1 RAJA-RAJA 8 : 22 - 23 + 41 - 43

Sermon Parhalado HKBP Resort Sion Nauli

1 Raja-raja 8 : 22 – 23 + 41 – 43 

(Jamita tu Minggu, 29 Mei 2016)

Topik: saluhut bangso di tano on, mananda goar-Mu

8:22   Dung i jongjong ma raja Salomo di adopan ni langgatan ni Jahowa mandompakkon sandok luhutan Israel, jala dipaherbang tanganna dompak langit.

8:23   Dung i ninna ma: Ale Jahowa, Debata ni Israel! Ndang adong Debata na tudoshon Ho di banua ginjang dohot di banua tonga on; Ho do tutu pahothon parjanjian dohot asi ni roha tu naposom, angka na marparange di jolom sian nasa rohana.

8:41   Nang halak sileban, na so sian bangsom Israel, na ro tahe sian luat na dao ala Goarmu.

8:42   Ai begeonnasida ma barita ni Goarmu na timbul i dohot tanganmu na gogo i, dohot botohonmu na toltol i, molo ro ibana martangiang di bagasan joro on:

8:43   Sai manangi ma Ho di banua ginjang, ojahan ni habangsam, jala bahen ma hombar tu saluhut na pinangido ni halak dagang i tu Ho, asa tung saluhut bangso di tano on mananda di Goarmu jala marhabiaran tu Ho songon bangsom Israel, asa tung diboto naung sahat jinou Goarmu tu atas joro na hupauli on.

HAD…tarbarita do Raja Salomo, sahalak raja na mora, na gogo jala na bisuk. Alani habisukonna i, marroan do angka raja sian saluhut bangso na di tano on, laho marsiajar tu raja Salomo (1 Raja 5:14).

Dung, haruar bangso Israel (malua) sian parhatobanon Misir, tinggal di huta Kanaan ma bangso i, huta na pinarbaga-baga i, huta na gok susu dohot situak ni loba. Jala sada na mansai arga di pardalanan ni bangso Israel saleleng di parhorsikan, i ma hajongjongan ni Poti Parpadanan. Di bagasan poti i ma disimpan si Musa: Dua Lei batu panuratan ni Patik, Manna dohot tungkot ni si Harun. Poti parpadanan i do hataridaan ni Debata di tonga ni bangso Israel.

Asa manang tu dia pe dihandit nasida poti i, sai na ramotan ni Debata do bangso i. nang di tingki marporang pe, molo diboan nasida poti i, sai na monang do bangso i, ala Debata di tonga-tonga ni Israel.

Di pardalanan ni partingkian, uju di harajaon ni si Salomo manggantihon amongna si Daud, dipajongjong ibana ma bagas joro di Jerusalem. Jala singkop do dipature bagas joro i. Boasa ingkon dipature bagas joro? Asa adong inganan hapeakan ni Poti Parpadanan i, jala dipaojak ma poti i di langgatan.

Somalna ma i, molo sidung pinajongjong sada-sada bagas, lumobi bagas joro ni Debata, sai mangihut do dipatupa pesta las ni roha, mandok mauliate.

Nang uju di harajaon Salomo pe, dipaluhut ibana do sude marga ni bangso Israel tu bagas joro i, ai naeng boanonna ma Poti Parpadanan, na saleleng on disimpan di huta ni si Daud (ay. 1), paunsatonna tu bagas joro, di inganan na mansai badia i. asa sai mian Debata rapdohot bangsoNa.

Dung sahat Poti Parpadanan i di langgatan ni bagas joro i, dipaherbang ibana ma tanganna dompak langit (Langit= banua ginjang,=surgo=inganan ni Debata). Somal do Jesus manaili tu langit di tingki martangiang:

-    Di tingki mamasumasu lima roti dohot dua dengke, manaili ma Jesus tu langit.

-    Di tingki tarsilang pe Jesus, manaili do tu langit.

Langit i ma: banua ginjang, inganan ni Debata.

HAD…adong piga-piga na ingkon siputikonta sian jamita on:

Naparjolo: Dipaherbang si Salomo ma tanganna, manaili tu langit, didok ma: Ale Jahowa, Debata ni Israel! Ndang adong Debata na tudoshon Ho di banua ginjang dohot di banua tonga on; I do pataridahon paboa, ndang mardua Debata ni si Salomo. Jala marhite i, naeng do saluhut marga ni Bangso Israel, asa sada Debata nasida. Ndang jadi mardua debata.

Beha do hita di partingkian sinuaeng on: sada do Debatanta?

Napaduahon: Boasa ingkon dipajongjong “bagas joro”? Asa sada inganan parsombaon di bangso Israel. Asa unang marserak jala mampar. Sian i do gabe adong hata Koinonia: Bersekutu, Marsaor. (Pat. Psalmen 133:1 133:1 “Ida ma, dengganna i dohot sonangnai, molo tung pungu sahundulan angka na marhahamaranggi”. Jadi ingkon tubu do parsaoran na denggan di bagas joro, songon parsaoran ni Debata tu angka na hinaholonganNa. Unang ma masa di bagas joro parbadaion, gabe mardosa dung mulak sian bagas joro.

Beha do hita muse, denggan be do parsaoran sama hita?

Napatoluhon: ndada holan parsaoran na sahuria i na diharingkothon. Alai gabe mangkorhon do i tu halak sileban, gabe olo marsaor mandapothon bagas joro mananda Debata (ay. 41).

Haroro ni angka halak dagang marsomba tu Jahowa, pataridahon tung na songkal do Jahowa, Debata ni Israel. Di bagasan tangiangna, dipangidohon si Salomo do asa tong ma rade Jahowa umbege tangiang ni angka halak dagang i, asa tung saluhut bangso mananda Jahowa jala marhabiaran tu Jahowa. Tangiang ni si Salomo on, i ma tangiang pangondianon, asa tung sude portibi on dipalua Jahowa.

Napaopathon: Taharingkothon ma ngolu partangiangon (ay. 42 Ai begeonnasida ma barita ni Goarmu na timbul i dohot tanganmu na gogo i, dohot botohonmu na toltol i, molo ro ibana martangiang di bagasan joro on). Pasupasu ni Debata, ndada be holan tu bangso Israel, alai tung tu saluhut bangso do.

Ndada holan na manangiangkon harajaonna si Salomo, alai dohot do diondihon ibana nang halak dagang. Ndada holan tu halak Israel sambing hajongjongan ni bagas joro i. Alai dohot do nang halak dagang mamparsaulihon bagas joro.

I do na jumpang hita nang di hata ni Jesus: di Johannes 10:16 Adong dope angka birubirungku na asing, na so sian bara on. Ingkon dohot do angka i togihononku; tangihononnasida do soarangku, dung i gabe sada punguan ma i jala sada ma parmahan.

Jala laos i do nang parsuruon tu ganup angka sisean uju naeng manaek Jesus tu banua ginjang: Mateus 28:19 Laho ma hamu, podai hamu ma saluhut bangso, didi hamu ma nasida tubagasan Goar ni Ama. Anak dohot Tondi Parbadia.

Laos i do muse na jumpang hita di si Kornelius na pajumpang dohot si Petrus: Ulaon ni Apostel 10:34 Nunga tangkas dapot rohangku, na so siida bohi Debata. I do tutu haroro ni Jesus tu portibi on. Mamboan nasa jolma tu Debata asa manjalo haluaon. Ndang holan tu piga-piga halak haluaon i, alau tung tu saluhut jolma do, so pola marnida bangso, haum, parhataan dna.

Huria ndada be holan na manghobasi dirina sambing. Alai ingkon “terbuka” do manghobasi portibi on. I do Visi ni HKBP: HKBP Gabe pasupasu tu portibi on. Jala sada sian Misi, i ma: Mamaritahon Barita na uli tu na so mananda Kristus dope. Gabe sira ma huria, jala gabe panondang mamboan Missio Dei (Ulaon ni Debata) tu portibi on (Mat. 5:13-14).

Naparpudi: Dung sidung ma dipajongjong si Salomo Bagas Joro i, ndang na pasangap diri ibana disi, Debata do na sangap di parjongjong ni bagasa joro i. Songon i ma nang hita ruas ni huria, ala somal do dipatupa angka panitia pembangunan laho pajongjong bagas joro, naeng do unang adong sian panitia i, lumobi parhalado, na gabe paginjang diri ala boi singkop dipajongjong nasida bagas joro. Holan Debata do na marsangap disi. Amen.