Psalmen 23 : 1 - 6

Psalmen 23 : 1 – 6

23:1    Jahowa do Siparmahan ahu, ndang tagamon hurangan ahu.

23:2   Dipatongon do ahu tu jampalan angka na lomak, ditogutogu do ahu di lambung aek hasonangan.

23:3   Dipasabam do rohangku, ditogu do ahu di dalan hatigoran, ala ni goarna i.

23:4   Ai nang pe mardalan ahu di rura linggoman ni hamatean, ndang huhabiari parmaraan, ai Ho do mandongani ahu tungkotmu dohot batahim mangapuli ahu.

23:5   Ho do manutup meja di jolongku maradophon angka musungku, dimiahi Ho do ulungku, suksuk do panginumanki.

23:6   Tongon tahe denggan basa dohot asi ni roha mangihutihut ahu saleleng ahu mangolu, jala dung mulak ahu masuhanku ma bagas ni Jahowa salelenglelengna.

HAD...

Toropan do jolma / hita kristen lomo rohana di ayat on, lumobi muse ala adong ende manang koor na pabotohon on, gabe pamurahon hita marningot ayat on. Adong do na mambahen on gabe ayat silomo ni rohana. Adong do na mambahen on di jabuna, di kaca ni mobilna, di buku harian, dohot gambar wallpaper di HP.

Ala toropan do hita mangantusi parmahanion ni Jahowa on holan sian “sudut pandang” las ni roha. Hape parmahanion ni Jahowa pe boi do i marhite parungkilon (tungkot dohot batahi).

Alai, naeng ringkot jo botoonta angka dongan songon dia do ulaon ni parmahan secara mendetail di Israel, lumobi ala “pengalaman/pardalanan” ni ngolu ni si Daud na manurathon ayat on.

Andorang so gabe raja dope si Daud, marmahan dorbia (domba) do ulaonna. Marmahani dorbia ni amongna si Isai (1 Sam 16:11). Molo borhat angka parmahan sian hutana mamboan dorbiana manjampal, olo do muse onom bulan nari asa  mulak parmahan on tu huta. Jadi tinggal di inganan panjampalan i do nasida. Jala ingkon dioranna do angka inganan panjampalan na lomak, asa butong manjampal angka dorbia (ay. 2a).

Alai, dung manjampal, ingkon paradeon ni parmahan do muse aek siinumon, asa unang mauas dorbia i. Molo so adong jumpang sunge, digali parmahan do sumur asa adong aek siinumon ni dorbia i (ay. 2b). Na marlapatan, dua haporluon na mendasar/primer-sipanganon dht siinumon, diparade parmahan do di dorbiana.

Songon i ma pangantusion ni si Daud di parmahanion ni Jahowa di ngoluna, ala diparade Jahowa do sude nasa na ringkot di ibana (makanan dan minuman). On do ra umbahen na sai lomo rohanta di ayat na mandok Jahowa do siparmahan ahu, ndang tagamon hurangan ahu. Jala molo tapahombar ma tu ngolunta, dohonon ni angka na porsea do, nunga diparade Jahowa angka na ringkot di ngolunta “sipanganon-siinumon”.

Parmahanion ni Debata NAPARJOLO di ngolunta i ma: diparade di hita sipanganon dohot siinumon. Ndang adong hita na hurangan sipanganon dohot siinumon. Holan na mambuat nama hita. Alai beha ma cara mambuat i.

Dipasabam do rohangku, ditogu do ahu di dalan hatigoran, ala ni goarna i.

Ulaon ni parmahan NAPADUAHON i ma: Pasabam roha ni dorbia, dohot mangarahon angka dorbia i asa sai hot mardalan di dalan hatigoran (ndang dalan lurus). Boasa didok si Daud songon i? Ia parmahan ingkon di jolo do mardalan, jala mangihut ma angka dorbia sian pudina (Ep. 1 Ptr 2:21 > mangihuthon bogas ni pat-Na). Jadi ingkon ihuthonon ni dorbia i do bogas ni pat ni parmahan i tu adaran laho manjampal. Jala sai tu jampalan na lomak do i.

I do umbahen na didok si Daud: “dipasabam do rohangku, paboa na jumpangan jampalan na lomak do ahu, molo huihuthon bogas ni pat-Na i”. Nang di ngolunta on pe angka dongan sahaporseaon, jumpang hita ma hasabamon ni roha molo rade hita mangihuthon bogas-Na i, i ma dalan hatigoran. Dalan hatigoran i ma: mangaradoti hataNa jala mangulahon i di ngolu on.

NAPATOLUHON, Ai nang pe mardalan ahu di rura linggoman ni hamatean, ndang huhabiari parmaraan, ai Ho do mandongani ahu tungkotmu dohot batahim mangapuli ahu. Boi do dorbia gabe mate ala ni parmaraan/bahaya. Angka dia ma parmaraan i?

Di tingki marmahan dorbia si Daud, godang do “ancaman/parmaraan” jumpangna di adaran. Termasuk ma i panangko, pembunuh, singa, nang serigala dohot gompul, na boi manoro dorbia. Somalna umbahen na marmara pe dorbia, ala na dituntun do lomona, ndang mardalan di dalan hatigoran, manang lalap di si halalapan. Ndang mardalan mangihuthon bogas ni parmahan i, gabe marsirang ma sian angka donganna. Hape nunga adong “mara” i ma singa, gompul nang angka serigala na nanaeng mamolgak.

Ala ni i do, ringkot ma pangapulion di angka na mangadopi parmaraan. Alai, boasa didok “tungkotmu dohot batahim mangapuli ahu”? Beha do boi tungkot dohot batahi mangapuli?  Hape fungsi ni tungkot dohot batahi, i ma mangantuk dohot manambok (memukul dan mencambuk). Mungkinkah pukulan dan cambukan menjadi penghiburan? Bagaimana itu bisa terjadi?

Molo manimbil dorbia sian angka donganna, dison ma fungsi ni tungkot dohot batahi, mamungkul dohot manambok dorbia i asa tarsonggot. Dung i mulak ma ibana muse tu angka punguanna. Ai molo pala mandao jala lalap dorbia i, mate ma i soroon ni angka singa dohot gompul. Jadi tumagon ma diantuk manang disambok asal ma malua sian hamatean, daripada lalap alai ujungna tu hamatean. Jadi mansai hansit do diantuk dohot disambok alai tu hangoluan. I do umbahen didok si Daud “tungkot dohot batahiM do mangapuli ahu”.

Jadi molo tapahombar i tu ngolunta: Boi do tongon hita nuaeng diantuk jala disambok Debata, asal ma unang tu hamatean hita.Di ngolu on pe, sai jumpangta do sipata angka na hansit, manang ragam ni parungkilon. Atik tung beha do tongon hita “diantuk manang disambok” Jahowa, anggiat unang mate hita jala ingot hita di Ibana.

Angka na porsea di Jahowa, antusanna ma sian parnidaan ni haporseaon, paboa sai manumpak tu na denggan do sude parungkilon/parhansiton na masa di ngoluna. Boi do i gabe pinsang-pinsang manang paniseon ni Jahowa di ngolunta. Ai marhuaso do Ibana manise jolma marhite arsak nang las ni roha.

NAPAOPATHON, “Ho do manutup meja di jolongku maradophon angka musungku, dimiahi Ho do ulungku, suksuk do panginumanki”. Hatiha i, marmara do ngolu ni si Daud ala naeng dibunu Raja Saul ibana. Boasa naeng dibunu? Ala talu do si Goliat dibunu si Daud, jadi gabe cemburu ma si Saul ala nunga tumorop jolma na “mengagungkan” si Daud martimbangkon si Saul. Gabe naeng dibunu ma si Daud. Ujungna lari ma si Daud tu adaran martabuni. (dia berada dalam bahaya karena Raja Saul beberapa kali gagal membunuh Daud).

Somalna, angka jolma na di bagasan pangaleleion, ndang sonang i marsipanganon dohot marsiinumon, ala sai dilete biar ni roha. Alai dilehon Jahowa do di si Daud “hasabamon ni roha dohot hasisingkop ni sipanganon nang siinumon”. I do umbahen na didok si Daud: Ho do manutup meja di jolongku maradophon angka musungku, dimiahi Ho do ulungku, suksuk do panginumanki.

Na marlapatan: diondihon Jahowa do ngoluna. Laos i do ulaon ni parmahan, mangondihon ganup dorbiana sian angka ragam ni musu, ndang holan di tingki di pardalanan, alai dohot do nang di tingki marsipanganon nang marsiinumon.

NAPALIMAHON, jala pangarimpunan ni sude pangaramotion ni Jahowa, didok si Daud ma: Tongon tahe denggan basa dohot asi ni roha mangihutihut ahu saleleng ahu mangolu, jala dung mulak ahu masuhanku ma bagas ni Jahowa salelenglelengna.

Sada na ringkot botoonta angka dongan: Ndang si Daud mangalului denggan basa dohot asi ni roha i. Alai, denggan basa dohot asi ni roha i do na mangihutihut ngoluna saleleng ibana mangolu. Bukan dicari tetapi mengikut sendiri. Alai asa ro denggan basa i, ingkon adong ma siulahonon, i ma: na so jadi sirang dorbia sian parmahan. Na so jadi sirang si Daud dohot Jahowa. Na so jadi sirang hita muse sian Jahowa silehon hangoluan i. Disi ma marroan denggan basa.

HAD...Songon parmahan na denggan, na mangondihon angka dorbiana, na rade manogihon tu jampalan na lomak asa bosur, manogu tu aek asa unang mauas, jala rade agoan hosa, songon i do Jahowa marmudumudu ngolunta.

Dipasingkop nasa na ringkot, dilinggomi sian ragam ni hamusuon, jala diramoti ngolu ni angka na porsea i. Sahat tu na rade agoan hosa, asa malua angka dorbia i/ nang hita sian hamatean. Songon i do Jahowa marhite Jesus, na rade agoan hosa asa malua hita angka pardosa sian linggoman ni hamatean i.

Saleleng di pardalanan ni ngolunta (angka na porsea) di portibi on, jumpang hita do marragam angka siparungkilhonon/parmaraan, nang panggugai ni angka “musu”. Boi do angka parungkilon i, songon pinsang-pinsang ni Jahowa asa unang lalap hita di portibi on.

Laos boi do muse parungkilon i, paingothon hita asa mulak tu Jahowa silehon hangoluan di hita. Ala ni i, tongtong ma sai maporus tu Jahowa, asa dilehon tu hita hasabamon ni roha, huhut dipasahat nang pangondianon. Ndada holan i, pasahaton-Na do muse ragam ni pasupasuNa (denggan basa) nang asi ni rohaNa i.

Tontu holan angka na porsea di Tuhan do na tuk mangokuhon dohot marhatopothon na tarsurat di turpuk on, songon si Daud na marhaposan tu Jahowa. Ala ni i, tahaporseai ma paboa sandok ngolunta on (di las ni roha nang arsak) i ma dalan ni Jahowa marmahani hita, ai Ibana do Parmahan na tutu. I do hata ni Jesus, di buku Johannes bindu 10 i, paboa Ibana do Parmahan na denggan i.

Nunga tangkas diseahon Parmahan i hosaNa humongkop nasa birubiru-Na, marhite na rade Ibana mate di hau pinarsilang. Sai tubu ma di rohanta haporseaon na mangolu, songon “respon” di hita ala  na pinatupa ni Parmahan na denggan i saluhut na ringkot (sipanganon nang siinumon) di ngolunta, nang ala ni pangondianon na di silang i. Amen.