Yearim (Juda) tu huta ni si Daud (Jerusalem). Dipatupa ibana ma i, ala na saleleng on, ndang be diargahon nasida Poti Parpadanan i, na marisihon 2 Lei Buku Patik, Tungkot ni si Aron dohot Manna (Heber 9:4). Poti parpadanan, i ma inganan parjumpangan ni jolma dohot Debata. Lapatanna, molo di tonga ni bangso i Poti i, rap ma Debata dohot bangsoNa. Sasintongna, asa hibul jala sada do parsombaon ni bangso Juda tu Debata di bagas joro, umbahen na dipaorot poti i tu Jerusalem. Sian panatapan “politik”, asa lam pahothon sada bangso na gogo, jala pahehehon roha “nasionalisme” tu na sampulu dua marga i.

HATORANGAN

Nunga singkop be Poti Parpadanan i dipapinda si Daud. Laho manghalashon i, dipatupa ma pesta parolop-olopon. Si Asaf rap dohot angka haha-anggina ma disuru si Daud patubegehon angka ende pujipujian dohot ende hamauliateon tu Debata.

Di bagasan pujian na marlas ni roha i, “dihara” si Daud do asa marlas ni roha ma langit, tano, laut nang ladang, ro di sude nasa pangisi ni tano on. I do sada pangokuhonon ni si Daud, paboa Jahowa do Raja na Sasintongna. Na marhuaso di nasa langit tano, laut dohot isina. Ala ni, ingkon holan Jahowa do na patut sipujion. Pamilliton ni si Daud gabe raja, ndada malua i sian pamillton ni Debata. Molo tapamanat sambolus pamilliton ni si Daud, sasintongna ndada ingkon ibana na ingkon raja. Molo sian parmudaron, si Jonatan do na patut gabe raja ala si Jonatan do anak ni si Saul na tongon raja hatiha i. Alai, songon i ma panjadina, ndada sangkap ni jolma (Saul) na saut, ingkon sangkap ni Debata do. Pola piga-piga hali sai marsangkap si Saul naeng pamatehon si Daud, alai ala diramoti Debata do hosa ni si Daud, boi ibana malua sian sude “ancaman” i.

Ende na pinatubegehon ni si Daud rap dohot bangso i, pataridahon haburjuon dohot holong ni Jahowa ro di salelengna tu bangsoNa. Nang pe sai tangkang parrohaon ni bangso i, alai sai marpamuati do roha ni Jahowa. Ala dipangkilalahon bangso i do haholongon ni Debata, ndada be ingkon ganggu nasida mandok: Tumpahi ma hami, ale Debata ni hatuaonnami. Ndang ringkot bangso i mangido pangurupion tu debata sileban, ala tongtong do rade Jahowa paluahon nasida. Ndada be ganggu bangso i di tonga ni torop bangso parbegu, ala Jahowa do na mangondingi.

Saluhut ende pujian na pinatubegehon ni bangso i, ala naung dipanghilalahon nasida do pangaramotion ni Debata, jala marlas ni roha bangso i huhut marolop-olop. Marningot naung dipalua Debata bangso i mamungka sian parhatobanon Misir sahat tu na gabe bangso na bolon. Ndada mansohot Debata patupahon angka na denggan tu bangso i. Marhite pujian on, dipabotohon bangso i do nang tu angka bangso na asing hagogoon ni Debata Jahowa na hinaporseaan ni bangso i. Laos i ma na gabe pangokuhonon di bangso i.

APLIKASI

1.      Hajongjongan ni Debata di tonga ni bangso i na sai patupahon angka na uli, asa sadar bangso i paboa Debata do na paloas bangso i marlas ni roha. Ndada hinorhon ni gogo ni jolma sambing, alai holan sian Debata do i. Haserepon ni roha, i do sada na pinatuduhon ni si Daud, laos i do na mambahen ibana nang bangso i lam jonok tu Debata. Baliksa, haginjangon ni roha i do haroroan ni hasesega.

2.      Poti parpadanan na sahat tu Jerusalem, i do gombaran hataridaan ni Debata di tonga ni bangsoNa. Alai, ndang i be na tahaporseai songon hataridaan ni Debata di partingkian sinuaeng on. Jesus nama na tahaporseai na gabe hataridaan ni Debata di ngolunta. Ndada be holan di Jerusalem, alai di saluhut inganan do hajongjongan ni Debata.

3.      Molo pe diadopi jolma i hamaolon, alai unang gabe mago pangkirimon. Rade do Debata mangalehon pangurupion di angka na marpos ni roha tu Debata. Ganup angka na masa di ngolu on, asa gabe panghatindangkonon ma i, paboa na manongtong do Debata mangaramoti ngolunta. Disi do ingkon haruar sian pamangan nang haporseaonta, angka pamujion dohot hamauliateon, dohot mangido pangurupion asa dipalua sian hamaolon i. Ai ndang adong na so tarpatupa Debata.

4.      Di saluhut angka pambahenan ni Debata di ngolunta, na mangalehon dope hosa hangoluan di hita, tama ma ingkon pujionta Ibana, jala marlas ni roha ma hita. Haru langit, tano, laut, harangan dohot nasa suansuanan, marolop-olop di saluhut na pinatupa ni Jahowa. Lam hita jolma ma? Ala ni, sai tapasangap ma Ibana na tongtong patupa denggan basa di sude panggulmiton ni ngolunta. Amen